Isaia 66

Dii bui píi kãaa

1 Ma Dii ma mɛ̀:

Musu mɛ́ ma kpalabaa ũ,[a]

tↄↄlɛ mɛ́ ma gbadibↄ ũ.[b]

Kpɛ́ pↄ́ á ye dↄmɛɛ bee ku máɛ?

Ma zↄ̃lɛkĩi bee kà kpelewai?

2 Ma ↄ mɛ́ pↄ beeↄ kɛ̀ píi,

ↄ̃ aa kuo lò?[c]

Ma Dii mámɛ má ò.

Gbɛ̃́ pↄ́ má aà wɛgwan kɛ:

Gbɛ̃́ pↄ́ azĩa bùsa mɛ́ a nↄ̀sɛ doũ,

mɛ́ a ma yã́ↄ vĩa vĩ.

3 Wì sa'oa ń zuo, ↄ̃ wì gbɛ̃dɛ lↄ,

wì sa'oa ń são, ↄ̃ wì gbɛ̃ waa fĩ,

wì mↄ ma gba pↄ́wɛnti, ↄ̃ wì sàwa au tↄ̃́lɛ,

wì tulaletikamɛɛ tɛ́a, ↄ̃ wì kúlɛ tã́aɛ.

Aa zɛ̀ ń ńzĩa pↄeão,

an pↄ ìↄ na ń yãbɛ̃ɛpiↄwa.

4 Mapi sↄ̃ ma zɛò

mà yã́ gɛa ń kpɛo sua ń aɛo kɛnɛ́,

má mↄ́má ń yã́ pↄ́ aa a vĩa vĩo,

asa ma lɛzù, gbɛ̃e i weao,

ma yã'ò, aai swã́sɛio.

Aa yã́ pↄ́ má yeio kɛ̀,

aa zɛ̀ ń yã́ pↄ́ i kamaguoo.

5 Á gbɛ̃́ pↄ́ á ma vĩa vĩↄ à ma yãma.

Á gbɛ̃́ pↄ́ aa zaágu,

aaì á bↄ adoa ma yã́iↄ mɛ̀:

Dii tↄbↄ, wí á pↄna e mɛ̀!

Wí a ń kṹ ḿpii.

6 Wɛ̃́lɛ súu ma dↄ!

Ma kpɛ́ kↄ̃fĩ ma dↄ!

Málɛ fĩabo ma ibɛɛↄnɛ a lɛ́ gbɛu.

7 E aàↄ gɛ́ nↄwãwãkɛi à pìla,

e aà nↄ̀sɛ àↄ gɛ́ swaa kĩ́iwa,

à nɛ'ì gↄ̃ɛ ũ.[d]

8 Démɛ yã́ bee taa mà yãai?

Démɛ wɛsìɛ màai?

Wa bùsu i gↄↄ doa?

Wa buikɛ kã́ndo gↄ̃̀ↄa?

Kási kɛ́ nↄwãwã mↄ̀ Siↄnawa,

à nɛ́ↄ bↄ̀bↄ gↄ̃̀ↄ.

9 Ma Dii ma mɛ̀

má tó nɛ'igↄↄ ká, nɛ́ gí bↄ pɛ́lɛia?

Mapi á Lua ma mɛ̀

má tó pilagↄↄ ká, mí sakpɛ tataa?

10 À pↄnakɛ Yelusalɛũ yã́ musu,

à yáalↄwà, á gbɛ̃́ pↄ́ á yeaàziↄ.

À pↄnakɛò, á gbɛ̃́ pↄ́ álɛ ↄ́ↄlↄɛ̀ↄ.

11 Asa á aà yↄ̃́ mi à kã́, á nↄ̀sɛ i níni,

á aà í mi, á pↄ i kɛ aà àizɛɛ zↄ̃ↄwa na.

12 Asa ma Dii ma mɛ̀

má aafia pisiwà lán swawa,

má buiↄ àizɛɛ naaaɛ̀ lán swa paawa,

i yↄ̃́ kpáwá, i á kuɛ, i á kpá a gbáa.

13 Lá da ì a nɛ́ nↄ̀sɛ níni,

màa má á nↄ̀sɛ níniɛ́,

á nↄ̀sɛ a níni Yelusalɛũ.

14 Tó a wɛsìaàlɛ, á pↄ a kɛ na,

á mɛ iↄ aafia lán sɛ̃̀kusiwa.

Dii a to a zↄ̀blenaↄ a gbãa dↄ̃,

kási a kpɛ̃nɛmuu bↄbↄ a ibɛɛↄwa.

15 Gwa! Dii lɛ́ mↄ́ ń tɛ́o,

aà zĩkasↄ̃go aↄ dɛ lán zàawa.

A sumá ń kyã̀wãao,

a ń lele ń tɛ́lɛpiↄo.

16 Asa Dii a yã́kpalɛkɛ ń bui píio ń tɛ́o ń fɛ̃ndao,

mɛ́ gbɛ̃́ pↄ́ a ń dɛdɛↄ fàao.

17 Gbɛ̃́ pↄ́ aaì gbãbↄ ńzĩaɛ aa gɛ́ sa'oiↄ,

aaìↄ tɛ sa'onazi e swaluu,

aaì sàwa sa'onↄↄ só ń zaeo ń ɛ̃́nao,

aa midɛ sãnuɛ.

Ma Dii mámɛ má ò.

18 An yãkɛaↄ ń ń làasooↄ yã́i málɛ mↄ́ bui píi kãaai. Tó aa mↄ̀, aa wɛsi ma gawilɛ. 19 Má seelakɛ ń guu, mí ń gbɛ̃́ pↄ́ bↄ̀eↄ gbaɛ buiↄwa, Taasisi ń Libiio ń Ludi pↄ́ kàzunaↄ vĩo ń Tubalio ń Gɛlɛsio ń ísia baa bùsu zã̀zãↄ, gu pↄ́ wi ma tↄ́ mauo mɛ́ wì wɛsi ma gawilɛoↄ, aai ma gawi kpàwakɛ buiↄnɛ. 20 Aa bↄ ń á gbɛ̃́ↄ bui píi kĩ́i dia sↄ̃́ kpɛ ń sↄ̃baonaↄ ń yiongoↄ kua sↄ̃́goↄ ń zugoↄ guu. Ma Dii ma mɛ̀ wa mↄ́ńnↄ ma kpɛ́u wà ma gba Yelusalɛũ ma gbɛ̀sĩsĩ pↄ́ a kua adoa musu, lá Isailiↄ ì mↄ́ ń pↄ́wɛntio ta gbãlɛsai guuwa. 21 Ma Dii ma mɛ̀, má ń gbɛ̃eↄ sɛ dilɛ sa'onaↄ ń Levii buiↄ ũ.

22 Ma Dii ma mɛ̀ lá musu dafu ń zĩ́lɛ dafu[e] pↄ́ málɛ kɛo aaↄ ku ma aɛ gↄↄpii, màa á nɛ́ↄ ń á tↄ́o aↄ ku gↄↄpii. 23 Ma Dii ma mɛ̀ mↄ ń mↄo, kã́mabogↄↄzĩ ń kã́mabogↄↄzĩo, bui píi aliↄ mↄ kúlɛi ma aɛ. 24 Tó aa bↄ̀ wɛ̃́nkpɛ, aa gbɛ̃́ pↄ́ bↄ̀ ma kpɛↄ gɛↄ gwagwa. An kↄ̀ↄbiiↄ láao, an tɛ́ a gao,[f] mɛ́ bui píi aↄ ye ń gĩyãio.

<- Isaia 65