Isaia 38

Ezekia gyãkɛa

(2Kia 20.1-11, 2Lad 32.24-26)

1 Bee gbɛa Ezekia gyãkɛ̀ à kà gaa, ↄ̃ ãnabi Isaia Amↄzu nɛ́ gɛ̀ aà lè, a òɛ̀: Dii mɛ̀ lɛdilɛ n gbɛ̃́ↄnɛ, asa ńlɛ mↄ́ gaiɛ, ńyↄ̃ fɛlɛ lↄo. 2 Ɔ̃ Ezekia aɛdↄ̀ gĩwa, à wabikɛ̀ Diiwa 3 à mɛ̀: Dii, n yã́ na! Lá má n yã́ kũa ń náaio, mɛ́ ma yã́ pↄ́ ń yei kɛ̀ ń nↄ̀sɛmɛndoo, to à dↄngu. Ɔ̃ à wɛ̃na ↄ́ↄlↄ̀. 4 Ɔ̃ Dii yã'ò Isaiaɛ à mɛ̀: 5 Gɛ ǹ o Ezekiaɛ, ma Dii aà dezi Davidi Lua ma mɛ̀, ma aà wabikɛa mà ma aà wɛ́'i è, ma aà gↄↄ kã̀fĩɛ̀ wɛ̃̀ gɛ̃o. 6 Má aà si Asiliↄ kíawa ń wɛ̃́lɛɛ beeo, má gí ń wɛ̃́lɛpioɛ.

21 Isaia mɛ̀ wà kaadↄɛmbɛ lↄ wà dↄↄ aà sã́nɛwa, i gbã́gbã. 22 Ɔ̃ Ezekia mɛ̀: Bↄ́mɛ aↄ dɛ ma ɛa gɛa Dii kpɛ́u seela ũi? Isaia wèwà à mɛ̀:*Dↄ̀ↄ 21-22 maa lakĩi, lá a ku 2Kia 20.7-8 guuwa. 7 Seela pↄ́ Dii a kɛnɛ lɛ́ pↄ́ á gbɛ̃̀nɛ yã́ musun kɛ: 8 Uena pↄ́ ĩatɛ̃ lɛ́ suò Aaza gbápɛpɛkĩiↄ gwa. A to uena pↄ́ lɛ́ pilawà ɛa dɛdɛwà mɛ̀n kwi. Ɔ̃ ĩatɛ̃ ɛ̀a dɛ̀dɛ gbápɛkĩi mɛ̀n kwi pↄ́ à pìlawà yãawa.

9 Lɛ pↄ́ Yudaↄ kí Ezekia dà a gbã́gbãa ń a gyão gbɛan kɛ:

10 Ma mɛ̀, gↄↄ pↄ́ ma ka kã́maboa

ↄ̃ ma kãikũ̀ ń ɛlɛoa?

Lua a ma wɛ̃̀ kĩnina pↄ́ gↄ̃̀mɛɛ sia yã̀?

11 Ɔ̃ ma mɛ̀ má Dii e dṹniau lↄo,

má wɛsi gbɛ̃nazĩnalɛ lↄo,

máↄ kú ń gbɛ̃́ pↄ́ kú tↄↄlɛↄ lↄo.

12 Lua lɛ́ ma bↄ sↄu,

àlɛ sↄpi sia,

lá dã́dãkɛna ì a kpɛ́ wolowa.

Àlɛ ma wɛ̃ni bãmba,

lá zwã̀atãna ì pↄ́lɛ bↄ àsauwa.

Fãanɛ ń gwãasĩnao àlɛ ma midɛɛ.

13 Ma a nↄ̀sɛ suumpà e gu gɛ̀ dↄ̀ò,

ń beeo à ma wá wì

lán nↄ̀ↄmusu wáwiawa.

Fãanɛ ń gwãasĩnao àlɛ ma midɛɛ.

14 Ma wiitɛ̃na lɛ̀ lán luakibãnawa,

ma ↄ́ↄlↄ̀ lán felentuukɛnawa.

Ma wɛ́ dↄnzi musu e ma wɛ́ wò,

málɛ taasikɛ, Dii, zɛmanↄ.

15 Má o kpelewaɛ?

Bↄ́ yã́ má fↄ̃ oɛ̀, kɛ́ ↄ̃mɛ mↄ̀ò nↄↄ!

Máↄ bɛ busɛbusɛ e ma wɛ̃ni lɛ́uɛ

ma pↄsia yã́i.

16 Dii, ni to wàↄ ku,

ma nisĩna aↄ aafia n yã́i,

ńyↄ̃ ma gbã́gbã, míↄ ku.

17 Ma kã́fĩa yã́i pↄsia bee ma lei,

ń tò ma gↄ̃sↄ̃kũ̀ n yeamazi yã́i,

n ma duuna zù n kpɛ píi.

18 Asa wìli n sáaukpa miauo,

gɛↄ lí n táasilɛo,

gbɛ̃́ pↄ́ sì ɛuↄ lí wɛdↄ n náaiio.

19 Gbɛ̃́ bɛ̃́ɛↄ mɛ́ ì n sáaukpa,

lá málɛ kɛ gbãɛwa,

maeↄ ì n náai galikɛ ń nɛ́ↄnɛ.

20 Dii a ma suaba,

wí ↄkɛ Dii táasilɛbↄwa

aà kpɛ́u e wá wɛ̃ni lɛ́u.

<- Isaia 37 Isaia 39 ->