Isaia 37

Ezekia wabikɛa Diiwa

(2Kia 19.1-19)

1 Kɛ́ kí Ezekia yã́pi mà, à a ula ga kɛ̃̀ à zwã̀nkasa kàkaala, ↄ̃ à gɛ̀ Dii ua. 2 À a bɛ ziia Ɛliakiũ ń a lakɛ̃na Sɛbenao ń sa'onkiaↄ zĩ̀ ãnabi Isaia, Amↄzu nɛ́wa, zwã̀nkasaↄ kákaańla. 3 Aa òɛ̀: Ezekia mɛ̀ yã́ gì gbãɛ, wà wá dá taasiu, wà wá lele, wà widàdawá. Wa gↄ̃ lán nↄɛ pↄ́ a nɛ́ kà bↄa mɛ́ yɛ̃̀ɛɛ ku a fↄ̃ iowa. 4 Asiliↄ kía a zĩgↄ̃ↄ gbɛ̃zↄ̃ↄ zĩ̀, à mↄ̀ Lua bɛ̃́ɛ láanikɛ̀. Dii n Lua yã́pi mà, a aà lele yã́pi oa yã́ia, wá dↄ̃o. Wabikɛwà wá gbɛ̃́ kↄ̃na pↄ́ wa gↄ̃ↄnɛ.

5 Kɛ́ kí Ezekia zĩnapiↄ gɛ̀ Isaia lè màa, 6 a ònɛ́: À gɛ o á diiɛ, Dii mɛ̀ asu to vĩa a kũ Asiliↄ kía ìwaↄ dↄ́ɛaanↄ yã́ pↄ́ a màpi yã́io. 7 À ma! Tó Asiliↄ kía baoe mà, Dii a to làasoo gɛ̃aàgu, i ta a bùsuu. Dii i to wà aà dɛ ń fɛ̃ndao we.

8 Kɛ́ zĩgↄ̃ↄ gbɛ̃zↄ̃ↄ mà Asiliↄ kía fɛ̀lɛ Lakisi, à ɛ̀a tà à aà lè, àlɛ zĩka ń Libenadeↄ. 9 Asiliↄ kía mà Etiopiↄ kí Tilaka lɛ́ mↄ́ zĩkaianↄ, ↄ̃ à ɛ̀a zĩnaↄ gbàɛ Ezekiawa à mɛ̀: 10 À o Yudaↄ kí Ezekiaɛ, dii pↄ́ àlɛ a náaikɛ à gbàsa mɛ̀ á Yelusalɛũ namɛɛ ma ↄzĩo, asu to aà a sã́são. 11 I ma lá Asili kíaↄ kɛ̀ bùsuↄnɛ à ń kɛ́ kɛ́lɛkɛlɛ píio lé? A mɛ́ a bↄ adoa? 12 Bui pↄ́ ma deziↄ kàalɛↄ, Gozã ń Halanao ń Lɛzɛfio ń Edɛni pↄ́ kú Telasaaↄ, an tã́aↄ ń bↄ́e? 13 Amata kía kú mái? Aapadaɛ kía kú máɛ? Sefavaiũ ge Ena ge Iva kíaↄ ku mái?

14 Zĩnapiↄ lá kpà Ezekiawa. Kɛ́ à a kyokɛ̀, à gɛ̀ Dii kpɛ́u, a pòo aà aɛ, 15 à wabikɛ̀wà à mɛ̀: 16 Dii Zĩgↄ̃de Isailiↄ Lua pↄ́ kú malaika gã̀sĩadeↄ zãnguo,[a] ḿmɛ ń Lua ũ bùsu pↄ́ kú dṹnia guu píiɛ. Ḿmɛ n musu kɛ̀ ń tↄↄlɛo. 17 Swã́kpa ǹ yãma, Dii. Wɛ́sɛ ǹ gugwa, Dii. Dↄ́ɛa ń Lua bɛ̃́ɛo lɛ́kpãsã pↄ́ Sɛnakelibu kɛ̀ ma fá! 18 Sĩanaɛ Dii, Asili kíaↄ buipiↄ kàalɛ píi, an bùsuↄ gↄ̃̀ bɛzia ũ. 19 Aa ń diiↄ kàtɛu aa ń kpasa, asa aa dɛ Lua ũo, pↄ́ pↄ́ gbɛ̃nazĩna kɛ̀ ń lío ń gbɛoↄnɛ. 20 Dii wá Lua, wá bↄ aà ↄzĩ, bui pↄ́ kú dṹnia guu píi iↄ dↄ̃ kɛ́ n Dii, ḿmɛ ń Lua ũ ndo.

Sɛnakelibu gaa

(2Kia 19.20-37)

21 Ɔ̃ Amↄzu nɛ́ Isaia lɛ́kpãsãkɛ̀ Ezekiaɛ à mɛ̀: Dii Isailiↄ Lua mɛ̀ a wabi pↄ́ ń kɛ̀ Asiliↄ kí Sɛnakelibu yã́ musu mà, 22 à àsiɛ bee ò aà musu:

Siↄna wɛ̃́lɛ lɛ́ sakangu,

àlɛ n láanikɛ n kpɛ.

Gbɛ̃e i zĩble Yelusalɛũpiwa yãao,

ↄ̃ àlɛ a mi dada a gã̀u.

23 Dé n dↄɛwà ń sↄ̃̀sↄ̃i?

Dé n kãaɛ̀ n n mi dàɛ̀ íai?

Isailiↄ Lua pↄ́ a kua adoa ń kɛ̀ɛ.

24 Ń dà n ìwaↄnɛ aa Dii sↄ̃̀sↄ̃,

n mɛ̀ n dɛdɛ sĩ̀sĩↄ musu ń n zĩkasↄ̃go dasiↄ

e Libã bùsu gbɛ̀sĩsĩ misonau.

N sɛdɛ lí gbã̀aↄ zↄ̃̀zↄ̃,

n pɛ̃li zↄ̃ↄↄ kwɛ̀,

n ka a lɛ́wa musu e a likpɛ sisiu.

25 N lↄ̀ↄ yↄ̃̀ buipãleↄ bùsuu,

n a imì,

n kɛ̀sɛ Egipi swaↄ í bà.

26 Kɛ́ ma Dii má dìlɛ màa za zi,

ni mao lé?

Ma zɛò à gɛ̃̀gɛ̃, ↄ̃ má tò à kɛ̀.

Má tò n ń wɛ̃́lɛ bĩ́ideↄ kwɛ̀ wìliũ,

aa gↄ̃̀ daaĩa.

27 Wɛ̃́lɛpideↄ gbãa kɛ̃̀sã,

aa gↄ̃̀ suuu, wí ń kṹ.

Aa dɛ lán sɛ̃saowa,

lán sɛ̃la bↄlↄwa,

lán sɛ̃ pↄ́ bↄ̀lɛ kpɛ́wa à gàga gↄ̃̀ↄwa.

28 Má n kúkĩi dↄ̃,

má n gɛa ń n suao dↄ̃,

má n pↄpaamazi dↄ̃.

29 N pↄ pàmazi,

n kàamai pↄ́ ń vĩ yã́ gɛ̃̀ ma swã́u.

Má bakanɛ n níu,

má ã̀asĩna kanɛ n lɛ́uɛ,

má tó ǹ ɛa tá ń zɛ́ pↄ́ n mↄòo.

30 Ezekia, yã́ɛ beeↄ dɛnɛ seela ũ.

Á pↄzã blɛ ble wɛ̃a,

zii lↄ í ble we.

Zii kee sa à pↄ́tↄ̃ í pↄkɛkɛ,

à vɛ̃ɛli pɛ́pɛ í a bɛ ble.

31 Yuda kↄ̃na pↄ́ bↄ̀ↄ zĩ́na a ɛa pɛ́lɛ tíu,

an nɛ́ iↄ kpa musu.

32 Asa gbɛ̃́ kↄ̃naↄ bↄ Yelusalɛũ,

Siↄna gbɛ̀sĩsĩdepiↄ gↄ̃.

Ma Dii Zĩgↄ̃de ma ãia mɛ́ a bee kɛ.

33 Ayãmɛto ma yã́ɛ bee ò Asiliↄ kía musu:

A gɛ̃ wɛ̃́lɛɛ beeuo,

a kazuuo,

a a sɛ̀ngbao dↄɛ̀o,

a koezↄ̃i à gbà lɛsĩ daio.

34 A ɛa tá ń zɛ́ pↄ́ à mↄ̀ooɛ,

a gɛ̃ wɛ̃́lɛpiuo.

Ma Dii mámɛ má ò.

35 Má gí ń wɛ̃́lɛpio,

má a suaba mazĩa yã́i

ń ma zↄ̀blena Davidi yã́io.

36 Ɔ̃ Dii Malaika bↄ̀ gɛ̀ Asiliↄ bòou, à gbɛ̃́ↄ dɛ̀dɛ ↄ̀aasↄsↄo lɛɛ ↄ̀aa do gɛ̃osai (185.000). Kɛ́ aa fɛ̀lɛ kↄↄ, aa gɛↄ e kálɛa gupiiu. 37 Ɔ̃ Asiliↄ kí Sɛnakelibu fɛ̀lɛ a bòopiu, à ɛ̀a tà Niniva, a ku we. 38 Gↄↄ pↄ́ a kúlɛa a tã́a Nisoki kpɛ́u, aà nɛ́ↄ Adamɛlɛki ń Salɛzɛɛo aà dɛ̀ ń fɛ̃ndao, ↄ̃ aa bàasi tà Alalata bùsuu. Ɔ̃ aà nɛ́ Esaadↄ̃ zↄ̃̀lɛ aà gbɛu.

<- Isaia 36 Isaia 38 ->