Isaia 28

Waiyookɛa Ɛflaiũ buiↄ ń Yelusalɛũdeↄnɛ

1 Waiyoo wɛ̃́lɛ pↄ́ Ɛflaiũ bui idɛkɛnaↄ aaì ĩ́anadãò,

mɛɛwia pↄ́ kú guzulɛ táaede sĩ̀sĩ musu lán kíafuawa!

A kɛfɛnkɛ gawi lɛ́ láa lá lávu ì wolowa.

2 Dii gↄ̃sa gbãa vĩ, a mↄ wɛ̃́lɛpi wí

lán lou maa ń gbɛo zàa'ĩan gbãa pↄ́ ì pↄ́ músikɛwa,

lán lou zàa'ĩan gbãa pↄ́ ì to í daguawa.

3 Wa ↄ̃zↄ̃ wɛ̃́lɛ pↄ́ Ɛflaiũ bui idɛkɛnapiↄ ì ĩ́anadãòwa.

4 A kɛfɛnkɛ gawi pↄ́ kú guzulɛ táaede sĩ̀sĩwa lán lávuwa

a kwɛ́ lán kaadↄɛn nɛ́ maà sɛ̃́iawa.

Tó wa è, wa sɛ zu lɛ́u gↄ̃̀ↄ bló.

5 Gↄↄ bee Dii Zĩgↄ̃de aↄ dɛ lán kíafua gawidewa a gbɛ̃́ kↄ̃naↄnɛ,

ↄ̃mɛ aↄ dɛnɛ́ lán tulu kɛfɛnawa.

6 A tó yã́zɛde dↄaa yã́kpalɛkɛnaↄnɛ,

a gbɛ̃́ↄ gba gbãa aa zĩ yoaa bĩ́ibↄlɛu.

7 Vɛ̃ɛ ì sa'onaↄ tàlaatalaazↄ̃,

í gbãa ì ãnabiↄ pãpãzɛa.

Í gbãa ì ń tàlaatalaazↄ̃,

vɛ̃ɛ ì zↄ̃lɛmá.

Í gbãa ì ń pãpãzɛa,

aaì tàlaatalaabo ń ãnabikɛ guu,

yã́ ì yamá ń yã́gↄ̃gↄ̃a guu.

8 Pisi dà ń táabũnuↄla,

gue fòona vĩo ń gbãsĩo.

9 Aaì o ma yã́ musu:

A ye dↄ̃a kɛwɛ̃ɛ yã̀?

Àlɛ wɛɛlɛ ãnabikɛ dadawɛ̃ɛ yã̀?

Nɛ́ dɛ̀ɛũnaↄn wá ũa?

10 Asa ì mɛ:

Sá, sà, sá sà,

ká, kà, ká, kà,

la yↄↄ, le yↄↄ.

11 A yã́i tò Dii a yã'o gbɛ̃́piↄnɛ

ń buipãle yã́ pↄ́ aalɛ maoo.

12 Asa a ònɛ́ yãa:

Kã́mabokĩi kɛ! Ĩampakĩi kɛ!

À to gbɛ̃́ pↄ́ kpàsaↄ kã́mabo!

Kási aai swã́sɛ aà yã́io.*

13 Ɔ̃ Dii yã́ dɛnɛ́:

Sá, sà, sá, sà,

ká, kà, ká, kà,

la yↄↄ, le yↄↄ,

kɛ́ aa bↄlɛlɛ kpaanla, aai wíwi,

bai i ń kṹ, wi ↄdiɛmá.

14 A yã́i tò à Dii yãma,

á gbɛ̃́laanikɛna pↄ́ álɛ kible gbɛ̃́piↄwa Yelusalɛũↄ.

15 A mɛ̀ a kↄ̃ yãmà ń gao,

a lɛdoũkɛ̀ ń bɛdao.

A mɛ̀ lↄ, tó músi lìgua,

àlɛ pãála, a á leo,

asa ɛɛ mɛ́ á ulɛkĩi ũ,

mↄafili mɛ́ á mikpakĩi ũ.

16 A yã́i tò ma Dii Zĩgↄ̃de ma mɛ̀:

Gwa! Málɛ gbɛ gbãa dilɛ Siↄna,

kpɛ́ gbɛ̀ bɛɛɛde mide pↄ́ wa ɛ̃ kpálɛò ũ.

Wí a gbɛ̃́ pↄ́ lɛ́ aà náaikɛ kũo.†

17 Yã́zɛde mɛ́ aↄ dɛ kpɛ́pi yↄ̃ba ũ,

mɛ́ maakɛa aↄ dɛ a gĩsusugwabↄ ũ.

Lougbɛ a ɛɛ pↄ́ dɛ á ulɛkĩi ũpi gbɛ̃,

í a da á mikpakĩia.

18 Á kↄ̃ yãmaa ń gao a midɛ,

á lɛdoũkɛa ń bɛdao a gboo.

Tó músi lìgua, àlɛ pãála,

a ↄ̃zↄ̃wáɛ.

19 Tó à mↄ̀, ali á sɛ́lɛ táánↄɛ,

aↄ pãála lá gu lɛ́ dↄ fãanɛ ń gwãasĩnao.

Gili a gɛ̃ gbɛ̃́ pↄ́ yã́pi zɛ́ dↄ̃u.

20 Wúlɛbↄ kɛ geseũ, a ń pooo,

zwãa kɛ̀ teeeũ, a kúńlao.

21 Dii a fɛlɛ ń a zĩo,

lá a kɛ̀ Pelaziũ gbɛ̀sĩsĩ saɛwa,‡

a bↄ ń a dabudabu zĩo,

lá a kɛ̀ Gabaↄ̃ↄ guzulɛuwa.§

22 Ásu àↄ dɛ gbɛ̃́laanikɛnaↄ ũo,

kɛ́ ba pↄ́ wa dↄ̀wá su nao yã́i.

Asa má mà Dii Lua Zĩgↄ̃de mɛ̀

a zɛ ń á bùsu kaalɛao píiɛ.

23 À swã́kpa ma yã́ ma,

à laaidↄ yã́ pↄ́ málɛ oɛ́wa.

24 Zↄ̃ɛ ìↄ kpase kɛ̃ gↄↄpii yã̀?

Ìↄ gubi àↄ sapa zɛsai yã̀?

25 Tó à tↄↄlɛ dàaĩ,

ì dosiona ba,

ì ɛfↄ kɛɛlɛ,

ì mase tↄ̃́ dↄ̀ↄdↄↄ,

ì naa ba a bakĩi,

ì gbɛ́'a pɛ́ kↄↄ lɛ́zĩ.

26 Aà Lua ì dↄaaɛ̀,

ì aà da zĩpi zɛ́wa súsu.

27 Ìli dosiona gbɛ̃ ń ɛ̃́ngooo,

ìli ɛfↄ wɛ́ suumpa ń zugo gbáoo.

Ì dosiona wɛbↄ ń gongbãanaoɛ,

ì ɛfↄ wɛ́ suumpa ń ↄoɛ busɛbusɛ.

28 Ì pↄ́wɛna lↄ́ɛ, ìliↄ gbɛ̃ gↄↄpiio.

Baa tó à táa'òwà ń zugo gbáo,

ìli a tí bↄo.

29 Yã́pi bↄ̀ Dii Lua Zĩgↄ̃de kĩ́iɛ lↄ,

aà lɛdama ì bↄ ń saɛ,

aà ↄ̃nↄ zↄ̃ↄ.

<- Isaia 27 Isaia 29 ->