Isaia 21

Yã́ pↄ́ a Babɛli le

1 Gbáa pↄ́ pãa ísiai yã́.

Lá zàa'ĩana ì pã Nɛgɛvɛa,

màa wà bↄ̀ bùsu pↄ́ wa a vĩa vĩu,

wàlɛ pã guwaiwaia.

2 Wɛ́pungu pↄ́ má èpi yã́ pãsĩ.

Pↄkaalɛna lɛ́ pↄ́ kaalɛ,

zĩbↄnkpɛde lɛ́ bↄ ń kpɛ.

Elaũↄ, à lɛ́lɛmá!

Mɛdɛↄ, à koezↄ̃ńzi!

3 Yã́ pↄ́ má è tò ma lɛ́ gↄ̃̀ kpaaũa,

yã́ pↄ́ má mà ma da bíliu.

A wãwã ma kũ gbãa, àlɛ ma wó paa,

à fɛ̀lɛmanↄ lá nↄwãwã ì fɛlɛ nↄɛwawa.

4 Iwãa kà ma pↄa,

gili gɛ̃̀magu, málɛ lualua.

Oosi mɛ́ ma si,

ↄ̃ à mↄ̀mɛɛ ń kpakpanagaao.

5 Wàlɛ blɛkalɛ táabũnu musu,

wàlɛ pɛ kpálɛkpalɛ,

wàlɛ pↄble, wàlɛ imi.

Zĩgↄ̃ↄ gbɛ̃zↄ̃ↄↄ,

à fɛlɛ à á gↄ̃kɛbↄↄ sɛ́lɛ!

6 Yã́ pↄ́ Dii òmɛɛn kɛ:

Gɛ ǹ gbɛ̃́ dilɛ gugwakĩi,

pↄ́ pↄ́ a è i o.

7 Tó à sↄ̃́ↄ è kpaaĩa plapla,

aalɛ zĩkagoↄ gá

ń gbɛ̃́ↄ didia zàa'ĩnaↄ kpɛ ń yiongoↄ,

aàↄ kú ń laaio maamaa.

8 Ɔ̃ gugwanapi wiilɛ̀ à mɛ̀: Dii,

miↄ zɛ ma gugwakĩi lá gu lɛ́ dↄɛ,

miↄ ku ma limusudakĩi gwã́ ń gwã́o.

9 Gwa! Sↄ̃́ kpaaĩa plapla gode lɛ́ mↄ́.

Ɔ̃ godepi mɛ̀: À gà! Babɛli gà!*

A diiↄ kálɛa tↄↄlɛ wíwia.

10 Ma gbɛ̃́ pↄ́ wà á gbɛ̃́ lán pↄ́wɛnawaↄ,

ma yã́ pↄ́ má mà Dii Zĩgↄ̃de Isailiↄ Luawa òɛ́.

Yã́ pↄ́ a Ɛdↄũↄ le

11 Duma yã́.

Gbɛ̃e lɛ́ lɛzumazi za Sei à mɛ̀:

Gudↄ̃ana, gusia kà kpelewai?

12 Ɔ̃ gudↄ̃ana òɛ̀: Gu lɛ́ mↄ́ dↄiɛ,

kási gu a gi àↄ siaɛ.

Tó ń ye yãlaɛ, la, ní ɛa su lↄ.

Yã́ pↄ́ a wi Laalubuↄ musu

13 Laalubuↄ yã́.

Á Dedã kyaama pↄ́ ì bòokpa Laalubuↄ bùsu likpɛnauↄ,

14 à gɛ́ dai imidɛnaↄlɛ ń ío.

Á gbɛ̃́ pↄ́ á kú Tema bùsuuↄ,

à gɛ́ dai lala'onaↄlɛ ń pↄbleao.

15 Asa aalɛ bàalɛ fɛ̃ndaɛɛ,

fɛ̃nda wɛ́tɛ̃ ń sákãao ń zĩ̀ pãsĩoɛ.

16 Dii òmɛɛ à mɛ̀: Wɛ̃̀ do lɛ́u lán gbɛ̀wina zĩgↄↄ lɛdilɛawa, Kedaaↄ gawi a láa. 17 Kedaa gↄ̃sa kadeↄ bↄ dasio. Dii Isailiↄ Lua mɛ́ ò.

<- Isaia 20 Isaia 22 ->