Ozee 5

5

Isailiↄ daa yã́u

1 Sa'onaↄ, à yã́ɛ bee ma,

Isailiↄ, à swã́kpa.

Kibɛdeↄ, à swãdↄ yã́i,

asa málɛ yãdaálaɛ.

A gↄ̃nɛ́ bai ũ Mizipa,

a filifilimbakpànɛ́ Taboo.

2 Gbɛ̃́ dↄ̀ↄsaipiↄ kà zã̀ ń gbɛ̃dɛao,

mámɛ má ń swã́gaga ḿpii.

3 Mámɛ má Ɛflaiũ buiↄ dↄ̃,

Isailipiↄ yã́ ulɛamɛɛo.

Ɛflaiũ buiↄ zɛ̀ ń gbãsĩkɛao saɛ,

Isailiↄ gbãlɛ̀.

4 An yãkɛaↄ mɛ́ tò aali su ń Luawao,

gbãsĩkɛa kú ń sↄ̃u, aa Dii dↄ̃o.

5 Isailiↄ wala ì ń dayãu,

Ɛflaiũ buiↄ ì gɛ̃mbↄlɛ ń duunkɛa guu,

Yudaↄ ì gɛ̃mbↄlɛńnↄ sↄ̃ɛ.

6 Aaì gɛ́ Dii kĩ́i wɛɛlɛi ń ń sãↄ ń ń zuↄ,

kási aali bↄwào, à azĩa gànɛ́.

7 Aa bↄ̀ Dii kpɛ, ↄ̃ aa naaenɛↄ ì'i.

Wa ń kaalɛ saɛ e mↄ do,

ampiↄ ń ń buaↄ.

8 À kuupɛ Gibɛa!

À kã̀aepɛ Lama!

À zĩ̀gãalɛ Bɛtavɛ̃!

À dↄaa Bɛ̃yãmɛɛ buiↄ!

9 Ɛflaiũ bùsu a gↄ̃ bɛzia ũ an wɛtãgↄↄɛ.

Yã́ pↄ́ málɛ o Isaili buiↄnɛ sea vĩo.

10 Yudaↄ kíaↄ dɛ lán gbɛ̃́ pↄ́ aaì kↄↄ sɛ sↄ̃oↄwaɛ.

Má a pↄkũma bↄbↄmá lán ídaa guawaɛ.

11 Wàlɛ gbãamↄ Ɛflaiũ buiↄnɛ,

yã́kpalɛ mɛ́ ń ble,

asa aa gi tɛ yãpãiɛ.

12 Má dɛ Ɛflaiũ buiↄnɛ lán blɛ́waɛ,

má dɛ Yudaↄnɛ mɛkɛmuuna ũ.

13 Kɛ́ Ɛflaiũ buiↄ ń gyãkɛa è,

mɛ́ Yudaↄ ń bↄkɛa è,

Ɛflaiũ buiↄ gɛ̀ Asiliↄ kĩ́i,

aa gbɛ̃́ↄ zĩ̀ dↄnlɛ gbɛai ń kía zↄ̃ↄwa,

kási a fↄ̃ á gbã́gbão,

a fↄ̃ tó á bↄↄ láao.

14 Asa máↄ dɛ Ɛflaiũ buiↄnɛ lán nↄ̀ↄmusuwaɛ,

máↄ dɛ Yudaↄnɛ nↄ̀ↄkusi ũɛ.

Má ń taitaiɛ, mí dazɛu,

má táńnↄɛ, suabanae aↄ kuo.

15 Má dazɛu, mí tá ma kúkĩi,

e aaↄ ń tàae dↄ̃, aai ma kĩ́i wɛɛlɛ,

aai ma aɛya ń yooyea guu.

<- Ozee 4 Ozee 6 ->