Ezekiɛli 32

Wɛ̃nakɛa Falaↄ̃ↄɛ

1 Wá kua zĩ̀zↄↄ ũ wɛ̃̀ kuɛplade, a mↄ kuɛplade gↄↄ sɛ̃́ia zĩ́ Dii yã'òmɛɛ à mɛ̀: 2 Gbɛ̃nazĩn nɛ́, wɛ̃nalɛ si Egipiↄ kí Falaↄ̃ↄ yã́ musu ǹ oɛ̀:

Ni kɛ lán nↄ̀ↄmusuwa buiↄ guu,

ń dɛ lán kwãsawa íↄ guuɛ.

Ni kↄ̃dɛ n swaↄ guu,

ni a í ya ń n gbáↄ, ní ↄ̃zↄ̃wà.

3 Ma Dii Lua ma mɛ̀

zĩgↄ̃ dasiↄ kãaa, mí a bai kpanɛ,

aai n ga n bↄ ma táalu guu.

4 Mí n zu sɛ̃u mà n to tↄↄlɛ we,

bãↄ i mↄ pɛpɛma ḿpii,

sɛ̃̀anↄbↄↄ i n ble aa kã ḿpii.

5 Má n báasi kálɛ gbɛ̀sĩsĩↄ musu,

mí n guupↄↄ kↄ́lɛ guzulɛↄ pai.

6 Má tó tↄↄlɛ ga ń n au pↄ́ bↄ̀lɛo,

a gbɛ̀sĩsĩↄ le, i swaↄ pa.

7 Tó ma n dɛ, má ↄku luabɛa,

má tó saanaↄ siakũ.

Má tó lou kúlɛ ĩatɛ̃wa,

mɛ́ mↄvua a gupu lↄo.

8 Luabɛ gupuakũnaↄ siakũ píiɛ,

má tó gu kɛ síii n bùsuu.

Ma Dii Lua mámɛ má ò.

9 Tó ma n kaalɛa baokpà buiↄnɛ,

má tó gili gɛ̃ gbɛ̃́ dasipiↄgu,

bùsu pↄ́ ń dↄ̃oↄ gbɛ̃́ↄ.

10 Má tó n yã́ di dasiwa,

an kíaↄ kã́ i sĩ n yã́i,

tó ma a fɛ̃nda màlɛ n wɛ́ oi.

N lɛ́lɛa gↄↄ an baade a lualua láasai a wɛ̃ni yã́i.

11 Asa ma Dii Lua ma mɛ̀,

Babɛli kía a mↄ lɛ́lɛma zĩ guuɛ.

12 Má tó bui pãsĩ nɛgↄ̃naↄ

n zĩgↄ̃ dasiↄ kwɛ́ ń ń fɛ̃ndaↄ.

Aa Egipi zĩasɛa lɛsĩ midɛ,

aai a zĩgↄ̃ dasiↄ tↄ̀lↄzↄ̃.

13 Má a zu pↄ́ kú í saɛↄ míↄnzↄ̃ píiɛ,

gbɛ̃nazĩna ge zu a ípi ya lↄo.

14 A gbɛa má tó a í dↄdↄ,

a swaↄ i táa'o lán nísiwa.

Ma Dii Lua mámɛ má ò.

15 Tó ma Egipi kɛ̀ bɛzia ũ,

mɛ́ ma a pↄ́ↄ pìliwà píi,

tó ma gbɛ̃́ pↄ́ kú weↄ dɛ̀dɛ píi,

aaiↄ dↄ̃ kɛ́ mámɛmaa Dii.

16 Wɛ̃nalɛ pↄ́ wa siɛ̀n we.

Buiↄ nɛnↄɛnaↄ mɛ́ aa si

Egipi ń a zĩgↄ̃ dasiↄ yã́ musu.

Ma Dii Lua mámɛ má ò.

17 Wá kua zĩ̀zↄↄ ũ wɛ̃̀ kuɛplade, a mↄ sɛ̃́ia gↄↄ gɛ̃ode zĩ́ Dii yã'òmɛɛ à mɛ̀: 18 Gbɛ̃nazĩn nɛ́, waiyookɛ Egipi zĩgↄ̃ dasiↄnɛ, ní ń kpá tↄↄlɛ nↄnau ń bui zↄ̃ↄↄ ń gbɛ̃́ pↄ́ aalɛ tá ɛ̀ zòolouↄ. 19 Onɛ́, an maa dɛńla yã̀? Aa gɛ wúlɛ sãnu ń gyafↄↄdeↄ. 20 Aa kwɛ́ gbɛ̃́ pↄ́ aa gà zĩ guuↄ guu. Fɛ̃nda woa. Wà Egipi ń a zĩgↄ̃ dasiↄ gálɛ taò. 21 Nɛgↄ̃n swana pↄ́ kú bɛdauↄ i o Egipi ń bui pↄ́ lɛdoũkɛ̀aànↄↄ yã́ musu aa mɛ̀: Aa mↄ̀ wùlɛ ń wá gyafↄↄde pↄ́ wa gaga zĩ guuↄ.

22 Asili ku we ń a zĩgↄ̃ↄ píi, aà gbɛ̃́ pↄ́ gàga zĩ guupiↄ miaↄ liaaàzi píi. 23 An miapiↄ ku ɛ̀ zòolo pↄ́ↄu, mɛ́ aà zĩgↄ̃piↄ lia aà miai. Gbɛ̃́ pↄ́ aa tò sↄ̃ kɛ̃̀ dṹnia gbɛ̃́ↄgupiↄ gàga zĩ guu ḿpii.

24 Elaũ ku we. Aà zĩgↄ̃ dasi pↄ́ gàga zĩ guuↄ lia aà miai. Gbɛ̃́ pↄ́ aa tò sↄ̃ kɛ̃̀ dṹnia gbɛ̃́ↄgupiↄ tà gyafↄↄdeↄ kĩ́i tↄↄlɛ nↄnau. An gɛɛ gↄ̃̀ kpá ń wɛ́i ń gbɛ̃́ pↄ́ tà ɛ̀ zòolo guuↄ. 25 Wà wúlɛkĩi kɛ̀ɛ̀ gɛↄ guu, aà zĩgↄ̃ dasiↄ lia aà miai. Ampii gyafↄↄdeↄnɛ, aa gà zĩ guu. Lá pↄ́ aa tò sↄ̃ kɛ̃̀ dṹnia gbɛ̃́ↄgu, an gɛɛ gↄ̃̀ kpá ń wɛ́i ń gbɛ̃́ pↄ́ aa tà ɛ̀ zòolo guuↄ. Elaũ wúlɛa gɛↄ guu.

26 Mɛsɛki ń Tubalio ku we. An zĩgↄ̃ dasiↄ lia ń miaↄi. Ampii gyafↄↄdeↄnɛ. Aa gà zĩ guu, kɛ́ aa tò sↄ̃ kɛ̃̀ dṹnia gbɛ̃́ↄgu yã́i. 27 Aa wúlɛa ń nɛgↄ̃n gyafↄↄde pↄ́ aa tà bɛdau ń ń zĩkabↄↄ. Wà ń fɛ̃ndaↄ kàlɛ ń mi zíɛ, wà ń sɛ̀ngbaoↄ kùlɛ ń gɛↄwa. Nɛgↄ̃napiↄ tò sↄ̃ kɛ̃̀ dṹnia gbɛ̃́ↄgu.

28 Mpi sↄ̃ Falaↄ̃ↄ, ńyↄ̃ↄ ku wíwia gyafↄↄdepiↄ guuɛ. Ńyↄ̃ wúlɛ ń gbɛ̃́ pↄ́ aa gà zĩ guupiↄɛ.

29 Ɛdↄũ ku we, aà kíaↄ ń aà kíabuiↄ. Baa ń ń nɛgↄ̃nkɛo aa kpagua ń gbɛ̃́ pↄ́ aa gà zĩ guuↄɛ, aa wúlɛ ń gyafↄↄdeↄ ń gbɛ̃́ pↄ́ aalɛ tá ɛ̀ zòolo guuↄɛ.

30 Gugbãntoo gukpɛ oi kíaↄ ku we ḿpii ń Sidↄ̃deↄ píi. Baa kɛ́ sↄ̃ kɛ̃̀ gbɛ̃́ↄgu ń nɛgↄ̃nkɛ yã́i, aa tà gɛↄ guu ń wíoɛ, aa wúlɛa gyafↄↄdeↄ ũ ń gbɛ̃́ pↄ́ aa gà zĩ guuↄɛ. An gɛɛ gↄ̃̀ kpá ń wɛ́i gbɛ̃́ pↄ́ aa tà ɛ̀ zòolo guuↄ ũ.

31 Falaↄ̃ↄ a wɛsińlɛ, aà nↄ̀sɛ i níni aàpi ń a zĩgↄ̃ dasi pↄ́ aa gà zĩ guuↄ yã́ musu. Ma Dii Lua mámɛ má ò. 32 Má tò sↄ̃ kɛ̃̀ dṹnia gbɛ̃́ↄgu Falaↄ̃ↄ ń a zĩgↄ̃ dasiↄ yã́i, kási aa wúlɛ gyafↄↄdeↄ guu ń gbɛ̃́ pↄ́ gà zĩ guuↄɛ. Ma Dii Lua mámɛ má ò.

<- Ezekiɛli 31 Ezekiɛli 33 ->