Ezekiɛli 27

Wɛ̃nakɛa Tiiɛ

1 Dii yã'òmɛɛ à mɛ̀: 2 Gbɛ̃nazĩn nɛ́, wɛ̃nalɛ da ń Tii pↄ́ kú ísiabuakĩi 3 ì laata ń bui dasi pↄ́ an bùsu ku ísialɛↄ ǹ mɛ:

Ma Dii Lua ma mɛ̀,

Tii, ni mɛ n kɛfɛnkɛ bↄ̀lɛi.

4 Ń dɛ lán gówa ísia guo,

n kalɛnaↄ tò n kɛfɛnkɛ bↄ̀lɛi.

5 N líↄá Senii gbɛ̀ pɛ̃liↄnɛ,

mɛ́ n lipɛlɛá Libã sɛdɛ líɛ.

6 Wà n gólibↄↄ ã̀ ń Basana gbɛ̃́nɛliↄɛ,

wà n lipɛpɛɛↄ kɛ̀ ń Sipi bùsu sɛ̃́ lí pↄ́ wà wesa swaa dàdauↄɛ.

7 N zwãaá Egipi pↄ́lɛ wɛ̃̀sãdeɛ,

a dɛ n dàlapoo ũ.

N zwã̀akpɛ zwãaá zwã̀a búuna

ń zwã̀a gàalulade pↄ́ bↄ̀ Ɛlisa bùsuuↄnɛ.

8 Sidↄ̃deↄ ń Aavadideↄ mɛ́ n gobↄnaↄ ũ,

nzĩa gbɛ̃́ gↄ̃ideↄ mɛ́ n ígbɛ̃ↄ ũ.

9 Gebali gↄ̃ide zↄ̃ↄↄ ku n guu

n gufootatanaↄ ũ.

Ísia góↄ ń ń ígbɛ̃ↄ ku n saɛ,

álɛ laata sãnu.

10 Pɛɛsiↄ ń Ludiↄ ń Libiiↄ

ku n zĩgↄ̃ↄ guu nɛgↄ̃naↄ ũ.

Aa ń sɛ̀ngbaoↄ ń ń mↄ̀ fùaↄ lòolooma,

aa tò n kɛfɛũ kũ̀.

11 Aavadi zĩgↄ̃ↄ kálɛa n bĩ́iↄwa aa lìai,

Gamadadeↄ ku n gugwakĩi lɛsĩↄ guu.

Aa ń sɛ̀ngbaoↄ lòoloo n bĩ́iↄwa

aa tò n kɛfɛnkɛ bↄ̀lɛi.

12 Taasisideↄ laatànnↄ sãnu n àizɛɛ dasiↄ yã́i. Aa fĩabònɛ ń ã́nusuo ń mↄsio ń mↄpuo ń bɛↄmao. 13 Gɛlɛkiↄ ń Tubaliↄ ń Mɛsɛkiↄ laatànnↄ sãnu, aa fĩabònɛ ń zↄↄ ń mↄgotɛ̃ pↄ́ↄ. 14 Tↄgaamaↄ fĩabònɛ ń sↄ̃́ zĩkɛnaↄ ń sↄ̃́ zĩ̀kanaↄ ń sↄ̃baonaↄ. 15 Lodedeↄ laatànnↄ sãnu, bùsu dasideↄ mɛ́ n laalunaↄ ũ, aa wesa swaa ń mↄa lío kpàma. 16 Siliↄ laatànnↄ sãnu n pↄ́ dasiↄ yã́i, aa fĩabònɛ ń tiikↄazio ń zwã̀a gàaluladeo ń zwã̀a wɛ̃̀sãdeo ń bàabaao ń òsoo ń lubiio. 17 Yudaↄ ń Isailiↄ laatànnↄ sãnu, aa fĩabònɛ ń pↄ́wɛnao ń zↄ́o ń nísio ń lí'ↄo. 18 Damasideↄ laatànnↄ sãnu ń Ɛlɛbↄ̃ vɛ̃ɛo ń Zahaa sãkão n pↄ́ dasiↄ ń n àizɛɛↄ yã́i. 19 Dã buiↄ ń Gɛlɛki pↄ́ kú Uzaliↄ n laa lù ń mↄ̀ pↄ́ wa kàsoo ń kasia gĩnanao ń kanɛ lí feeo. 20 Dedãↄ laatànnↄ sãnu ń gaaĩ zwãaↄ. 21 Laalubuↄ ń Kedaa kíaↄ laatànnↄ sãnu ń sãnɛbↄlↄↄ ń sãsakaoↄ ń bleↄ. 22 Seba ń Laama laatanaↄ fĩabònɛ ń pↄ́ gĩnana maaↄ píi ń gbɛ̀ bɛɛɛdeↄ píi ń vuao. 23 Halanadeↄ ń Kanɛdeↄ ń Edɛnideↄ ń Seba laatanaↄ laatànnↄ sãnu ń Asiliↄ ń Kilimadadeↄ. 24 Aa pↄkasa maaↄ ń ulada búunaↄ ń zwãa pↄ́ wà bà kɛ̃̀wàↄ ń pↄ́ wɛ̃̀sãde pↄ́ wì kpálɛ kpɛ́uↄ ń bà gbãaↄ yíama n ɛlɛu.

25 Taasisi gó'ilɛnaↄ n laaↄ sɛa,

ń kãa, n tↄbↄ̀ ísia guo maamaa.

26 Gobↄnaↄ gɛnnↄ ikooa lɛsĩↄ kĩ́i,

gukpɛ ĩ́ana i n wíwi ísia guoguo.

27 N àizɛɛↄ ń n laaↄ ń n pↄ́ↄ píi

kpálɛ ísia guoguo n ↄ̃̀ↄkpagↄↄ

ń n bↄnaↄ ń n ígbɛ̃ↄ

ń n gufootatanaↄ ń n laatanaↄ

ń n zĩgↄ̃ↄ ń dasi pↄ́ kú n guuↄ.

28 Gↄ̃sↄ̃ a lualua ígbɛ̃piↄ wii yã́i.

29 Gobↄnaↄ bↄlɛ ń góↄ guu ḿpii,

gofĩnaↄ ń ígbɛ̃ↄ píi aaↄ zɛa gↄ̃sↄ̃lɛ.

30 Aa wiilɛ n yã́ musu,

aai búbuapɛ wɛ̃nannↄ.

Aa bùsu zu ń mia,

aai gbeembo túfu guu.

31 Aa ń migbaa lɛ́ n yã́i,

aai zwã̀nkasaↄ da.

Aa n ↄ́ↄlↄ ń pↄsiao

ń búbua pãsĩo.

32 Aa wɛ̃nalɛ sinɛ ń ↄↄlↄo,

aa wɛ̃nakɛnɛ aa mɛ:

Tii, wɛ̃́lɛe muaannↄo,

ↄ̃ n kɛ kyↄ̃́ ísia guoguoa?

33 Kɛ́ n laa yíaaↄ dàzɛu ísiaa,

bui daside kã̀ n àizɛɛ zↄ̃ↄ yã́i.

N pↄ́ↄ tò dṹnia kíaↄ kɛ̀ ↄdeↄ ũ.*

34 Ísia n wiwi sa, n sↄ̃ↄlɛ ísiu,

n pↄ́ↄ ń n gbɛ̃́ↄ kpàlɛnnↄ ḿpii.

35 N yã́ dì ísialɛdeↄwa,

ↄ̃ an kã́ sĩ̀, an oa ↄ̃̀ↄkpà.

36 Buiↄ laatanaↄ lɛ́ lɛsuikɛkɛma,

n kaalɛa vãi, ńyↄ̃ↄ ku bau lↄo.

<- Ezekiɛli 26 Ezekiɛli 28 ->