Làasoode 5

1 N lɛ́ su àↄ wãao, ńsu nↄnwãakɛ ǹ yã'o Lua aɛo. Lá a ku musu mɛ́ ń kú zĩ́lɛ, ńsu yã'o dasio. 2 Lá bↄↄlɛ dasi ì mↄ́ ń nana'oao, màa yã́ dasi bↄlɛa ì mↄ́ ń sↄũyã'oo. 3 Tó n lɛkɛ̀ Luawa,*Soũ 66.13-14 ńsu ǹ a fĩaboa gágao. Ǹ a fĩabo, asa sↄũↄ yã́ lí kaaàguo. 4 Lɛkɛa Luawa sai maa dɛ a kɛawà fĩabosaia. 5 Ńsu to n lɛ́ n dayãuo. Ńsu o sa'onaɛ n zã lɛkɛawaɛo. Ń ye Lua pↄ panzi n yã́pi yã́i, i zĩ pↄ́ ńlɛ kɛ bãdɛ yã̀? 6 Nana dasi oa ń yã́ dasi bↄlɛao ì mↄ́ ń yãpão. A yã́i tò ǹyↄ̃ Lua vĩa vĩ.

Àizɛɛá pãɛ

7 Tó ń è wàlɛ gbãamↄ taasideↄnɛ guei, wàlɛ gínɛ́ ń yã́zɛdeo, wàlɛ yã́gↄ̃gↄ̃nɛ́ a zɛ́wao, ńsu to yã́pi dimao, asa bùsupi gbãadeↄ lɛ́ wɛ́tɛkↄ̃iɛ, mɛ́ an gbɛ̃zↄ̃ↄↄ lɛ́ wɛ́tɛńzi lↄ. 8 Ampii aaì bùsupi baa bleɛ, asa kía mɛ́ buaↄ vĩ.

9 Gbɛ̃́ pↄ́ ye ↄ̃ai lí kã́òo,

gbɛ̃́ pↄ́ ye àizɛɛi ài lí mↄ́wào.

Beeá pãɛ lↄ.

10 Tó àizɛɛ lɛ́ kã́fĩ,

a blenaↄ ìↄ kã́fĩɛ.

Bↄ́ ài a vĩ a diiɛi?

Aà wɛbiiwà bàasio.

11 Zĩgbãakɛna ì i na ma,

à pↄblè yↄↄ ge maamaan nò.

Ɔde sↄ̃, aà kãa lí tó à i'oo.

12 Ma yãvãi pãsĩ è dṹniau,

gbɛ̃e zɛtà a ↄdalɛ,

à azĩa kpà ĩai,

13 ↄ̃ à bↄↄlɛ vãi kɛ̀ò,

aà àizɛɛ mìdɛ píi.

Kɛ́ à nɛgↄ̃ɛ ì, a pↄe vĩ à toɛ̀ lↄo.

14 Gbɛ̃nazĩna ì bↄ a da gbɛɛu puiziɛ.

Lá à mↄ̀, màa ì ɛa ta lↄ,

ìli a zĩ àie e sɛ nà a ↄzĩ à tàòo.†

15 Yã́ɛ beeá yãvãi pãsĩɛ lↄ.

Lá gbɛ̃́ mↄ̀, màa ì ɛa ta lↄ.

À isima ga kpà, à gugiiyàɛ,

bↄ́mɛ gↄ̃̀ɛ̀i?

16 Bee gbɛa à a gↄↄ mↄaokɛ̀ gusiau

ń pↄyaa zↄ̃ↄo ń gyão ń pↄfɛ̃o.

17 Ɔ̃ má è a maa ń gbɛ̃nazĩnao aà pↄble, aà imi, aà zĩ pↄ́ a kɛ̀ ń taasio dṹniau a wɛ̃ni kpòona pↄ́ Lua aà gbà lɛ́u sáaukpa, asa aà luakpaman we. 18 Bee gbɛa tó Lua gbɛ̃́ kà ↄdawa ń àizɛɛo, mɛ́ à aà gbà zɛ́ aà pↄnakɛò, aà zɛ ń a luakpamao, aà a zĩ sáaukpa. Lua mɛ́ aà gbà. 19 Ìliↄ làasookɛ a wɛ̃ni gesenawa mↄ̀ↄmↄↄ lↄo, asa Lua mɛ́ yãmàwà ń pↄnao.

<- Làasoode 4 Làasoode 6 ->