Làasoode 3

Yã́pii ń a gↄↄoɛ

1 Yã́pii ń a gↄↄoɛ,

bↄↄlɛ píi ń a kɛgↄↄo.

2 Nɛ'igↄↄ ku, gagↄↄ ku,

pↄ́tↄ̃gↄↄ ku, a wolɛgↄↄ ku.

3 Dɛgↄↄ ku, gbã́gbãgↄↄ ku,

gboogↄↄ ku, a dↄgↄↄ ku.

4 Ɔↄlↄgↄↄ ku, yaalↄgↄↄ ku,

wɛ̃nakɛgↄↄ ku, kↄ̃̀ↄ'ogↄↄ ku.

5 Gbɛkↄlɛgↄↄ ku, gbɛkãaagↄↄ ku,

bↄ̃̀nↄblegↄↄ ku, a zɛgↄↄ ku.

6 Pↄwɛɛlɛgↄↄ ku, a ↄkpaigↄↄ ku,

ↄdidia pↄ́wa gↄↄ ku, a gbaɛa gↄↄ ku.

7 Pↄ́gakɛ̃gↄↄ ku, a namigↄↄ ku,

lɛkpaaũgↄↄ ku, yã'ogↄↄ ku.

8 Yenzigↄↄ ku, zangugↄↄ ku,

zĩkagↄↄ ku, kálɛa aafia gↄↄ ku.

9 Bↄ́ ài zĩkɛna ì e taasi pↄ́ a kɛ̀wai? 10 Ma zĩ pↄ́ Lua dà gbɛ̃nazĩnaↄnɛ aa kɛ è. 11 Lua tò pↄ́pii maa a gↄↄwa. À kua gↄↄpii làasoo dà gbɛ̃nazĩna sↄ̃u lↄ, kási a fↄ̃ yã́ pↄ́ Lua lɛ́ kɛ za dṹnia daalɛa e a midɛawa gbadↄ̃o. 12 Má dↄ̃ kɛ́ pↄe maa ń gbɛ̃nazĩnao dɛ aà kua pↄna guu ń maakɛao aà wɛ̃ni lɛ́ulao. 13 Tó gbɛ̃́ lɛ́ pↄble, àlɛ imi, àlɛ a zĩ píi sáaukpa, Lua mɛ́ aà gbà. 14 Má dↄ̃ kɛ́ yã́ pↄ́ Lua lɛ́ kɛ aↄ ku gↄↄpiiɛ. Wa fↄ̃ pↄe kã́fĩuo, mɛ́ wa fↄ̃ pↄe laouo. Lua kɛ̀ màa, kɛ́ wàↄ a vĩa vĩ yã́iɛ. 15 Pↄ́ pↄ́ kú tia ku za zi kↄ̀, mɛ́ pↄ́ pↄ́ aↄ ku zia ku yãa lↄ. Lua ì yã́ pↄ́ kɛ̀ yãaↄ gbɛsisi.

16 Ma yã́ è dṹniau lↄ:

Gu pↄ́ dɛ yã́zɛde àↄ kuu,

yã́zɛsai mɛ́ kú we,

mɛ́ gu pↄ́ dɛ yãmaa àↄ kuu,

yãvãi mɛ́ kú we.

17 Má ò mazĩawa:

Lua a yã́kpalɛkɛ ń gbɛ̃maaↄ ń gbɛ̃vãiↄ píi,

asa yã́pii ń a gↄↄoɛ,

bↄↄlɛ píi ń a kɛgↄↄo.

18 Má ò ma sↄ̃ guu lↄ: Gbɛ̃nazĩnaↄ ì kɛ màa, Lua a ń yã́wɛ wɛ̃nɛ́, aai dↄ̃ ńzĩawa wa dɛ lán nↄ̀bↄↄwaɛ. 19 Sĩanaɛ, gbɛ̃nazĩnaↄ ń nↄ̀bↄↄ, gó doũ mɛ́ a ń bua. Lá nↄ̀bↄ ì ga, màa gbɛ̃nazĩna ì ga lↄ, an wea doũɛ. Gbɛ̃nazĩna dɛ nↄ̀bↄlao, asa yã́pii pãɛ. 20 Ampii aaì gɛ́ gudoũ, asa ampii aa bↄ̀ bùsutiuɛ, mɛ́ ampii aa ɛa gↄ̃ bùsutipi ũɛ. 21 Tó gbɛ̃nazĩna nisĩna ì ta musu, nↄ̀bↄ pↄ́ ì ta zĩ́lɛn lò, démɛ dↄ̃i? 22 A yã́i tò má è yãe maa ń gbɛ̃nazĩnao dɛ aà a zĩ sáaukpalao, asa aà luakpaman we. Démɛ a to aà dↄ̃ yã́ pↄ́ a mↄ aà kpɛi?

<- Làasoode 2 Làasoode 4 ->