Ikoyã 32

Mↄizi lɛ

1 Musudeↄ, à swã́kpa, mí yã'o,

á gbɛ̃́ pↄ́ á kú zĩ́lɛↄ, à ma yãma.

2 À to ma yãdanɛ kã́fĩakɛɛ́ lán louwa,

à to ma yã'onɛ ɛ̀fãaikɛɛ́ lán fíiwa,

lá sɛ̃ ń láo ì mↄ̀sɛ ewa.

3 Má Dii tↄbↄ.

À zↄ̃ↄkɛ dↄ̃ wá Luaɛ!

4 Gbɛsin aà ũ,

aà yãkɛaↄ wásawasa,

ì yã́pii kɛ a zɛ́waɛ.

Lua náaiden aà ũ, vãie kuwào,

a súsu mɛ́ a maa.

5 Aà gbɛ̃́ↄ yãdↄↄsai kɛ̀ɛ̀,

aa dɛ aà nɛ́ↄ ũ lↄo.

Bui vãi koleaↄnɛ, aa gↄ̃̀ wí sɛa.

6 Màa á fĩabo Diiɛa?

Á sↄũɛ, á ↄ̃nↄ vĩo.

Á Mae pↄ́ á sɛ́n weo lò?

Aàpi mɛ́ á kɛ́, à á zɛ̀dↄ.

7 À làasookɛ yã́ pↄ́ kú za káauↄwa,

à wɛ̃ pↄ́ gɛ̃̀ za ziↄ yãda.

À gbɛa á maeↄwa, aai dau wà siuɛ́,

maezↄ̃ↄↄ mɛ́ aa a galikɛɛ́.

8 Kɛ́ Lua Musude gbɛ̃nazĩnaↄ kpaalɛ̀,

mɛ́ à bui píi bùsu kpàwà,

à ń baade bùsu zↄ̃lɛ iadànɛ́.*

À bùsu kpà Isailiↄwa ń dasilɛu,

9 asa Dii gbɛ̃́ↄ dɛ aà baa ũ,

Yakↄbu buiↄ mɛ́ aà kpaalɛ ũ.

10 À ń lé bùsu giinau,

guwaiwai pↄ́ da pã, wàiↄ ì ↄ́ↄlↄu.

À ↄlìańzi à ń gwá,

à laaidↄ̀má lá a wɛbɛsianawa.

11 Lá kúu ì a sakpɛ vu,

ì yàada a nɛ́ↄla,

màa Dii a gã̀sĩa pòo,

à ń kṹ ń a gã̀sĩa kã́o à ń sɛ́.

12 Dii mɛ́ dↄ̀aanɛ́ ado,

dii zĩ̀loe ↄ ku a guuo.

13 A tò aa bɛ bùsu gulɛsĩↄwa,

ↄ̃ aa buapↄ́ↄ blè.

À ń gwá ń gbɛsi zↄ́'io

ń ku pↄ́ bↄ̀ gu gbɛdeu nísio

14 ń zùkpasa vĩfãaio ń sã kpàsa vĩ'ipuo

ń sãnɛbↄlↄ mɛkpaaↄ ń Basana bùsu sãsakaoↄ

ń pↄ́wɛn maaↄ ń vɛ̃ɛbɛ'i pↄ́ á mì vɛ̃ɛ ũo.

15 Bui maapiↄ mɛ̀kpa, ↄ̃ aalɛ gbá dɛ.

Aa kã̀, aa gbɛ̃̀nɛkũ̀ aa nísi kpà,

ↄ̃ aa pãkpà Lua ń Kɛnazi,

aa sakà gbɛsi pↄ́ dɛ ń Suabana ũ pigu.

16 Aa aà pↄ fɛ̃̀ɛ̀ dii zĩ̀loↄ yã́ musu,

aa tò aà pↄ pà ń tã́a pↄ́ à zàuↄ.

17 Aa tã́aↄ gbàgbaɛ, i kɛ Lua no,†

dii pↄ́ aa ń dↄ̃ yãaoↄ,

aa bↄ̀má dafuɛ,

dii pↄ́ an deziↄ lí vĩakɛnɛ́oↄ.

18 Aa gbɛsi pↄ́ ń í tò we,

Lua dɛ̃ɛkànɛ́, ↄ̃ aà yã́ sã̀ńgu.

19 Kɛ́ Diipi è màa, ↄ̃ à ń bↄlↄbò,

asa aà pↄ pà a nɛgↄ̃ɛↄ ń a nɛnↄɛpiↄziɛ à mɛ̀:

20 Má bↄńkpɛ, mí ń midɛa e,

bui koleaↄn ń ũ, nɛ́ náaisaideↄnɛ.

21 Aa ma pↄ fɛ̀lɛmɛɛ ń pↄ́ pↄ́ dɛ Lua ũoo,

aa tò ma pↄ pà ń tã́aↄ yã́ musu.‡

Má tó bui pↄ́ aa dɛ ma gbɛ̃́ ũoↄ ń pↄ fɛlɛnɛ́,

má tó an pↄ pa bui wɛ́siadeↄ yã́ musu.§

22 Asa ma pↄkũma tɛ́ kà,

mɛ́ tɛ́pi aↄ kũɛ e bɛdau zĩ́lɛ.

Má tɛmↄ dṹniaɛ ń a pↄ́ↄ,

a kũ gbɛ̀sĩsĩ zĩ́naↄwa.

23 Má yã'ĩa kãaańziɛ,

mí a kaↄ zuńzi píi.

24 Imina a káńgu,

Lua i sumá, gagyã i ń dɛdɛ.

Má wàiↄ zĩmá aa ń taitai,

mí mlɛ̃̀ pãsĩnaↄ gbaɛmá aa ń sóso.

25 Wa ń nɛ́ↄ dɛdɛ gãaɛ ń fɛ̃ndaoɛ,

gili i gɛ̃ńgu ń kpɛaↄ guu.

Ɛ̀waasoↄ ń wɛ̃́ndiaↄ gaga ḿpii

ń nɛ́ yↄ̃minaↄ ń maezↄ̃ↄ mikãpuadeↄ.

26 Ma mɛ̀ má ń fãaaɛ,

mí tó an tↄ́ ga dṹniau,

27 ãma ma vĩakɛ̀ an ibɛɛↄ ĩ́andãaɛ.

Aaↄ e wa mɛ́ wà bee kɛ̀,

aa mɛ wa mɛ́ wà zĩblèmá,

i kɛ Dii mɛ́ bee kɛ̀ píio.

28 Isailiↄ yãe dↄ̃o,

bui ↄ̃nↄkɛ̃sãmadeↄnɛ!

29 Tó aa ↄ̃nↄ vĩɛ, aa bee dↄ̃,

aa dↄ̃ gu pↄ́ ń yãkɛaↄ mipɛ̀uńnↄ.

30 Kpelewa gbɛ̃́ mɛ̀ndo tò gbɛ̃ↄn ↄ̀aa sↄo tilɛ̀i?

Kpelewa gbɛ̃ↄn pla gbɛ̃ↄn ↄ̀aa blakwi yài?

Mɛ́ i kɛ Dii pↄ́ dɛ ń gbɛsi ũ ń kpámá bàasio.

31 Asa wá ibɛɛↄ gbɛsi dɛ lán wá gbɛsiwao,

baa ampiↄ aa dↄ̃ ńzĩawa.

32 Aa muaa ń Sↄdↄũdeↄ ń Gↄmↄↄdeↄɛ.

Aa dɛ lán vɛ̃ɛli pↄ́ a nɛ́ dɛ kona ũ

mɛ́ a kↄ́ dɛ gↄ̃i ũwaɛ.

33 An vɛ̃ɛá mlɛ̃̀ sɛwɛɛ

lán kyã́ lɛ́'i pãsĩwa.

34 Dii mɛ̀: Má ń yã́pi kũa ma dↄ̃uo lé?

Má kũ̀kũ ń kã́n'ↄo ma làasiu.

35 Mámɛ má tↄsimá,

mámɛ má fĩabonɛ́.*

Gↄↄewa aa tii guwa,

asa an kaalɛgↄↄ kãikũ̀ɛ,

pↄ́ pↄ́ lɛ́ ń dã́ wãa, àlɛ mↄ́.

36 Asa Dii a yãkɛkɛ ń a gbɛ̃́ↄ,†

i wɛ̃nadↄ̃ a zↄ̀blenaↄnɛ.

Tó a è an gbãa làa,

gbɛ̃e kuo, zↄ ge wɛ̃́ɛ,

37 a mɛ: An diiↄ ku máɛ?

An gbɛsi pↄ́ aa nàaàzi ku má ni?

38 Diipiↄ ń sa'obↄ nísi sò,

aa vɛ̃ɛ pↄ́ aa tↄ̃̀lɛmá mì.

Aa fɛlɛ dↄálɛ sa, aa ↄkuála.

39 Àↄ dↄ̃ tiasa kɛ́ mámɛ má a ũ,

diie kuo, ma bàasio.

Mámɛ mi to wà ga,

mámɛ mi to wàↄ ku,

mámɛ mi gbɛ̃́ kɛ'ĩa,

mámɛ mi ń gbã́gbã.

Gbɛ̃e a fↄ̃ ń bↄ ma ↄzĩo.

40 Ma a ↄ sɛ̀ musu,

má ò ń ma kua gↄↄpiio,

41 tó ma a fɛ̃nda pↄ́ ì tɛkɛ lɛkɛ̀,

mɛ́ má kũa mà yã́kpalɛkɛò,

má tↄsi ma ibɛɛↄwa,

mà fĩabo gbɛ̃́ pↄ́ zamaguↄnɛɛ.

42 Ma kaↄ ga ń auo,

gbɛ̃́ pↄ́ gàↄ ń zĩ̀zↄↄ pↄ́o píi.

Ma fɛ̃nda a gɛ̃ mɛbaasiu

sɛa za ibɛɛ dↄaanaↄwa.

43 Buiↄ, à gulakɛ Dii gbɛ̃́ↄ yã́ musu,‡

asa a a zↄ̀blenaↄ au tↄsi.§

A tↄsi a ibɛɛↄwa,

i a bùsu ń a gbɛ̃́ↄ duuna kɛ̃́má.

44 Mↄizi mↄ̀ ń Nuni nɛ́ Yozueeo, à lɛpi yã́ dàu a sìu Isailiↄnɛ. 45 Kɛ́ Mↄizi lɛpi yã́ sìunɛ́ ḿpii a làa, 46 a ònɛ́: À yã́ pↄ́ má dìlɛɛ́ gbã da á sↄ̃u píi, kɛ́ à e o á nɛ́ↄnɛ aa laaika, aaↄ ikoyãpiↄ kũa píi. 47 Asa a dɛɛ́ yãpã ũo, á wɛ̃niɛ. Tó á yã́piↄ kũa, á gɛ̃gɛ̃ bùsu pↄ́ álɛ bua Yuudɛ̃wa álɛ gɛ́ síi guuɛ.

48 Gↄↄ doũpi zĩ́ Dii yã'ò Mↄiziɛ à mɛ̀: 49 Dɛdɛ Abaliũ gbɛ̀sĩsĩɛ beewa Mↄabu bùsuu la e Nɛbo gbɛ̀sĩsĩ musu bↄaa ń Yelikoo, ní wɛsi Kanaa bùsu pↄ́ málɛ kpá Isailiↄwa aa sílɛ. 50 Ńyↄ̃ ga gbɛ̀sĩsĩ pↄ́ n dɛdɛwàpi musuɛ, ní zu ń deziↄ guu, lá n vĩ̀i Aalona gà Oo gbɛ̀sĩsĩ musu à zù a deziↄ guuwa. 51 Asa n bↄ ma kpɛ Isailiↄ wáa Mɛliba í pↄ́ kú Kadɛsi kĩ́i Zini guwaiwaiuɛ, ni ma kuaadoakɛ dↄ̃mɛɛ ń guuo.*Nao 27.12-14 52 Ayãmɛto ńyↄ̃ bùsupi e kãaaɛ, ńyↄ̃ gɛ̃uo.

<- Ikoyã 31 Ikoyã 33 ->