Ikoyã 27

Yãdilɛa Ebali sĩ̀sĩpↄlɛu

1 Mↄizi ń Isaili gbɛ̃zↄ̃ↄↄ yãdìlɛ ń gbɛ̃́ↄnɛ. Mↄizi mɛ̀: Àↄ yã́ pↄ́ málɛ dilɛɛ́ gbãↄ kũa. 2 Tó a bua Yuudɛ̃wa, a gɛ̃ bùsu pↄ́ Dii á Lua lɛ́ kpáwáu, à gbɛ̀ gbɛ̃̀nɛↄ pɛ́lɛpɛlɛ à soolɛwà, 3 í ikoyãɛ beeↄ kɛ̃wà píi. Tó a gɛ̃ bùsu pↄ́ vĩ ń zↄ́'io diupiu, lá Dii á Lua a lɛgbɛ̃̀ á dezi káauↄnɛwa, 4 à gbɛpiↄ pɛ́lɛpɛlɛ Ebali gbɛ̀sĩsĩwa Yuudɛ̃ baale, lá málɛ daɛ́ gbãwa, í soolɛwà. 5 À Dii á Lua gbagbakĩi bo we ń gbɛo. Ásu gã́pɛlɛ gbɛpiↄwao, 6 à bo ń gbɛ̀ ãsaiↄ,[a] í sa pↄ́ wì a pↄ́ kátɛu à tɛ́kũ o Dii á Luawa we. 7 À sáaukpa sa'o we lↄ, í pↄnakɛ Dii á Lua aɛ. 8 À ikoyãɛ beeↄ kɛ̃ gbɛpiↄwa píi wásawasa.[b]

9 Ɔ̃ Mↄizi ń sa'ona Levii buiↄ ò Isaili buiↄnɛ píi aa mɛ̀: Isailiↄ, à kɛ kílikili! À swã́kpa yãma! A gↄ̃ Dii á Lua gbɛ̃́ↄ ũɛ sa. 10 À Dii á Lua yãma, íↄ aà ↄtondↄkĩi gwa, íↄ zĩkɛ aà yãdilɛa pↄ́ málɛ daɛ́ gbãↄwa.

Láai yã́ↄ

11 Gↄↄ doũpi zĩ́ ↄ̃ Mↄizi yãdìlɛnɛ́ à mɛ̀: 12 Tó a bua Yuudɛ̃wa, buiɛ beeↄ mɛ́ aa zɛ Galiziũ sĩ̀sĩpↄlɛu, aai báaadaágu: Simɛↄ, Levii, Yuda, Isakaa, Yosɛfu, Bɛ̃yãmɛɛ. 13 Buiɛ beeↄ mɛ́ aa zɛ Ebali sĩ̀sĩpↄlɛu, aai láai yã'o: Lubɛni, Gada, Asɛɛ, Zabulↄni, Dã, Nɛfatali. 14 Levii buiↄ aai yã́ɛ beeↄ o Isaili buiↄnɛ píi ń lↄↄ gbãao,[c] aa mɛ:

15 Láaipↄn gbɛ̃́ pↄ́ tã́a ã̀ ge a kàsa,[d] a pɛ̀lɛ asii guu ũ. Dii ye ↄzĩ bee taa gĩyãio. Gbɛ̃́pii i mɛ, ãmi!

16 Láaipↄn gbɛ̃́ pↄ́ a de ge a da kpɛbↄ̀ ũ.[e] Gbɛ̃́pii i mɛ, ãmi!

17 Láaipↄn gbɛ̃́ pↄ́ a gbɛ̃́dee kↄↄ sɛ sↄ̃̀ò ũ. Gbɛ̃́pii i mɛ, ãmi!

18 Láaipↄn gbɛ̃́ pↄ́ tò vĩ̀a zã̀ zɛ́wa ũ. Gbɛ̃́pii i mɛ, ãmi!

19 Láaipↄn gbɛ̃́ pↄ́ yãkɛ̀kɛ bↄ̀mↄ ge nɛtonɛ ge gyaaɛ ↄkpɛai ũ.[f] Gbɛ̃́pii i mɛ, ãmi!

20 Láaipↄn gbɛ̃́ pↄ́ gɛ̃̀ a mae gɛ̃kĩi à wùlɛ ń aà nao ũ.[g] Gbɛ̃́pii i mɛ, ãmi!

21 Láaipↄn gbɛ̃́ pↄ́ pↄtuo dã̀akpà ũ.[h] Gbɛ̃́pii i mɛ, ãmi!

22 Láaipↄn gbɛ̃́ pↄ́ wùlɛ ń a dãeo ũ.[i] Gbɛ̃́pii i mɛ, ãmi!

23 Láaipↄn gbɛ̃́ pↄ́ wùlɛ ń a ã̀nsueo ũ.[j] Gbɛ̃́pii i mɛ, ãmi!

24 Láaipↄn gbɛ̃́ pↄ́ a gbɛ̃́dee dɛ̀ asii guu ũ. Gbɛ̃́pii i mɛ, ãmi!

25 Láaipↄn gbɛ̃́ pↄ́ tàaesaide dɛ̀ gbagusaɛ yã́i ũ. Gbɛ̃́pii i mɛ, ãmi!

26 Láaipↄn gbɛ̃́ pↄ́ i zɛ ń ikoyãɛ beeↄ àlɛ zĩkɛwào ũ.[k] Gbɛ̃́pii i mɛ, ãmi!

<- Ikoyã 26 Ikoyã 28 ->