2 Samuɛli 22

Davidi Dii sáaukpaa a zĩblea yã́ musu

(Soũ 18)

1 Kɛ́ Dii kí Davidi bↄ̀ Saulu ń a ibɛɛ kĩniↄ ↄzĩ, à lɛdà ń Diio 2 à mɛ̀:

Dii mɛ́ ma gbɛsi ũ ń ma zɛgikĩio,

ì ma misi.

3 Ma Lua mɛ́ ma gbɛsi ũ,

mi naaàzi.

Ɔ̃mɛ ma sɛ̀ngbao ũ

ma Suaban gbãa ń ma gulɛsĩo ũ,

ma ulɛkĩi ń ma bↄkĩio ũ,

ì ma si gbɛ̃́ pãsĩↄwa.

4 Dii kà wà aà sáaukpa.

Mi lɛzuaàzi,

ì ma bↄ ma ibɛɛↄ ↄzĩ.

5 Gó kpàlɛmanↄ,

kaalɛ swa lɛ́ ma ble.

6 Mia baↄ galakpàmɛɛ,

ga baikpà ma aɛ.

7 Ma yeelɛa guu ma Dii sìsi,

ma lɛzù ma Luazi,

ↄ̃ à ma yãmà za a bɛ,

ma wii kàwà, à gɛ̃̀ aà swã́u.

8 Tↄↄlɛ lùalua à zĩ̀azĩa,

gbɛ̀sĩsĩↄ dèedee ń zĩ́nau.

Aa lùalua kɛ́ aà pↄ pà yã́i.

9 Súɛlɛ bↄ̀ aà níu,

tɛ́ pↄkaalɛna bↄ̀ aà lɛ́u,

a yↄ̃ↄ lɛ́ pipi aà aɛ.

10 À gu kɛ̃̀aa musu à pìla,

lou sìsi aà gbá zíɛ.

11 Àlɛ vua dia malaika gã̀sĩade kpɛ,

àlɛ yàakpa ń ĩ́anao.

12 À gusia kù azĩala,

à luabɛsiana kɛ̀ a kúkĩ́i ũ.

13 Za aà gawi pílɛau

lou lɛ́ pílɛ pãsĩpãsĩ.

14 Dii pàla za musu,

Lua Musude lↄↄ dↄ louvĩa ũ.

15 À ka fã̀ ma ibɛɛↄgu à ń fãaa,

Lua sùmá à ń yá.

16 Kɛ́ Dii pàlamá,

ísia tↄↄlɛ bↄ̀ gupuau,

kɛ́ à pↄbↄ̀ a níu,

dṹnia zĩ́na bↄ̀ puizi.

17 À ↄbↄ̀ za musu à ma kũ,

à ma bↄ ísiu.

18 À ma si ma ibɛɛ gbãawa

ń ma wɛ̀lɛ pↄ́ an gbãa dɛmalaↄ.

19 Aa ã̀naa ma wɛ̃nakɛgↄↄ,

ↄ̃ Dii zɛ̀manↄ.

20 À ma bↄ à ma gba dɛ̀ɛpookĩi,

à ma mìsi kɛ́ a yemazi yã́i.

21 Dii yãkɛ̀mɛɛ ma nↄ̀sɛmaa lɛ́uɛ,

à fĩabòmɛɛ ma gbãsĩsai lɛ́u.

22 Asa má Dii yã́ kũa,

mi vãikɛ ma a Lua tò weo.

23 Aà ikoyã ìↄ dↄaaamɛɛ píi,

mi bↄ yã́ pↄ́ a dìlɛↄ kpɛo.

24 Ma kua tàae vĩ Diiɛo,

má azĩa kũa duunasai.

25 Dii fĩabòmɛɛ ma maakɛ lɛ́uɛ,

asa a è má kú gbãsĩsai.

26 Ń náai vĩ náaideↄnɛ,

tàaesaiden n ũ tàaesaideↄnɛ.

27 Ń wásawasa gbɛ̃́ wásawasaↄnɛ,

ãma ni kↄ̃nikɛ gbɛ̃́ dↄ̀ↄsaiↄnɛ.

28 Ni zĩabusanaↄ suaba,

ni gbɛ̃́ pↄ́ aaì ńzĩa sɛ lɛsĩↄ busa.

29 Mpi Dii, ḿmɛ ń ma filia ũ,

Dii, ni ma gusia lilɛ gupua ũ.

30 Ń n gbãao má fↄ̃ kuadi kaawa,

ń ma Lua dↄnlɛo má fↄ̃ vĩ gĩa.

31 Luapi sↄ̃, aà yãkɛaↄ bↄ̀lɛi,

Dii yã́ sãa vĩo.

A dɛ sɛ̀ngbao ũ gbɛ̃́ pↄ́ nàaziↄnɛ.

32 Dii bàasio, démɛ Lua ũi?

Wá Lua bàasio, démɛ ulɛkĩi ũi?

33 Lua mɛ́ ì ma gba gbãa,

ↄ̃mɛ ì zɛpoomɛɛ súsu.

34 Ì to ma wá nakũ lán tuewa,

ì to màↄ bɛ bùsu gulɛsĩↄ musu.

35 Ì zĩkaa dadamɛɛ,

e ma gã̀sĩ a fↄ̃ mↄgotɛ̃ sá gá.

36 Ni n zĩblesɛ̀ngbao kpaa,

ni naalɛ ǹ ma tↄbↄ.

37 Ni ma zɛ́ yàasa kũmɛɛ,

ↄ̃ ma gbá lí gbãlɛo.

38 Ma pɛlɛ ma wɛ̀lɛↄzi ma ń bãdɛ̀,

mi kpɛkpao e ma gɛ ma ń dɛdɛò.

39 Ma ń wiwi míↄmiↄɛ, aai e fɛ̀lɛo,

aa kwɛ̀ gↄ̃̀ kálɛa ma gbá zíɛ.

40 N ma gba gbãa ma zĩkàò,

ń tò ma ibɛɛↄ mikpàa.

41 Ń tò ma wɛ̀lɛↄ kpɛkpà,

ↄ̃ ma a zangudepiↄ kàalɛ.

42 Aa wiilɛ̀, gbɛ̃e i ń suabao,

aa lɛzù Diizi, i yãmamáo.

43 Ma ń kɛ́ búɛbuɛ lán bùsutiwa,

ma táa'òmá lán zɛ́ guu pɛ̀lɛawa.

44 N ma bↄ ma gbɛ̃́ pↄ fɛ̀lɛmanↄↄ ↄzĩ,

n ma kɛ buiↄ mide ũ.

Gbɛ̃́ pↄ́ má ń dↄ̃oↄ ì zↄblemɛɛ,

45 bui zĩ̀loↄ ì vlãnaumɛɛ.

Tó aa ma yã'o mà, aaì misiilɛmɛɛ.

46 Buipãleↄ kúsu ì kwɛ́,

aaì bↄ ń zɛgikĩiↄu ń lualuao.

47 Dii ku! Báaaden ma gbɛsi ũ!

Wà Lua ma gbɛsi ma Suabana tↄbↄ!

48 Lua mɛ́ ì tↄsimɛɛ,

ì buiↄ totomɛɛ,

49 ì to mà pili ma ibɛɛↄwa.

N ma gba gbãa dɛ ma wɛ̀lɛↄla,

n ma bↄ gbɛ̃́ pãsĩↄ ↄzĩ.

50 A yã́i tò má ń sáaukpa buiↄnɛ,

má n táasilɛ Dii.*

51 Ì zĩ̀ zↄ̃ↄ ble kí pↄ́ á sɛ̀ɛ,

ì gbɛ̃kɛkɛ kía pↄ́ a kpàpiɛ,

ma Davidi ń ma buiↄ e gↄↄpii.

<- 2 Samuɛli 21 2 Samuɛli 23 ->