1 Zãa 2

1 Ma nɛ́ↄ, málɛ yã́ bee oɛ́, kɛ́ ásu duunakɛo yã́iɛ. Ãma tó á gbɛ̃e duunakɛ̀, wá Zɛnnↄde vĩ Mae Lua kĩ́i tàaesaide Yesu Kilisi ũ. 2 Ɔ̃mɛ wá duuna awakpabↄ ũ.*Lom 3.25 I kɛ wá duuna ado no, dṹnia bṹu gbɛ̃́ↄ pↄ́ɛ.

3 Tó wá yã́ pↄ́ a dìlɛↄ kũa, beewa wá dↄ̃ sĩana kɛ́ wá aà dↄ̃. 4 Tó gbɛ̃́ mɛ̀ á aà dↄ̃, mɛ́ a yã́ pↄ́ a dìlɛↄ kũao, ɛɛdeɛ, ade sĩana vĩo. 5 Gbɛ̃́ pↄ́ aà yã́ kũa sↄ̃, aà yea Luazi papaa sĩanaɛ. Pↄ́ pↄ́ a to wà dↄ̃ kɛ́ wá naawàn kɛ: 6 Gbɛ̃́ pↄ́ mɛ̀ á naawà, sema ade kua àↄ dɛ lá Kilisi ku yãawa.

Yã́ dafu dilɛa

7 Ma gbɛ̃́ yenzideↄ, i kɛ yã́ dafu ma a lakɛ̃̀ɛ́o, yãzi pↄ́ wa dìlɛɛ́ za káauɛ.† Yãzipi mɛ́ Lua yã́ pↄ́ á mà ũ. 8 Ń beeo yã́ pↄ́ málɛ a lákɛ̃ɛ́ dafu lↄɛ, wì a sĩana e aàpi ń ápiↄwa, asa gusia lɛ́ gɛ̃, ↄ̃ gupua sĩande‡ lɛ́ bii sa.

9 Gbɛ̃́ pↄ́ mɛ̀ á kú gupuau, mɛ́ a za a gbɛ̃́deegu, ade ku gusiauɛ e tia. 10 Gbɛ̃́ pↄ́ ye a gbɛ̃́deezi ku gupuau, aà yãe lí tó gbɛ̃e fuo. 11 Gbɛ̃́ pↄ́ za a gbɛ̃́deegu ku gusiauɛ, a bɛ gusiau, a dↄ̃ gu pↄ́ álɛ gɛ́uo, kɛ́ gusiapi aà vĩ̀akũ̀ yã́i.

12 Ma nɛ́ↄ, má láɛ bee kɛ̃̀ɛ́

kɛ́ á duuna kɛ̃̀wá aà tↄ́ yã́ musu yã́i.

13 Maeↄ, ma láɛ bee kɛ̃̀ɛ́

kɛ́ á gbɛ̃́ pↄ́ kú za asĩnizĩpi§ dↄ̃.

Ɛ̀waasoↄ, ma láɛ bee kɛ̃̀ɛ́

kɛ́ a zĩblè Setãuwa.

14 Ma nɛ́ↄ, ma láɛ bee kɛ̃̀ɛ́

kɛ́ á Mae Lua dↄ̃.

Maeↄ, ma láɛ bee kɛ̃̀ɛ́

kɛ́ á gbɛ̃́ pↄ́ kú za asĩnizĩ dↄ̃.

Ɛ̀waasoↄ, ma láɛ bee kɛ̃̀ɛ́

kɛ́ á gbãa mɛ́ á Lua yã́ kũa,

ↄ̃ a zĩblè Setãuwa.

15 Ásu àↄ ye dṹniazio, ge pↄ́ pↄ́ kú a guuↄ. Tó gbɛ̃́ ye dṹniazi, a ye Mae Luazio. 16 Asa yã́ pↄ́ kú dṹnia guu píi, dↄ́ɛ'ĩi ń wɛtonlaao ń àizɛɛ ĩ́andãao, i bↄ Mae Lua kĩ́io, à bↄ̀ dṹnia kĩ́iɛ. 17 Dṹnia lɛ́ gɛ̃ ń a pↄ́ pↄ́ wì a nidɛↄ, ãma luapↄeãkɛna aↄ ku gↄↄpiiɛ.

Kilisi ibɛɛ

18 Ma nɛ́ↄ, gↄↄ gbɛzã wá kuwà. Lá á mà Kilisi ibɛɛ lɛ́ mↄ́, aà ibɛɛↄ dasikũ̀ sa. Beewa wá dↄ̃ kɛ́ wá kú gↄↄ gbɛzãwa. 19 Gbɛ̃́piↄá wá gbɛ̃́ↄ no, a yã́i aa bↄ̀lɛ wá guu. Tó wá gbɛ̃́ↄnɛ yãa dↄ̃ aa kúwanↄ. Aa kɛ̃̀wá kɛ́ wà e dↄ̃ an gbɛ̃e dɛ wá gbɛ̃́ ũo yã́iɛ.

20 Ápiↄ sↄ̃, Lua Nisĩna dìɛ́, ↄ̃ a sĩana dↄ̃̀ ápii. 21 Ma láɛ bee kɛ̃̀ɛ́, kɛ́ a sĩana dↄ̃̀ yã́iɛ, i kɛ á dↄ̃o no. Á dↄ̃ kɛ́ ɛɛe lí bↄ sĩana guuo. 22 Démɛ dɛ ɛɛde ũi? Gbɛ̃́ pↄ́ gì Yesu Mɛsiikɛiɛ. Gbɛ̃́ beeá Kilisi ibɛɛɛ, à gì Mae Luazi ń aà Nɛ́oɛ. 23 Gbɛ̃́ pↄ́ gì Lua Nɛ́zi gì Mae Luazi lↄ. Gbɛ̃́ pↄ́ zɛ̀ ń Lua Nɛ́o zɛ̀ ń Mae Luao lↄ.*Zãa 5.23, 15.23

24 Àↄ yã́ pↄ́ á mà za káau kũa. Tó á yã́ pↄ́ á mà za káaupi kũa, áↄ naa Lua Nɛ́wa ń aà Maeo. 25 Pↄ́ pↄ́ Kilisi a lɛgbɛ̃̀wɛ̃ɛ mɛ́ wɛ̃ni láasai ũ.

26 Ma láɛ bee kɛ̃̀ɛ́ gbɛ̃́ pↄ́ aalɛ á sãsãↄ yã́ musuɛ. 27 Ápiↄ sↄ̃, Nisĩna pↄ́ á è Kilisiwa kú á guu. Á bàa kú ń gbɛ̃e yãdadaaɛ́oo, asa aà Nisĩna lɛ́ yã́pii dadaɛ́, mɛ́ a sĩana vĩ, ɛɛ ku aà guuo. Lá àlɛ dadaɛ́, àↄ naa Kilisiwa màa.

28 Tiasa ma nɛ́ↄ, àↄ naawà àↄ gɛ́, kɛ́ gↄↄ pↄ́ à mↄ̀, wá sↄ̃ iↄ dilɛa. Wá gɛɛ a gↄ̃ kpá wá wɛ́i aà mↄgↄↄo. 29 Lá á dↄ̃ a maa, àↄ dↄ̃ kɛ́ yãmaakɛna píiá aà nɛ́ɛ.

<- 1 Zãa 1 1 Zãa 3 ->