KƆLƐNIDEƆ LÁ SƐ̃IA
Yã́ pↄ́ kú láɛ bee guuↄ
Pↄlu wɛ̃́lɛgɛa gɛ̃̀n plaade guu à kɛ̀ Gɛlɛki wɛ̃́lɛ pↄ́ wì mɛ Kↄlɛni mↄ bao plasaiɛ, ↄ̃ tã́agbagbanaↄ nↄ̀sɛlilɛ aa gɛ̃̀ Yesu gãli pↄ́ a dàalɛ we guu.
Kↄlɛnideↄ lɛ́ namable godↄkĩi pↄ́ kú weↄ yã́i. Gbɛ̃́ↄ lɛ́ laata maamaa, fɛlɛkaayã gbãanɛ́, mɛ́ yãdↄ̃naↄ ń lousisizɛↄ ń wisaiyãↄ di weɛ lↄ. Yã'ĩapiↄ Yesu gãli dafunapi lè, ↄ̃ Pↄlu lɛ́ dɛ̃ɛka à a gbɛ̃́piↄ si yãvãipiↄwa.
Pↄlu taa gbɛa ìↄ Kↄlɛnideↄ bao ĩ́i ma mↄ̀ↄmↄↄ, ↄ̃ à bílikɛ̀ ń yã́wa. Bee mɛ́ tò à lakɛ̃̀nɛ́ e gɛ̃n síiↄ̃. Bibeli lá mɛ̀n plaɛ, mɛ́ à a pãleↄ yã'ò 1Kln 5.9 ń 2Kln 2.3, 7.8 guu lↄ.
Láɛ bee guu fↄkpaamá ń Lua sáaukpaao gbɛa (1.1-9), Pↄlu ònɛ́ aa sùuukɛ, aasu kↄ̃kpaalɛ lↄo (1.10-4.21), aa wisaiyã bↄ ń gãli guu (5), aa kã́mabo ń kↄ̃gbɛaa yã́kpalɛu gbãade luadↄ̃nsaiↄ kĩ́io (6.1-11), aa mikɛ̃ gbãsĩkɛawa (6.12-20). Bee gbɛa à yã́ dasi pↄ́ aa gbɛ̀awaↄ wèwemá:
Nↄsɛa yã́ (lɛɛ 7)
Sa'onↄↄsoa ń lá wa kɛ tã́a yã́ musuo (8.1-11.1)
Nↄɛↄ pↄ́kummusukɛa yã́ ń Dii blɛblea yã́o (11.2-34)
Lua Nisĩna gbaↄ yã́ (12-14)
Gɛↄ vua yã́ (15)
Lápi yã́ mìdɛ ń baoeↄ, gbɛ̃́ↄ kámasa pↄ́ wàlɛ ká ń yã́ pↄ́ Pↄlu a zɛkàlɛↄ ń fↄ pↄ́ a kpàkpamáↄ (16).
Kua dṹnia guu yã'ĩapiↄ musu píi, Pↄlu lɛdàmá an bɛ̃̀ɛbosai. À ↄlↄnɛ́ lá Kilisi náaikɛa ì tó gbɛ̃́ bↄ yã́piↄ guu. Yeakↄ̃zi mɛ́ dɛ a píia (13).

Pↄlu fↄkpaa Kↄlɛnideↄwa

1 Mámɛmaa Pↄlu, Lua ma sisi à ma sɛ a pↄeãwa, ma gↄ̃ Kilisi Yesu zĩna ũ. Mapi ń wá gbɛ̃do Sↄsɛnio, 2 wámɛ wa láɛ bee kɛ̃̀ Lua gãlide pↄ́ kú Kↄlɛniↄnɛ.* Lua á sisi a gↄ̃ a gbɛ̃́ↄ ũ, á kua adoa naa Kilisi Yesuwa ń gbɛ̃́ pↄ́ ìↄ wá Dii Yesu Kilisipi sisi gupiiuↄ, wá Dii doũdeↄ. 3 Lua wá Mae ń Dii Yesu Kilisio gbɛ̃kɛkɛɛ́, aai á gba aafia.

4 Miↄ Lua sáaukpa gↄↄpii á yã́ musu gbɛ̃kɛ pↄ́ a kɛ̀ɛ́ á naa Kilisi Yesuwa yã́i. 5 Á naawà guu pↄ́pii kã̀fĩɛ́, yã'oa píi ń dↄ̃a píio, 6 asa wá Kilisi yã'oaɛ́ zɛ̀dↄ á guu, 7 ↄ̃ Lua Nisĩna gbae i kɛ̃́sãwáo, gↄↄ pↄ́ á wɛ́ dↄ wá Dii Yesu Kilisi mↄai. 8 Wá Dii Yesu Kilisipi a to à zɛ gbãa e a lɛ́wa, íↄ ku tàaesai aà mↄgↄↄ. 9 Lua náai vĩ. Ɔ̃mɛ á sisi à gbɛ̃́kpa ń a Nɛ́ Yesu Kilisi wá Diio.

Kↄlɛni Yesudeↄ kↄ̃kpaalɛa

10 Gbɛ̃́ↄ, ma awakpàɛ́ ń wá Dii Yesu Kilisi tↄ́o, àↄ lɛdoũ vĩ ń kↄ̃o ápii, kɛ́ kↄ̃kpaalɛa e láa á guu, í nakↄ̃wa ń làasoo doũo ń nↄ̀sɛmɛndoo. 11 Má mà Koloe gbɛ̃́ↄ kĩ́i, yãkele kú á guu. 12 Lá má màn kɛ: Á gbɛ̃eↄ mɛ̀ wà zɛ̀manↄ. Gbɛ̃eↄ mɛ̀ wà zɛ̀ ń Apolooo.† Gbɛ̃eↄ mɛ̀ wà zɛ̀ ń Piɛɛo. Gbɛ̃eↄ mɛ̀ wà zɛ̀ ń Kilisio. 13 Kilisi kpaalɛa yã̀? Wà ma paliwa á yã́ia? A da'ilɛkɛ̀ ń ma tↄ́o yã̀? 14 Ma Lua sáaukɛ̀, kɛ́ mi á gbɛ̃e da'ilɛkɛo, sema Kilisipu ń Gaiusio bàasio.‡ 15 Lá màaɛ, gbɛ̃e a e o a da'ilɛkɛ̀ a gↄ̃ ma ìwa ũo. 16 Ao, ma Sefana bɛdeↄ da'ilɛkɛ̀ lↄ. Bee bàasio, tó ma gbɛ̃pãle da'ilɛkɛ̀, a dↄmagu lↄo. 17 Kilisi i ma zĩ gbɛ̃́ da'ilɛkɛa yã́io, sema a bao kpàwakɛaɛ. I kɛ ń yãdↄ̃o no, kɛ́ aà gaa líwa su kɛ famao yã́iɛ.

Ɔ̃nↄ búina ń ↄ̃nↄ sĩanao

18 Kilisi gaa líwaá mìsaiyãɛ gbɛ̃́ vũaaaↄnɛ. Wá gbɛ̃́ pↄ́ Lua lɛ́ wá suabaↄ sↄ̃, a dɛwɛ̃ɛ aà gbãa ũ. 19 A kɛ̃a Lua taalau wà mɛ̀:

Má ↄ̃nↄnaↄ ↄ̃nↄ midɛ,

má wɛzɛ̃naↄ wɛzɛ̃ suumpa.§

20 Ɔ̃nↄna ku máɛ? Ladↄ̃na ku máɛ? Dṹnia tiaɛ bee yã́piidↄ̃na ku máɛ? Lua i dṹnia ↄ̃nↄ dilɛ mìsaiyã ũo lé?* 21 Lua ↄ̃nↄ guu, i to dṹnia gbɛ̃́ↄ a dↄ̃ ń ńzĩa ↄ̃nↄoo. À kàaàgu à gbɛ̃́ pↄ́ aalɛ a náaikɛↄ suaba waaso pↄ́ wa dìlɛ mìsaiyã ũpi musu. 22 Yudaↄ ye dabudabui, Gɛlɛkiↄ ì ↄ̃nↄ wɛɛlɛ, 23 wápiↄ sↄ̃, Kilisi gaa líwa kpàwa wi kɛ, ↄ̃ Yudaↄ ì fuwà, buipãleↄ ì mɛ mìsaiyãɛ, 24 ãma gbɛ̃́ pↄ́ Lua ń sisi à ń sɛ́ↄ, Yudaↄ ń Gɛlɛkiↄ píi, Kilisi dɛnɛ́ Lua gbãa ń a ↄ̃nↄo ũ. 25 Lua yã́ pↄ́ dɛnɛ́ mìsaiyã ũpi dɛ gbɛ̃nazĩna ↄ̃nↄla. Lua yã́ pↄ́ dɛnɛ́ gbãasaiyã ũpi dɛ gbɛ̃nazĩna gbãala.

26 Gbɛ̃́ↄ, à gwa lá á dɛ gↄↄ pↄ́ Lua á sisi. Dãↄ kĩ́i á daside ↄ̃nↄna ũo, á daside gbãade ũo, á daside kíabui ũo. 27 Lua gbɛ̃́ pↄ́ dɛ dṹniaɛ mìsaide ũↄ sɛ̀, kɛ́ à wida ↄ̃nↄnaↄwaɛ. À gbɛ̃́ pↄ́ dɛ dṹniaɛ gbãasaide ũↄ sɛ̀, kɛ́ à wida gbãadeↄwaɛ. 28 À gbɛ̃́ pↄ́ dṹnia ń dílɛ kpɛɛ, ì sakáńgu an yã́ líↄ kuoↄ sɛ̀, kɛ́ à gbɛ̃́ pↄ́ an yã́ ìↄ kuↄ kpa kpɛɛ. 29 Màa gbɛ̃e a e lí ĩ́anadã Lua aɛo. 30 Ápiↄ sↄ̃, Lua tò á naa Kilisi Yesuwa, ↄ̃ à gↄ̃̀ wá ↄ̃nↄ ũ. Naa Kilisipiwa Lua tò yã́ bↄ̀wanↄ na, wá kua adoa mɛ́ à wá suabà. 31 Ayãmɛto lá a kɛ̃a láuwa, tó gbɛ̃́ ye ĩ́anadã, aà dã Dii yã́ musu.†Zel 9.23

1 Kↄlɛnideↄ 2 ->