1 Lada 11

Davidi kpaa Isailiↄ kpalau

(2Sam 5.1-10)

1 Isailiↄ mↄ̀ Davidi kĩ́i ḿpii Hɛblↄ̃ aa mɛ̀: Wá au doũɛ. 2 Za zi, baa gↄↄ pↄ́ Saulu dɛ kía ũ, ḿmɛ ni dↄaawɛ̃ɛ zĩlau gɛa ń suao. Ɔ̃ Dii n Lua ònɛ ḿmɛ ńyↄ̃ↄ dɛ a gbɛ̃́ Isailiↄ dↄaana ũ, an kía ũ. 3 Kɛ́ Isaili gbɛ̃zↄ̃ↄↄ mↄ̀ kí Davidi kĩ́i Hɛblↄ̃ ḿpii, we à lɛdoũkɛ̀uńnↄ Dii aɛ, ↄ̃ aa nísikà aà miwa aa aà kpà Isailiↄ kpalau, lá Dii dà Samuɛliɛ a òwa.

4 Davidi ń Isailiↄ tↄ̃̀u Yelusalɛũ pↄ́ wì mɛ lↄ Yebusi*Dↄa 1.21 ḿpii. Ɔ̃ Yebusideↄ 5 ò Davidiɛ: Ńyↄ̃ gɛ̃ lao. Ń beeo Davidi wɛ̃́lɛ bĩ́ide pↄ́ wì mɛ lↄ Siↄnapi sì, ↄ̃ à gↄ̃̀ aà wɛ̃́lɛ ũ. 6 Gↄↄ bee Davidi mɛ̀: Gbɛ̃́ pↄ́ dↄ̀aa lɛ̀lɛ Yebusideↄwa káau mɛ́ a gↄ̃ zĩgↄ̃ↄ swana ũ, an gbɛ̃zↄ̃ↄ ũ. Zeluia nɛ́ Yoabu mɛ́ gɛ̀ káau, ↄ̃ à gↄ̃̀ ń swana ũ. 7 Davidi bɛkpà wɛ̃́lɛ bĩ́idepiu, ↄ̃ wà tↄkpàɛ̀ Davidi Wɛ̃́lɛ. 8 À kpɛ́ↄ dↄ̀dↄ lìai za gu pↄ́ wà Milo ɛ kàka ń bùsuo e a bĩ́iwa, mɛ́ Yoabu wɛ̃́lɛpi gu pↄ́ gↄ̃̀ↄ kɛ̀kɛ. 9 Davidi gbãa lɛ́ dɛdɛɛ, asa Dii Zĩgↄ̃de kuaànↄɛ.

Davidi nɛgↄ̃naↄ

(2Sam 23.8-39)

10 Davidi nɛgↄ̃naↄ kíaↄ yã́n kɛ. Ampiↄ ń Isailiↄ píi aa zɛ̀aànↄ aà kíakɛ yã́ musu. Aa aà kpà Isailiↄ kía ũ lá Dii òwa. 11 Davidi nɛgↄ̃napiↄ tↄ́n kɛ: Akemↄ gbɛ̃́ Yasↄbaũ mɛ́ nɛgↄ̃n tↄde gbɛ̃ↄn àaↄ̃ↄ swana ũ. Aàpi mɛ́ sↄ̃na sɛ̀ gbɛ̃ↄn ↄ̀aa do ń basↄoↄzi, à ń zↄ̃zↄ̃ò píi gↄↄdoũzĩ.

12 Aà gbɛa Dodai nɛ́ Ɛleazaa, Ahoa gbɛ̃́ kú nɛgↄ̃n gbɛ̃ↄn àaↄ̃piↄ guu lↄ. 13 A kú ń Davidio gↄↄ pↄ́ Filitɛ̃ↄ kã̀aa aa zĩkà Pasadamiũ. Isailiↄ pↄ̀ↄbↄzãkɛ̀ gu pↄ́ naa bú kúu. 14 Aàpi ń a gbɛ̃́ↄ aamɛ zɛ̀ wà gì búpi guoguo. Aa Filitɛ̃ↄ dɛ̀dɛ, ↄ̃ Dii tò aa zĩ̀ zↄ̃ↄ blè gↄↄ bee.

15 Nɛgↄ̃n gbɛ̃ↄn baakwiↄ guu, gbɛ̃ↄn àaↄ̃ↄ mɛ́ bↄ̀ gɛ̀ Davidi kĩ́i Adulaũ gbɛ̀'ɛu. Filitɛ̃ↄ gãli bòo kálɛa Lefai guzulɛu. 16 Gↄↄ bee Davidi ku sɛ̃gbãu mɛ́ Filitɛ̃ gudↄ̃anaↄ ku Bɛtɛlɛũ. 17 Davidi lɛ́ a bɛ í nidɛ à mɛ̀: Démɛ a gɛ́ Bɛtɛlɛũ bↄlɛ lↄ̀ↄ'i tↄ́imɛɛi? 18 Ɔ̃ gbɛ̃ↄn àaↄ̃piↄ gɛ̀ gɛ̃̀ Filitɛ̃ↄ bòou, aa Bɛtɛlɛũ bↄlɛ lↄ̀ↄpi í tↄ̀ sùò Davidiɛ. Ɔ̃ i we mìo, a tↄ̃̀lɛ Diiɛ sa'o'i ũɛ. 19 À mɛ̀: Kai ma Lua, má fↄ̃ íɛ bee mio. Gbɛ̃́ pↄ́ aa gì ń wɛ̃niiↄ auɛ! I we mìo. Nɛgↄ̃n gbɛ̃ↄn àaↄ̃piↄ yãkɛan we.

20 Yoabu dãuna Abisai mɛ́ nɛgↄ̃n gbɛ̃ↄn baakwipiↄ swana ũ. Aàpi mɛ́ sↄ̃na sɛ̀ gbɛ̃ↄn ↄ̀aa do ń basↄoozi à ń dɛdɛ, ↄ̃ à tↄbↄ̀ gbɛ̃ↄn baakwipiↄ guu. 21 À tↄbↄ̀ dɛ nɛgↄ̃n gbɛ̃ↄn àaↄ̃piↄla, ↄ̃ à gↄ̃̀ ń dↄaana ũ, kási a ku nɛgↄ̃n tↄde gbɛ̃ↄn àaↄ̃piↄ guuo.

22 Yoiada nɛ́ Benaia, Kabazee gbɛ̃́á zĩ̀kan wↄ́ↄdeɛ. Aà yãkɛaↄ dasi. À Mↄabu nɛgↄ̃n tↄdeↄ dɛ̀ gbɛ̃ↄn pla. À gɛ̃̀ ɛ guu gↄↄ pↄ́ lougbɛ kwɛ̀, à nↄ̀ↄmusu dɛ̀u. 23 À Egipi gbɛ̃́ pↄ́ a gbã̀a kà gã̀sĩsuu sↄo dɛ̀. Egipi gbɛ̃́pi sↄ̃mpa dɛ lán zwã̀atãn àsaliwaɛ, ↄ̃ Benaia sↄ̃̀aàzi ń goo, à aà sↄ̃napi sìwà à aà dɛ̀ò. 24 Yoiada nɛ́ Benaia mɛ́ yã́piↄ kɛ̀, ↄ̃ à tↄbↄ̀ nɛgↄ̃n gbɛ̃ↄn baakwipiↄ guu. 25 À tↄbↄ̀ dɛ nɛgↄ̃n gbɛ̃ↄn baakwipiↄla, kási a ku nɛgↄ̃n tↄde gbɛ̃ↄn àaↄ̃piↄ guuo. Ɔ̃ Davidi aà dìlɛ a dↄaiↄ gbɛ̃zↄ̃ↄ ũ.

26 Nɛgↄ̃napiↄ tↄ́n kɛ:

Yoabu dãuna Asaɛli,

Dodo nɛ́ Ɛlana Bɛtɛlɛũ gbɛ̃́,

27 Alodi gbɛ̃́ Samↄ,

Peloni gbɛ̃́ Ɛlɛzi,

28 Tekoa gbɛ̃́ Ikesi nɛ́ Ila,

Anato gbɛ̃́ Abiɛzɛɛ,

29 Usa gbɛ̃́ Sibekai,

Ahoa gbɛ̃́ Ilai,

30 Nɛtofa gbɛ̃́ Malai,

Nɛtofa gbɛ̃́ Baana nɛ́ Ɛlɛbu,

31 Gibɛa pↄ́ kú Bɛ̃yãmɛɛ bùsuu gbɛ̃́ Libai nɛ́ Itai,

Pilatↄ̃ gbɛ̃́ Benaia,

32 Gaasi guzulɛ gbɛ̃́ Idai,

Alaba gbɛ̃́ Abiɛli,

33 Bauliũ gbɛ̃́ Azemavɛ,

Saaleboni gbɛ̃́ Ɛliaba,

34 Gizoni gbɛ̃́ Asɛũ nɛgↄ̃ɛↄ,

gusĩsĩde gbɛ̃́ Sage nɛ́ Yonatãa,

35 gusĩsĩde gbɛ̃́ Sakaa nɛ́ Ahiaũ,

Ulu nɛ́ Ɛlifala,

36 Mɛkɛla gbɛ̃́ Efɛɛ,

Peloni gbɛ̃́ Ahia,

37 Kaamɛli gbɛ̃́ Ɛzɛlo,

Ɛzɛbai nɛ́ Naalai,

38 Natã dãuna Yoɛli,

Ageli nɛ́ Mibaa,

39 Amↄni bui Zɛlɛki,

Beelo gbɛ̃́ Naalai, Zeluia nɛ́ Yoabu zĩkabↄkũna,

40 Yɛtɛɛ buiↄ Ila ń Galebuo

41 Iti bui Uli,

Alai nɛ́ Zabada,

42 Siza nɛ́ Adina, Lubɛni buiↄ swana

ń a gbɛ̃́ↄ gbɛ̃ↄn baakwi.

43 Maaka nɛ́ Anana,

Miti gbɛ̃́ Yosafa,

44 Asalo gbɛ̃́ Uzia,

Aloee gbɛ̃́ Otaũ nɛgↄ̃ɛↄ Sãma ń Yeiɛlio,

45 Simɛli nɛ́ Yediaɛ

ń a dãuna Yoha Tizi gbɛ̃́o,

46 Maava gbɛ̃́ Ɛliɛli,

Ɛlinaaũ nɛgↄ̃ɛↄ Yelibai ń Yosaviao,

Mↄabu gbɛ̃́ Itamaa,

47 Ɛliɛli ń Ɔbɛdio

ń Mɛzobi gbɛ̃́ Yaasiɛo.

<- 1 Lada 10 1 Lada 12 ->