Hibru
I Sulat di Dad To Hibru
Kafaglabat gablà di sulat di dad to Hibru
Landè gmadè ku simto smulat i sulat ani. Kabay gadè i dad to i gusmulat dun, dunan i dad to Dyu tafaglut di ku Dyisas Krayst.
Na di bang ksulat i sulat ani, too sasè kaflayam i dad to faglut, na dademe fnati mdà di kafaglutla di ku Dyisas. Na dademe dad to Dyu tafaglut, fan ale tmagak i kafaglutla na samfulê di muna fnaglutla, du là ale gmagan tmayud i kaflayam mdà di dad demela Dyu là faglut.
Taman i sulat libru Hibru ani gfebe di dad to Dyu faglut ku Dyisas, du fye tangal i nawala, na tamdò di dale i too glut fnaglut, dunan Dyisas, ise i dale fnaglut dunan i kimenla dad flalò. Dini gumitela kibò Dyisas smikof i fnaglut i dad Dyu, fagu di sangal dsù i gamwè dad salà, dunan dsuan i kton di kfatin di krus, na di kfatin landè nan gukmamu i dademe dsù i dad to. Na i smulat i libru ani tmulen dale i kdee lalòla di muna alò alung i nimò Krayst di dale fagu di kfatin, ktékan, na kasfuléan di langit. Na Dyisas Krayst, Tingà Dwata, kenen mdatah fa di kdee.

I kafgadè Dwata i tnaluan fagu di ku Dyisas

1 Di muna fa, dee dulê na dee kibò Dwata fgadè i tnaluan di dad gutambulito Dyu fagu di dad tugadan. 2 Kabay di fulé ani fgadè Dwata i tnaluan di gito fagu di Tingaan Dyisas Krayst. Na fagu di kenen, mgimò Dwata i kdee na kenen gumlén dun. 3 Na teenito di kenen i bong kneng i kafye Dwata, du salngad kenen di Dwata. Na fagu di bong eneg i taluan nagotan i kdee tamgimoan. Na di kafalwaan gito di dad salaito fagu di kfaloh i litean, samfulê kenen di langit, na sudeng gsen di kwanan Dwata i Harì Too Mdatah.

I Tingà Dwata mdatah fa di dad kasaligan

4 Taman mbaling kenen mdatah fa di dad kasaligan Dwata. Na du dnagit Dwata Dyisas Tingaan, fgadean na Dyisas mdatah fa di dad kasaligan. 5 Du là lmen gman Dwata di satu kasaliganan,

“Ge tingàgu,

na di duh ani fgadègu agu i maam.”[a]

Na là lmen gman Dwata di kasaliganan,

“Ge i tingàgu,

na di duh ani tafdatahta ge du tafgadègu agu i maam.”

6 Na lêman, di tafan kdek Dwata i tingaan, i too mdatah di kdee dini di tah tanà, manan gablà di kenen, manan,

“Fye ku too mangamfù i kdee dad kasaligangu di kenen.”

7 Kabay i gman Dwata gablà di kasaliganan, manan,

“Dekam i nus fgadè i knayeam salngad i kasaliganam;

na i lifoh na silà nimoam dad saligam.”[b]

8 Kabay ani gman Dwata gablà di Tingaan, manan,

“Ge Dwata, na i kagotam kel di landè sen,

na i kagotam too matlu.

9 I knayeam i matlu nimò, na i knangam i sasè nimò,

taman agu Dwata, dunan Dwatam, fdatahta ge mdatah fa di dad demem,

na blégu ge bong klehew.”[c]

10 Na manan fa di Tingaan, manan,

“Amu, di katbuan, ge sa mimò i tanà ani,

na mdà di kmalam nimoam i langit na kdee mnè ditù.

11 Na balù di fulé duh i tanà na langit mbaling ale landè, bay ge fadlug fa kel di landè sen,

na i tanà na langit salngad i klaweh malmo ku talabi.

12 Gambet i saul maglulun, nlulunam kadang i langit na tanà,

na tanlasam ale.

Kabay ge là mgili,

bay mto ge kel di landè sen.”

13 Là lmen man Dwata di satu kasaliganan,

“Fagotgu ge i kdee, taman sudeng ge dini gsen di kwanangu,

na teenam kadang i kagfisangu dad dmuen ge,

na i kafkahgu dale di dungan i falel bliam.”[d]

14 Taman, gablà di dad kasaligan, alò ale lifan Dwata. Na laito ale fakay teen, bay dekan ale, du fye tmabeng gito dad faglut i gumlé Dwata i kagalwà mdà di kaflayam landè gusenan.

Hibru 2 ->