1-2 Kafnge én, fagin Dyosif lime di dad flanekan, na salu ale ditù di harì. Man Dyosif di kenen, “Takel nan i màgu na dad flanekgu mdà di Kanaan, gagin di dale dad bilibilila na dademe dad lmanafla na i kdee dad nfunla. Na déén ale nan di Gosén.”

Kagmanan ani, neben i dad lime flanekan di muna i harì. 3 Na snalek ale Faraon, “I tan i galyu nimò?”

Na tmimel ale, “Amu, gami i dad lifanam, gal gami mifat dad bilibili, salngad i tamgimò i dad gutambulmi di muna. 4 Salu gami dini du kayèmi moon flo mnè dini, du too sasè i kbitil di banwe Kanaan, du balù i dad lmanafmi landè gumtebla nan. Na taman ku beg fakay di ge, gami dad lifanam, begam gami fnè di Gosén.”

5 Na man i harì di ku Dyosif, “Too fye du takel nan i maam na i dad flanekam. 6 Na du ge i magot i klamang banwe Idyif, fneam ale di Gosén, du nun too fye tanà ditù. Na ku nun dad to di dale too fulung mifat dad lmanaf, fifatam ale i dad lmanafgu.”

7 Kafnge én, nebe Dyosif i maan Dyékob di muna Faraon. Na dmasal Dyékob fye banlé Dwata kafye Faraon. Na di kdasal Dyékob ku Faraon, 8 snalek i harì, “Man, tan i ktuam?” 9 Na tmimel Dyékob, manan, “Tamlatu tlu falò i klogu lamngab di dademe banwe. Là dee i dad faligu, bay i too malima gal i gnagugu. Kabay i dad faligu là fa gasngad di kdee fali i kalngab i dad gutambulgu di muna fa.” 10 Na lêman dmasal Dyékob, fye banlé Dwata kafye Faraon, na kafdu én, mdà kenen di muna i harì. 11 Na fnè Dyosif i maan, na dad flanekan, di banwe Idyif. Na i tanà blén dale too fye tanà na mdadong di syudad dnagit Ramases, du kdee ani dek Faraon ku Dyosif. 12 Na banlé Dyosif knaan i maan na dad flanekan, na i dad kdee dad malay i maan, gakuf i kdee dad ngàla.

13 Na i kbitil ani too sasè, i duenan du landè kakaan i dad to, du i kdee banwe, landè là nagu i bong bitil. Taman i dad to di Idyif na Kanaan mbaling ale mlungay di kbitilla. 14 Santifun Dyosif i kdee filak bayad i dad to di Idyif na Kanaan i falila, na tundan i filak ani, ditù di bong gumnè Faraon. 15 Na di takti i filak i dad to di Idyif na Kanaan, salu i dad to di Idyif di ku Dyosif, na manla di kenen, “Begam gami banlé fali, du fan gami mati malnus. Tnabengam gami, du landè nan beg filakmi.”

16 Na tmimel Dyosif, manan, “Ku talandè nan filakyu, nebeyu dini i dad lmanafyu, du én i bayadyu fali.” 17 Taman nebela i dad lmanaf di ku Dyosif, na bnayadan fali i dad kudàla, dad bilibilila, dad kambingla, dad bakala, na i dad dongkila. I kdee dad lmanafla bléla du bayadla fali, tì salfang di fali én. 18 Kabay di tmadol fali, lêman ale salu di ku Dyosif, na manla, “Amu, làmi buni dun di ge i tatoo mti nan beg i filakmi, na dad lmanafmi, du tage sa i mfun. Taman, talandè nan fakaymi blé di ge galwà alò i lawehmi na tanàmi. 19 Tabyà kandom gami na tnabengam, du fan gami mati malnus, na fan malmo i tanàmi. Begam bnayad fali i lawehmi na i tanàmi. Du tatì gami nan beg flifan di harì, na kenen nan mfun i tanàmi. Banlém gami fali, du fye là gami beg mati, na léam gami banlé bnê flami, du fye i tanàmi là malmo.”

20 Kafnge én, bnayad Dyosif i kdee tanà di Idyif kene harì. Kdee i dad to di Idyif bléla i tanàla, du too sasè i kbitil, taman i kdee tanà déén tanfun i harì. 21 Na i dad to di klamang banwe Idyif, salig nan Dyosif di harì, du mbaling ale dad lifanan. 22 Kabay i tanà nfun i dad mebe i dad to mangamfù di duh di Idyif, là bnayad Dyosif. Làla blé i dale tanà, du gal ale nifat Faraon du galan ale banlé filak.

23 Na man Dyosif di dad to, “Du tabnayadgu gamu na i dad tanàyu di harì, blégu gamu i bnê flayu. 24 Ku gafat kadang i faliyu, sansalelyu di lime na satu kene harì, na di fat alel gamu sa mfun dun, du gumwèyu bnê lêyu fla, na i dademe knaanyu na lê knaan i dad malayyu.” 25 Na tmimel i dad to “Amu, du mdà di ktabengam gami, là gami nan mati. Too fye i mgimoam di gami. Na tamgimò gami nan lifan Faraon.”

26 Na én flalò Dyosif i dad to di Idyif, di bang kgafat i falila sansalel i gwèla di lime alel, na i satu alel toola blé di harì. Na kel i ani fa toola nimen i flalò ani. Alò i tanà i dad mebe i dad to mangamfù di duh i là gfun i harì.

27 Na i dad bel Dyékob, i satu dagitan Israél, tamnè di banwe Gosén di Idyif, na matnù i nfunla, na too ale mbel. 28 Na sfalò fitu fali i klo Dyékob mnè ditù di Idyif, kel di mlatu fat falò fitu falin. 29 Na di kakel i bang fan nan kenen mati, fatlon i tingaan Dyosif, na manan di kenen, “Ku kandom agu, fkaham i falelam di dungan i fuadgu, fye gadègu dnohoam i fnigu di ge. Makang ge di deg ku nangam agu lbang dini di Idyif. 30 I kayègu baling, ku ditù gulambangam deg di saféd i dad gutambulgu. Taman di kfatigu nebem i lawehgu di gulambangla.”

Na man Dyosif, “Hae Mà, toogu nimò i knayeam.” 31 Man Dyékob, “Makang ge di deg toom dnohò i knayègu.” Taman makang Dyosif. Kafnge én, déén di gumilean kudung Dyékob na dnayenan Dwata.

<- Dyénésis 46Dyénésis 48 ->