1 Na talà nan gadnan Dyosif i nawan, taman fdaan i kdee i dad saligan, du fye landè di dale mite kenen. Landè dademe to déén di bang fgadè Dyosif i kton di dad flanekan. 2 Na too kamwak Dyosif, taman linge i dad to di Idyif ditù di lwà, na nun tmulen di dad to di gumnè i harì.

3 Na man Dyosif di dad flanekan, “Agu sa Dyosif i flanekyu! Too glut kè mto fa Mà?”

Kabay di kaklinge i dad flanekan ani, làla gtimel Dyosif, du too sasè klikòla. 4 Na man Dyosif, “Dini gamu, fdadong gamu di deg.” Na kagdadongla di kenen, manan di dale, “Agu sa flanekyu Dyosif i fabliyu di muna fa, di dad to sbayad, na tamgebe dini di banwe Idyif. 5 Na nangyu fsamuk i nawayu, na nangyu banlé salà i ktoyu di kafabliyu dagu, du Dwata sa febe deg dini muna di gamu, du fye là gamu mati malnus. 6 Hae, du tlabo galwe fali i kbitil ani, na nun fa lime fali landè ulê i dad fla. 7 Dwata sa febe deg muna dini, na too bong tabengan gamu, du kayean ku là gamu mati malnus, du fye fadlug ito fa mbel di tah tanà.

8 “Ise sa gamu, bay Dwata febe deg dini. Dwata mlé di deg i mdatah glal, i glal gamtadol di harì. Agu sa gal mdek i kdee dad to i harì, na agu i magot i klamang banwe Idyif. Slame ani gablé Dwata dagu. 9 Na faflal gamu mulê di màgu, na ani manyu kenen, ‘Ani i man i tingaam Dyosif, tafagot Dwata deg i klamang banwe Idyif. Mà, faflal ge salu dini di deg. 10 Fnèta ge dini di banwe Gosén, du fye kdeeyu mdadong di deg, balù ge, dad ngaam, na i dad fuam, na i dad kambingam, i dad bilibilim, i dad bakam, na i kdee nfunam. 11 Na agu sa mifat gamu ku dini gamu di Gosén. Du nun fa lime fali gdè kbitil ani, na kayègu ku dini ge mdadong di safédgu, du fye ge, na dad malayam, na i dad lmanafam là mati di kalnus.’ Ani i manyu kadang di ku Mà.” 12 Na fadlug talù Dyosif di dale, manan. “Na i kdeeyu dad twegegu, na lê ge Bénhamin, tateenyu agu, na tadilèyu agu sa Dyosif i talù di gamu. 13 Taman, tooyu tulen ku Mà gablà di kdatah glalgu dini di Idyif, na gablà di kdee teenyu dini. Na faflal gamu mulê na faginyu kenen dini.”

14 Na di kagmanan ani, lkaf Dyosif i twalin Bénhamin na mngel, na lê mngel Bénhamin di kalkafan kenen. 15 Kafnge én, nkatan nalak i dad flanekan, na mngel di slengan lamkaf dale. Kafnge én, tambù ale stulen di kenen. 16 Na di takgadè i dad to ditù di bong gumnè i harì, takel nan i dad flanek Dyosif, lehew Faraon na i dad dademe ganlalan. 17 Na man Faraon ku Dyosif, “Dekam i dad flanekam flulenla i dad dongkila na mulê di Kanaan, 18 du fye fngéla i maam na i dad malayla na samfulê dini, du blégu dale i too fye tanà dini di Idyif, na gamkaan ale kadang i fye kakaan.

19 “Na léam ale banlé i dademe dad kaditon mdà di Idyif, du fye nun gusmakay i dad ngàla na dad yaanla. Na toom fngé dale i maam. 20 Manam dale, nangla fsamuk i nawala gablà i kandeenla tagakla kadang, du banlégu ale kadang i too fye di Idyif ani.”

21 Na kdee i gman harì ani nimen i dad ngà Dyékob. Banlé ale Dyosif i dad kaditon, du ani i dek i harì di kenen, na léan banlé i bnatula di dalan. 22 Banlén kat satu dale falami klaweh gumilila, bay banlén Bénhamin tlu latu salafì filak di dale, na lime klaweh gumilin. 23 Na fneben i maan sfalò dongki i gumlulen i too fye di Idyif, na léan fnebe sfalò dademe dongki slame libun gumlulen i bong fali trigu na fan, na i dademe fa gkaan, du bnatula di kulêla di banwe Idyif. 24 Kafnge én, fdà Dyosif i dad flanekan, na di fan ale mdà manan di dale, “Nang gamu sdalam na sbulaw di slengyu magu.”

25 Taman mdà ale di Idyif. Na di kakella di Kanaan di màla Dyékob, 26 manla, “Mà, mto fa Dyosif! Na kenen sa magot i klamang banwe Idyif”.

Na too sè ktikeng i nawa Dyékob, na too maliman fnaglut i gmanla di kenen. 27 Kabay di ktulenla kenen i kdee gman Dyosif di dale, na di kiten i dee kaditon i feben kenen, du gusmakayan salu di Idyif, mulê i nawan na too kenen lehew. 28 Na manan. “Tafnaglutgu nan too glut mto fa i tingàgu Dyosif. Landè dademe kayègu. Salu agu ditù di kenen, fye site gami di là agu fa mati.”

<- Dyénésis 44Dyénésis 46 ->