1 Na lêman talù Dwata i Amu, di ku Mosis, na manan, 2 “Di tnanin duh, di tnanin bulen, fdakyu i gumangamfùyu i galyu gustifun. 3 Fkaham di lam i bong kaban nlafin blawen, i gumkah i lwe batu gugsulat i sfalò flalò, na tlawéngam i satu kurtina di munan. 4 Nebem di lam i lamisa na fkaham i dad kandeenan di tahan. Kafnge én, nebem di lam i gumkah dad salò na fkaham i dad saloan. 5 Na fkaham i gudamsù blawen, i gumtam i fye bun, di muna i bong kaban maglafin blawen, i gumkah i lwe batu gugsulat i sfalò flalò. Na léam tlawéng i satu kurtina di gufusuk di gumangamfù.

6 “Na fkaham i gudamsù i gusmakuf i dad lmanaf, di muna i gufusuk. 7 Fkaham i gal gumalob di gutngà i gufusuk di gumangamfù, na i gal gudamsù, na nlamam yéél. 8 Kafnge én, nlanebam i glibut di lwà i gumangamfù, na tlawéngam i satu kurtina di gufusuk di nasel i gumlanebam ani.

9 “Na nweam i fngalo, i fngalo ilè i kablé di Dwata, na snabulam i gumangamfù ani, na i kdee kandeenan di lam. Én nimoam duh ani, dunan ilè kdee ani, agu mfun, agu Dwata i Amu. 10 Na kafnge én, salngad nimoam di gudamsù i gusmakuf i dad lmanaf, na i kdee kandeenan, du ilè i gudamsù ani agu mfun, agu Dwata i Amu. 11 Na léam snabul i fngalo ani, di gumalob na i gumkah dun, du ilè agu mfun nan, agu Dwata i Amu.

12 “Kafnge én, faginam Aron na i dad ngaan lagi di gufusuk i gumangamfù na falobam ale. 13 Na di kalobla falsakam Aron too fye klawehan, i klawehan lsakan di kadsuan di deg, na nlamogam kenen fngalo, na blém kenen di dagu, du ani ilè kenen mbaling i bàgu. 14 Na i dad ngaan lagi, fdadongam déén, na léam falsak dale. 15 Na nlamogam ale fngalo, salngad kiboam i màla, du fye mbaling ale gal bàgu, na mimò ale di dagu. Du di klamogam dale fngalo, i kgimòla gal bà, là tlag bay kel di kdee dad bella, kel di landè sen.”

16 Na nimò Mosis i kdee dek Dwata i Amu kenen. 17 Taman di tnanin duh di tnanin bulen di galwen fali i kagalwàla mdà di banwe Idyif, fafdak Mosis i gumangamfù di Dwata i Amu, i galla gustifun.

34 Di kafngela mimò i gumangamfù di Dwata galla gustifun, maglimun labun i gumangamfù ani, na di lam too fnò i bong kneng Dwata i Amu. 35 Du maglimun labun i gumangamfù galla gustifun, na du ditù di lam too fnò i bong kneng Dwata i Amu, là gfusuk Mosis.

36 Ku magket i labun na mgili mdà di gumangamfùla, lê magu i dad bel Israél, du lalòla. 37 Kabay ku là magket i labun di gumangamfùla, là ale magu, silang ku magket na mgili i labun. 38 Taman i labun Dwata i Amu, mlimun i gumangamfùla di mduh, na di butang dminè i labun salngad i lifoh. Na di dad kagu i dad bel Israél, fakayla teen i kasnagin Dwata i Amu dale, du teenla i labun ani di mduh, na i labun ani dminè di butang.

<- Éksodus 39