1 Lêman talù Dwata i Amu di ku Mosis, manan, “Tnagakam i banwe ani, ge na i dad to tanebem lamwà di Idyif, na salu gamu ditù di banwe i tafakanggu ku Abraham, Isaak, na Dyékob. Hae, du fakanggu dale i tanà én, du blégu di dad bella. 2 Fasnagingu i satu kasaligangu malak gamu. Na falwàgu kadang di banwe blégu di gamu i dad to mnè déén, dunan i dad to Kanaan, i dad to Amori, i dad to Hiti, i dad to Férisi, i dad to Hibiti, na i dad to Dyébusi. 3 Salu gamu di banwe ditù, i tanà too mabù, taman too nun kakaan. Kabay là agu magin gamu di kaguyu, ken falmogu gamu, du too mgal i uluyu.”

4 Na di kaklinge i dad to i gman Dwata, too ale mlidù, na fitela i klidùla, du landè di dale lamsak i dad kasla. 5 Hae, ani nimòla du tagman Dwata ku Mosis, manan, “Tnulenam i dad bel Israél ani, là agu magin dale, du ku magin agu, balù là mlo alò, ken sdulêgu ale falmo, du too mgal i ulula. Taman toola nwè i dad kasla di lawehla, na kafngen, neyegu ku tan i kibògu mukum dale.” 6 Taman di kdàla di bulul Sinay, talà lamsak i kas i dad bel Israél.

12 Na satu duh, man Mosis di Dwata i Amu, “Too glut dekam agu mebe i dad to ani salu di banwe i blém dale, bay laam fa tulen deg ku simto i fasnaginam dagu. Én senam alò gman, tagadeam agu, taman tanalékam agu na kanlehewam agu. 13 Kabay tabyà, ku lehew ge dagu, tdoam deg i kdee knayeam, du fye gadègu i knayeam ani, fye fadlug agu flehew ge. Na nangam glifet i dad to ani, ale i dad tom tamgalékam.”

14 Na tmimel Dwata i Amu, na manan, “Agu sa samnagin gamu, kel di banwe gumdekgu gamu, na fagotgu gamu i banwe i tafakanggu gamu.”

15 Na man Mosis di kenen, “Ku là ge magin gami, nangam gami fdà di banwe ani. 16 Hae, du ku laam gami nagin, tan i kgadè i dademe dad to i kanlehewam agu na i dad tom? Na ku samnagin ge gami, dilèmi mahal gami di kdee dademe dad to.”

17 Na man Dwata i Amu di ku Mosis, “I kdee fnim di deg ani, én i nimògu, du kanlehewta ge, na tanalékta ge.”

18 Na too fakdo Mosis di Dwata, manan, “Amugu Dwata, tabyà di ge, fitem di deg i bong knengam, i ilè tadini ge.” 19 Tmimel Dwata i Amu, manan, “Hae, fitegu ge i kafyegu, bay alò fliusgu di munam, na lê di munam fgadègu ge ku simto agu. Du agu Dwata i Amu, na kandogu na mlé agu kafye di balù simto i nalékgu. 20 Kabay là fakay ku teenam i bawehgu, du balù simto to mite i bawehgu mati sa.

21 “Neyem, tadag ge di bong batu ani, mdadong di deg. 22 Na di klius i bong knenggu, fkahta ge di gubsék i batu, na snafangta ge i kmalgu kel di kliusgu ge. 23 Kafnge én, nwègu kmalgu na teenam i kagolgu, bay là fakay ku teenam i bawehgu.”

<- Éksodus 32Éksodus 34 ->