II Timoti 4

1 Falnauta ge di kanfe i Dwata na Krayst Dyisas, du kenen mukum i kdee dad to mlawil na mati ku ta samfulê kenen magot i kdee. 2 Too ge falgad tamdò i Tnalù Dwata. Fye ku klom to gatlagad balù dét oras, i baling nun mayè flinge ku demen landèan. Fgadèam di dad to i dad salàla, na nngakam ale, na fanngewem ale, na fantahàam nawam tamdò dale.

3 Yé man-gu di ge du nun du kel, ta là flinge i dad to di glut tdò, bay lo yé lalòla i dale knayè, na baling ale mngabal dad to tamdò, lo yé tdòla i knayèla falninge. 4 Na ta là falningela i kaglutan, bay yé balingla falninge i dad flalok tulen. 5 Bay ge, toom dnan i ktom di kdee nimòam, na fagtayud ge, na nimòam i gten nimò i satu to tamdò i Fye Tulen, na fanngem i kdee fimò Dwata ge.

6 Yé duen-gu man ani di ge du salngad agu di dsù du ta mdadong i kfatila do, na tnagakgu i banwe ani. 7 Ta nimògu i sen gnagan-gu di kaskuya ani, na ta milah agu kel di gusenan, na kanlunggu i kaftoogu. 8 Yé duenam man, nun fala gatlagad taden, ulê i katluh, du yé blé i Amu di do du kenen sa i tluh Mukum. Na ise ku lo do i gamdawat di du ayé, bay lê man i kdee dad to minit nawa fatan i kasfulêan.

Dad kated Pol

9 E Timoti, too ge fabaltik salu dini di do, 10 du ta tnagak Dimas agu mdà di kalbong nawan i knèan dini di tah tanà, na ta salu ditù di Tésalonika. Na Krisan, ta gatù kenen di Galasya, na Titu gatù di Dalmasya. 11 Na ta lo Luk i tagak di safédgu. Nngém Mark, na faginam gadini du fye tnabengan agu di nimògu. 12 Na ta dekgu Tikiku gatù di Ifisu. 13 Na ku ta gadini ge, begam nebe do i saulgu mangfel ta tagakgu ku Karpu di Troas. Na lêam nebe do i dad librugu, na faginam i dad too mabtas sulat.

14 Alihandru, dunan i to msel, too sasè nimòan di do. Amu i malas i sasè nimòan di do. 15 Bay ge Timoti, too ge fgeye gablà ku Alihandru, du toon knang nawa i tdòta.

16 Di tnanin kebela do di gusukum, landè msen do, bay mtila agu tnagak. Mulà moon fnasinsya Dwata i salàla ayé. 17 Bay magin i Amu di do, na banlén agu kgis, du fye sdulêgu gatdò i Fye Tulen di dad to ise Dyu. Na falwàan agu mdà di dad sasè to mayè fmati do. 18 Na balù dét fan mkel di do, lêan agu falwà, na neben agu di banwe nagotan di langit. Lo kenen too magdayen kel di landè sen. Amén.

Gusen i sulat

19 Manam di dale Prisila na Akwila “Kumusta gamu” kun, na di familya Onisiforu. 20 Sana kditù Irastu di Korintu, na ta tnagakgu Trofimu di Militu du nun tamdukan. 21 Too ge beg fabaltik gadini di laman là fa kel i bang tno.

Yubyulu, Fudin, Linu, na Klawdya, na i kdee dad flanekta di kaftoo, manla “Kumusta ge” kun.

22 Mulà moon i Amu samnagin di nawam.

I kafye Dwata mnè di kdeeyu.

<- II Timoti 3