Ho ɲun níi vũahṹ na ó o

Zãn
túara
Vũahṹ túaró ɲúhṹ
O Zãn, yìa lé o Yeesu nì-kenínia nì-kéní, lé wón túara ho vũahṹ na kà. Ho vũahṹ mu yi, ó o von míten làa nì-kĩ́nle. O túara ho nɔn ɓa kèrètĩ́ɛwa kuure ɓúi yi.
Ɓa kèrètĩ́ɛwa kuure mu ó o wee ve làa hã́a lè mí zàwa. O wíokaa bía ɓa nì-khàwa lè le waminì bìo, á mún bía le ɓa sòobá míten à wé bè le Dónbeenì tũ̀iá poni yi.

Vũahṹ nín-yání bíoní

1-2 Ĩnɛ́n na lé o nì-kĩ́nle, lé mi wee túa ho vũahṹ na kà. Ĩ wee túa ho á à na a hã́a na le Dónbeenì léra yi, orɛ́n lè mí zàwa. Ĩ wa mi ɓúenɓúen làa sòobɛ́ɛ, lé bìo le Dónbeenì tũ̀iá poni na le zéenía làa wɛn á wa tà yi á ho wi wa yiwa yi fɛ́ɛɛ. Mu yínɔń ĩnɛ́n ĩ dòn wa mia. Bìa ɓúenɓúen na tà ho tũ̀iá mu bìo á mún wa mia. 3 Le o Maá Dónbeenì lè mí Za Yeesu *Krista à wé mu sãamu lè le hii làa wɛn, à ɓa na ho hɛ́ɛrà warɛ́n na tà ho tũ̀iá poni bìo á wa mín yi.

Mi wa wań mín à pĩ́ ho kàránló na yí bon bìo

4 Ũ zàwa ɓúi á ĩ ɲá bìo le ɓa tà bò le Dónbeenì tũ̀iá poni yi làa bìo ó o Maá Dónbeenì heníanáa mu nɔn wɛn, á ĩ sĩi ɓɛ̀ntĩ́n wan mu bìo yi làa sòobɛ́ɛ. 5 Hã́a mu, hã laà na kà wán, á bìo á ĩ hení ì na foǹ lé bìo kà: Mi wa wań mín. Le bíonì mu yínɔń bín-fĩnle na bò henía á ĩ túara nɔn mia, ɓùeé. Le bìo mà nɔn wɛn ho pã̀ahṹ na wa ɓúakáa á ɲá le Dónbeenì bíonì yi. 6 Hen ká wa wee bè bìo le Dónbeenì bò henía yi, lé bṹn á à zéení le wa wa le Dónbeenì. Bìo le Dónbeenì bò henía pã̀ahṹ na wa ɓúakáa ɲá le Dónbeenì bíonì yi lé bìo kà: Mi wań mín.

7 Ĩ wee bío kà síi lé bìo ɓa nì-khàwa wã́a bɛra fò hã lùa ɓúenɓúen. Ɓa wee bío le bìo ó o Yeesu *Krista ɓueé wó a nùpue á yí bon. Ɓa lé ɓa nì-khàwa, ɓa lé o Krista zúkúsa. 8 Á mi cén pa miten bìo, à bìo mi wó ɓúenɓúen le Dónbeenì bìo yi á mi yí tè yi, ká mi yí mu cũ̀nú à ho ɲii sí.

9 Yìa yí máa tà bè ho kàránló na bìo ciran o Krista yi, ká a báará día ho, se wón yí zũ le Dónbeenì. Ká yìa wee tà bè ho yi, wón páanía là a Maá Dónbeenì lè mí Za. 10 Ká nùpue ɓúi na yí máa tà bè ho kàránló na bìo ciran o Krista yi wé ɓuara mi cɔ̃́n, á wi ò o kàrán mia, à mi yí tà le o làa mi wán. Mi yí hɛ́n mi yara sĩ́ ɓànso. 11 Yìa hɛ́ra mí yahó sã́ a nùpue mu síi, se ɓànso làa wo lɛɛ́ra hã wén-kora na ó o wee wé yi.

Vũahṹ mɔ́ndɛ́n bíonì

12 Bìo cɛ̀rɛ̀ɛ á ĩ wi à ĩ bío làa mia, ká ĩ màhã́ yí wi à ĩ túa mu vũahṹ yi. Ĩ wi à ĩ ɓuen mi cɔ̃́n ĩten á wa ɓueé páaní ì tà hã láakáwá. Ká bṹn wó, á wa sĩ-wɛɛ ɲii màhã́ à sí.

13 Mìn hĩ́nló na le Dónbeenì mún léra, wón lè mí zàwa wee tɛ̀ɛní mia.