1 Niŋgi lou bunuj na Tamo Koba Qotei a qa louoqniy.

O tamo uŋgasari kalil mandamq endi unub qaji, niŋgi Tamo Koba a qa louoqniy. 2 Od, niŋgi Tamo Koba Qotei a qa louoqnsib aqa ñam soqtoqnsib a na tamo uŋgasari naŋgi eleŋeqnu deqa bati gaigai saoqniy. 3 Niŋgi Qotei aqa riaŋ koba qa ti aqa maŋwa kalil qa ti sawa bei bei qaji naŋgi sainjroqniy. 4 Tamo Koba Qotei a segi qujai kobaquja. Deqa iga aqa ñam tulaŋ soqtqom. Tamo Koba a na gisaŋ qotei kalil naŋgi tulaŋ buŋnjreqnu. Deqa iga gisaŋ qotei naŋgi qa ulaqasai. Iga Tamo Koba a segi qa ulaqom. 5 Sawa bei bei qaji naŋgo qotei di gisaŋ. Naŋgi kalil bole sai. Ariya Tamo Koba Qotei a laŋ gereiyej. 6 A ñam koba ti unu. A Mandor Koba unu. A aqa atra tal miligiq di unu. Aqa siŋgila ti aqa riaŋ ti tal dia unu.

7 O tamo uŋgasari kalil, niŋgi endegsib maroqniy, “Tamo Koba Qotei a riaŋ ti siŋgila ti unu. 8 A segi qujai goge koba. Deqa iga aqa ñam tulaŋ soqtqom.” Niŋgi degsib maroqnsib Qotei atraiyo iŋgi iŋgi oqnsib aqa atra tal miligiq giloqniy. 9 Tamo Koba Qotei aqa kumbra tulaŋ bole getento. Aqa kumbra di wala boledamu bul. Niŋgi deqa are qaloqnsib Qotei qa louoqniy. O tamo uŋgasari kalil mandamq endi unub qaji, niŋgi Qotei qa ulaugetoqnsib ginda gindaŋoqniy. 10 Niŋgi sawa bei bei qaji naŋgi endegsib minjroqniy, “Tamo Koba Qotei a Mandor. A na mandam torei siŋgilatej unu. Deqa mandam a loumqa keresai. Mondoŋ Tamo Koba a anjam tiŋtiŋ na tamo uŋgasari kalil naŋgi peginjrqas.”

11 O mandam ti laŋ ti, niŋgi areboleboleiŋgeme. O yuwal, ni areboleboleimimqa anjam atoqne. O iŋgi iŋgi kalil yuwal miligiq di unub qaji, niŋgi dego areboleboleiŋgeme. 12-13 O iŋgi wau kalil ti iŋgi iŋgi kalil wau miligiq di unub qaji ti, niŋgi areboleboleiŋgeme. Mondoŋ Tamo Koba Qotei a bosim sawa bei bei qaji naŋgi peginjrqas. A na aqa segi anjam bole dauryosim naŋgi peginjrqas. Od, a kumbra tiŋtiŋ na tamo uŋgasari kalil mandamq endi unub qaji naŋgi peginjrqas. Bati deqa ŋam kalil nañuq di unub qaji naŋgi Qotei qa louoqnsib areboleboleinjrqas.

<- Qotei qa Lou 95Qotei qa Lou 97 ->