1 Juda sawaq dia tamo uŋgasari naŋgi Qotei qa qalie. Israel sawaq dia tamo uŋgasari naŋgi Qotei aqa ñam kobaquja soqteqnub. 2 Qotei aqa tal a Jerusalem qureq di unu. Od, aqa tal a Saion manaq di unu. 3 Dia Qotei na jeu tamo naŋgo qoto qa iŋgi iŋgi paraparaiyeleŋeqnu. Od, a na naŋgo qaja ti dumu ti serie ti paraparaiyeleŋeqnu.

4 O Abu Qotei, ni ñam koba ti riaŋ koba ti unum. Ni tulaŋ goge kobaq di unum. Ni na mana kalil naŋgi buŋnjreqnum. 5 Ni na jeu tamo naŋgo qoto qa iŋgi iŋgi yainjreqnum deqa naŋgi olo qotqa keresai. Naŋgi moreŋeqnub. 6 O Jekop aqa Qotei, ni na jeu tamo naŋgi ŋiriŋtnjreqnum. Ni degyeqnum deqa qoto bati qa naŋgo hos naŋgi ti tamo hos goge di awejunub qaji naŋgi ti moreŋoqnsib mandamq di ŋereŋeqnub.

7 Ariya Qotei, iga ni segi qa ulaqom. Ni ŋiriŋ ti soqnimqa tamo yai a ino ulatamuq di tigelesqa kere? Tamo dego bei sosai. 8-9 Ni laŋ qureq di sosimqa une pegiyo wau yeqnamqa mandam tamo naŋgi ni qa ulaoqnsib kirieqnub. Ariya ni na tamo uŋgasari kalil naŋgo segi ñam aguq ateqnub qaji naŋgi aqaryainjreqnum. Deqa naŋgi padalosaieqnub. 10 Jeu tamo naŋgi ni qa minjiŋ oqetnjreqnaqa ni na naŋgi padaltnjreqnum. Ino segi tamo uŋgasari naŋgi ino kumbra di unoqnsib ino ñam soqteqnub. Od, jeu tamo naŋgo minjiŋ dena ino ñam tulaŋ goge oqeqnu.

11 O Israel tamo uŋgasari, niŋgi Tamo Koba Qotei aqa wau bei yqajqa minjqab di niŋgi wau di yiy. Niŋgi urataib. O Abu Qotei, ni marimqa tamo uŋgasari kalil sawa jojomq di unub qaji naŋgi ni qa ulaosib iŋgi bole bole osi bosib ni atraimebe. 12 E qalie, mandor kokba mandamq endi unub qaji naŋgi diqoqnsib laqnub deqa Qotei na naŋgo ñam aguq atoqnsiqa naŋgi ula enjreqnu.

<- Qotei qa Lou 75Qotei qa Lou 77 ->