1 O Tamo Koba Qotei, ni ŋiriŋ ti unum. Ariya ni na olo e ŋiriŋtbaim. Ni minjiŋ oqetmeqnu. Ariya ni ijo une qa e kambatbaim. 2 O Tamo Koba Qotei, ijo siŋgila koboqo deqa ni e qa are boleimeme. Ijo siŋgila torei saiqo deqa ni na olo e boletbe. 3 E are tulaŋ gulbekobaibeqnu. Ariya Tamo Koba Qotei, ni mare. Bati gembub e are gulbeibim sqai?

4 O Tamo Koba Qotei, ni bosim e ame. Ni ino qalaqalaiyo kumbra qa are qalsim e aqaryaibime. Yim e ŋambile sqai. 5 Ni degye. Di kiyaqa? Tamo moreŋeb qaji naŋgi ni qa are qalosaieqnub. Tamo moiyo qureq di unub qaji naŋgi ino ñam soqtosaieqnub.

6 E gaigai akameqnum deqa ijo siŋgila saiekriteqnu. Qolo gaigai ijo ŋam ya aiyeqnu deqa ijo bijal tulaŋ ñuŋgueqnu. E akamkobaeqnum deqa ijo gate kuluŋ dego tulaŋ ñuŋgueqnu. 7 Ijo jeu tamo tulaŋ gargekoba unub deqa e are gulbeibeqnaqa ijo ŋamdamu suŋyeqnaqa e ŋam atqa keresaiibeqnu.

8 O kumbra uge yo qaji tamo uŋgasari, Tamo Koba Qotei a ijo akam queqnu deqa niŋgi na e uratbiy. 9 E na Tamo Koba Qotei endegsi pailyeqnum, “Ni na e aqaryaibime.” Yeqnaqa a ijo pailyo queqnu. 10 Deqa bunuqna a na ijo jeu tamo kalil naŋgi gulbe tulaŋ kobaquja enjrim naŋgi jemainjrim bati qujai qa naŋgi ulaugetosib jaraiqab.

<- Qotei qa Lou 5Qotei qa Lou 7 ->