1 O Abu Qotei, e ino areq di ulieqnum deqa ni e qa dulame. Od, ni e qa dulame. Ni na e taqatbqajqa deqa e ino areq di ulieqnum. Tuwe du du naŋgi naŋgo ai aqa bariq di ulieqnub dego kere. E ino areq di uliesoqnitqa ijo gulbe kalil koboamqa bati deqa e olo aqaratqai. 2 Jeu tamo naŋgi na e ugeugeibeqnub deqa e Qotei Goge Koba meteqnam a naŋgo kumbra uge qa naŋgi kambatnjreqnu. 3 A laŋ qureq di sosiqa ijo pailyo quoqnsiqa e aqaryaiboqnsiqa tamo kalil e ugetbeqnub qaji naŋgi ŋiriŋtnjreqnu. A gaigai e tulaŋ qalaqalaibeqnu. A na e uratbosaieqnu. Sai bole sai.

4 Ijo jeu tamo naŋgi laion bul unub. Naŋgi tamo qalo qaji unub. E naŋgo ambleq di unum. Naŋgo qalagei qaja ti jarna ti bul tulaŋ qalat. Naŋgo meŋ dego serie bul tulaŋ qala uge.

5 O Abu Qotei, ni ino segi ñam laŋ goge dia boleq atime. Mandamq endia ni na tamo uŋgasari kalil naŋgi ino siŋgila ti ino riaŋ ti osornjrime.

6 Jeu tamo naŋgi na e ojqajqa deqa kakaŋ waiyeb. Deqa e are tulaŋ gulbekobaibej. Naŋgi gamq di sub bogeb. Di kiyaqa? E walwelosiy sub miligiq aiqajqa deqa. Ariya e subq aiyosai. Naŋgi segi sub miligiq aiyeb.

7 O Abu Qotei, ijo are miligiq di e ni qa ijo areqalo siŋgilateqnum. Od, e torei ni qa ijo areqalo siŋgilateqnum. Deqa e ni qa louoqnsiy ino ñam soqtoqnqai. 8 E nobqolo gaigai qutuoqnsiy gombiŋ anjamoqnqai. 9 O Tamo Koba, e sawa bei bei qaji naŋgo ambleq di ni biŋimoqnqai. Od, e tamo uŋgasari kalil naŋgo ambleq di ni qa louoqnsiy ino ñam soqtoqnqai. 10 E qalie, ni na iga tulaŋ qalaqalaigeqnum. Ni gaigai ino segi anjam bole dauryeqnum. Ino kumbra aiyel di tulaŋ goge koba. Naŋgi laŋ buŋyosib tulaŋ goge oqeqnub.

11 O Abu Qotei, ni ino segi ñam laŋ goge dia boleq atime. Mandamq endia ni na tamo uŋgasari kalil naŋgi ino siŋgila ti ino riaŋ ti osornjrime.

<- Qotei qa Lou 56Qotei qa Lou 58 ->