1 O Abu Qotei, e ni ombla sqajqa tulaŋ arearetbeqnu. Wagme juwaŋ a ya qaryeqnaqa yaq gileqnu dego kere. 2 O ŋambile Qotei, e tamo ya qaryeqnu qaji di bul sosimqa ni qa tulaŋ arearetbeqnu. O Abu Qotei, bati gembu e ino areq gilsiy ni ombla sqai? 3 Bati gaigai jeu tamo naŋgi na e endegsib nenembeqnub, “Ino Qotei a qabi unu?” Naŋgi e degsib nenembeqnub deqa e qolo ti qanam ti akamkobaeqnamqa ijo ŋam ya aiyeqnaqa e ŋam ya di uyobuleqnum. 4 Nami e tamo uŋgasari gargekoba naŋgi koba na walweloqnsim e naŋgi joqoqnsim Qotei aqa atra talq giloqnem. Bini e degyosaieqnum. Bati di iga leleŋ na ti arebolebole na ti walweloqnsim Qotei biŋiyoqnsim a qa louoqnsim giloqnem. E deqa olo are qaloqnsim are gulbeibeqnu. 5 Ariya kiyaqa e gaigai are prugbeqnu? Kiyaqa e are gulbeibeqnu? Di uŋgum. E Qotei qa ijo areqalo siŋgilatosiy aqa ñam olo soqtoqnqai. A ijo Qotei unu. A ijo aqaryaibo tamo unu deqa e padalqasai.

6 O Abu Qotei, e are tulaŋ gulbeibeqnu deqa e ni qa are qaleqnum. Od, e Jordan Ya aqa sawa agi Hermon mana ti Misa mana ti utruq dia sosimqa ni qa are qaleqnum. 7 Ya a mana goge na aiyoqnsiqa qatroŋkobaoqnsiqa yuwal robuq dia bileŋeqnu. Jagwa a tigeloqnsiqa yuwal korkorteqnaqa yuwal a alile qaleqnu. Dego kere ni na e gulbe ebeqnamqa gulbe dena e kabutbeqnu.

8 Qanam gaigai Tamo Koba Qotei na e qalaqalaibeqnu. Qolo gaigai e a qa loueqnum. A na e ŋambile ebeqnu deqa e a pailyeqnum. 9 Qotei a meniŋ bul sosiqa e siŋgila ebeqnu. E na Qotei endegsi minjeqnum, “Ni kiyaqa e qa are walbeqnu? Kiyaqa jeu tamo naŋgi na e ugeugeiboqnsib are gulbetetbeqnub?” E na Qotei degsi minjeqnum. 10 Bati gaigai jeu tamo naŋgi na e misiliŋboqnsib endegsib nenembeqnub, “Ino Qotei a qabi unu?” Naŋgo anjam dena e tulaŋ ugetbeqnu. Qaja na tamo bei aqa jejamu qamsim aqa tanu giŋgeŋyim a moiqas dego kere. 11 Kiyaqa e gaigai are prugbeqnu? Kiyaqa e are gulbeibeqnu? Di uŋgum. E Qotei qa ijo areqalo siŋgilatosiy aqa ñam olo soqtoqnqai. A ijo Qotei unu. A ijo aqaryaibo tamo unu deqa e padalqasai.

<- Qotei qa Lou 41Qotei qa Lou 43 ->