1 O Tamo Koba Qotei, ni meniŋ bul sosim e ulitbeqnum deqa e ni metmitqa ni ijo pailyo quetbe. Ni tamo dabkala geteŋnjro qaji naŋgi bul saim. Ni ijo pailyo quqwasai di e tamo moreŋeb qaji naŋgo qureq aiyobulo uge. 2 Ni e qa dulosim aqaryaibqajqa deqa e ni metmitqa ni ijo pailyo quetbe. E ijo baŋ soqtosim ino atra tal koba areiyosim ni pailmitqa ni ijo pailyo que. Ino atra tal di tulaŋ bolequja getento koba. 3 Bunuqna ni na tamo kumbra uge yeqnub qaji naŋgi ugeugeinjrqam bati deqa ni na e dego ugeugeibaim. Tamo naŋgi dena naŋgo kadoi naŋgi lawo anjam laŋa babaŋ na minjreqnub. Ariya naŋgo are miligiq di areqalo uge uge na tulaŋ maqejunu.

4 O Abu Qotei, ni na jeu tamo naŋgo kumbra uge qa naŋgi kambatnjrsim awai uge enjre. Od, ni na naŋgo une qa naŋgi ŋolawotnjre. 5 Tamo naŋgi di Tamo Koba Qotei aqa wau kalil qa are qalosaieqnub. Deqa Qotei na naŋgi ugeugeinjrsim torei kobotnjrqas.

6 Tamo Koba Qotei a e qa dulqajqa deqa e na a meteqnam a ijo pailyo queqnu. Deqa e aqa ñam soqteqnum. 7 Tamo Koba a dumu bul sosiqa e siŋgilatbeqnu. Deqa e a qa ijo areqalo siŋgilateqnum. A na e aqaryaibeqnu deqa e a qa louoqnsim a biŋiyoqnsim tulaŋ areboleboleibeqnu.

8 Tamo Koba Qotei a na aqa segi tamo uŋgasari naŋgi siŋgilatnjreqnu. A dadaŋ bul unu deqa a na aqa mandor beteryoqnsiqa jeu tamo naŋgo baŋq na a oqnsiq taqal waiyeqnu. 9 O Abu Qotei, ni na ino segi tamo uŋgasari ni nami giltnjrem qaji naŋgi aqaryainjrsim boletnjre. Ni kaja naŋgo taqato tamo bul sosim naŋgi bati gaigai taqatnjroqne.

<- Qotei qa Lou 27Qotei qa Lou 29 ->