1 Mandam ti iŋgi iŋgi kalil mandamq endi unub qaji naŋgi ti di Tamo Koba Qotei aqa segi iŋgi iŋgi. Tamo uŋgasari sawa bei beiq di unub qaji naŋgi dego Qotei aqa segi. 2 Qotei a ya gogeq dia mandam atej. Od, a yuwal gogeq dia mandam atej.

3 Yai naŋgi Tamo Koba Qotei aqa mana gogetqa kere? Yai naŋgi aqa atra tal getento miligiq gilqa kere? 4 Tamo aqa baŋ yansobulosiq kumbra uge urateqnu qaji a qujai Qotei aqa mana gogetqa kere. Tamo di aqa are miligi tulaŋ milalo. A gisaŋ qotei naŋgi qa louosaieqnu. A anjam bei siŋgilatosiq anjam dena tamo qudei naŋgo jejamu laŋa gisaŋyosaieqnu. Tamo deqaji a qujai Qotei aqa mana gogetqa kere. 5 Tamo deqaji a Tamo Koba Qotei na boletqas. Boletosim a tamo bole une saiqoji qa minjsim padalo sawaq na oqas. 6 Tamo deqaji a Jekop aqa Qotei aqa ulatamu unqajqa tulaŋ areareteqnu.

7-8 O siraŋ, niŋgi waqiy. O siraŋ namij qaji, niŋgi torei waqiy. Yibqa Mandor ñam koba ti unu qaji a siraŋ miligiq gilqas. Mandor di yai? Di Tamo Koba Qotei. A siŋgila koba ti unu deqa a qoto buŋyeqnu.

9 O siraŋ, niŋgi waqiy. O siraŋ namij qaji, niŋgi torei waqiy. Yibqa Mandor ñam koba ti unu qaji a siraŋ miligiq gilqas. 10 Mandor di yai? Di Tamo Koba Qotei. A qoto tamo naŋgo gate koba. A segi qujai Mandor ñam koba ti unu.

<- Qotei qa Lou 23Qotei qa Lou 25 ->