1 Iga Babilon ya qalaq di awesosimqa Saion qure qa are qaloqnsim akamkobaoqnem. 2-3 Tamo uŋgasari iga tontgeb qaji naŋgi na iga kikigoqnsib endegsib mergoqneb, “Niŋgi Saion qure qa lou gereiyibqa iga quqwom. Niŋgi arebolebole qa lou gereiyiy.” Naŋgi na iga degsib misiliŋ anjam mergoqneb deqa iga gago louqajqa gombiŋ olo anjamosai. Iga gombiŋ di osim ŋam dani gogeq di gaintem.

4 Iga Babilon sawaq di yauŋ tamo soqnem. Di gago sawa sai. Iga dia sosimqa endegsi maroqnem, “Iga kiyersim Tamo Koba Qotei qa louoqnqom? Di keresai.” 5 O Jerusalem qure, e ni qa are walbqas di e olo gombiŋ anjamqajqa keresaiibeme. 6 O Jerusalem qure, e ni segi qujai qa areboleboleibqajqa asgibim ni qa are walbqas di ijo kakro ugeim ijo meŋ medabuq di geteŋeme. E olo louqajqa keresaiibeme.

7 O Tamo Koba Qotei, ni qalie, Babilon naŋgi na Jerusalem tamo uŋgasari naŋgi qoto itnjrnabqa bati deqa Idom naŋgi na Babilon naŋgi beternjrsib anjam endegsib minjreb, “Niŋgi Jerusalem aqa tal kalil koŋekritosib qure di torei niñaqyiy.” O Abu Qotei, ni Idom naŋgo anjam deqa are qalsim naŋgi ŋolawotnjre. 8 O Babilon, niŋgi quiy. Niŋgi na iga tulaŋ ugetgeb deqa niŋgi padalougetqab. Tamo bei na nuŋgo une deqa niŋgi kambatŋgwas di a tulaŋ areboleboleiyqas. 9 A nuŋgo aŋgro kiñilala naŋgi ojsim meniŋ quraq di breinjrqas di a tulaŋ areboleboleiyqas.

<- Qotei qa Lou 136Qotei qa Lou 138 ->