1 ༼གཱད་པའི་དབྱངས་ནང་དབུ་མཛད་ལ་སྤྲད་པའི་ཨ་སབ་ཀྱི་མགུར༌མ།༽ ང་ཚོའི་སྟོབས་ཤུགས་ཡིན་པའི་དཀོན་མཆོག༌ལ། །དགའ་སྤྲོའི་སྐད་སྒྲ་སྒྲོགས་དང་ཡ་ཀོབ༌ཀྱི། །དཀོན་མཆོག་དྲུང་དུ་དགའ་མགུའི་སྐད་སྒྲ༌སྒྲོགས།། 2 མགུར་གླུ་ལོངས་ཤིག་སིལ་རྔ་སྐད་སྙན༌པོའི། །པི་ཝང་དང་ནི་རྒྱུད་མངས་དཀྲོལ་བར༌གྱིས།། 3 ཚེས་གཅིག་དང་ནི་ཉ་གང་རང་ཅག༌གི །དུས་ཆེན་སྐབས་སུ་རྭ་དུང་འབུད་པར༌གྱིས།། 4 འདི་ནི་ཡེས་ར་ཨེལ་ཕྱིར་སྒྲིག་ཁྲིམས༌དང༌། །ཡ་ཀོབ་དཀོན་མཆོག་ཉིད་ཀྱི་སྲོལ་ཡིག༌ཡིན།། 5 ཁོང་གིས་ཨེ་ཅིབ་ཡུལ་ལ་རྒོལ་དུས༌སུ། །ཡོ་སེབ་ཕྱིར་དུ་དཔང་ཡིག་འདི་བཙུགས༌སོ། །བདག་གིས་ཆ་རྒྱུས་མེད་པའི་སྐད་ཅིག༌ཐོས།། 6 དཀོན་མཆོག་ཉིད་ཀྱིས་འདི་སྐད་གསུངས་པ༌སྟེ། །བདག་གིས་དེ་ཡི་ཕྲག་པའི་ཁུར་པོ༌ཕབ། །སླེ་པོ་ཡང་ནི་ཁོ་ཡི་ལག་པར༌ཕྲལ།། 7 དཀའ་སྡུག་ཁྲོད་ནས་འོ་དོད་བོས་པ༌ན། །ང་ཡིས་ཁྱོད་རང་བསྐྱབས་ཤིང་འབྲུག་གྲགས༌པའི། །སྤྲིན་ནག་ཁྲོད་དུ་ཁྱོད་ལ་ལན་བཏབ༌ཅིང༌། །མེ་རི་བཱ་ *མེ་རི་བཱ་ཞེས་པ་ནི་འཐབ་འཛིང་དང་རྩོད་པའི་དོན༌ཡིན།ཡི་ཆུ་འགྲམ་ཁྱོད་ལ༌བརྟག།༼ སེ༌ལཱ། ༽ 8 ཉོན་དང་ང་ཡི་མི་རྣམས་ཉེན་བརྡར༌ཉོན། །ཡེས་ར་ཨེལ་གྱིས་མཉན་ན་ཅི་མ༌རུང༌།། 9 ཁྱོད་ནང་རྒྱུས་མེད་ལྷ་ནི་ཡོད་མི༌རུང༌། །ཕྱི་པའི་ལྷ་ལ་ཕྱག་ཀྱང་འཚལ་མི༌རུང༌།། 10 ཁྱོད་རང་ཨེ་ཅིབ་ཡུལ་ནས་ཕྱིར་ཁྲིད༌པའི། །ཁྱོད་ཀྱི་དཀོན་མཆོག་ཡ་ཝཱེ་ང་ཡིན༌ནོ། །ཁ་ཆེར་གདོངས་ཤིག་བདག་གིས་འགེང་བར༌བྱ།། 11 ངའི་འབངས་ང་ཡི་སྐད་ལ་མ་མཉན༌ཞིང༌། །ཡེས་ར་ཨེལ་གྱིས་ང་ལ་མ་བསྟུན༌པས།། 12 དེ་རྣམས་སེམས་རྒྱུད་གྱོང་པོར་བསྐྱུར་ནས༌ནི། །རང་གི་གྲོས་བཞིན་སྤྱད་པ་སྤྱོད་དུ༌བཅུག། 13 ང་ཡི་འབངས་ཀྱིས་ང་ལ་མཉན་པ༌དང༌། །ཡེས་ར་ཨེལ་ངའི་ལམ་དུ་འགྲུལ་ན༌ནི།། 14 བདག་གིས་མྱུར་དུ་དགྲ་རྣམས་འདུལ་བྱ༌ཞིང༌། །ཕྱི་ལག་བྱས་ནས་དེ་ཚོའི་དགྲ་ལ༌རྒོལ།། 15 ཡ་ཝཱེར་སྡང་མཁན་ཟོལ་གྱིས་ཁོང་ལ༌བསྟུན། །དེ་ཚོའི་ཉེས་ཆད་ཁུར་ཡུན་རྫོགས་མཐའ༌མེད།། 16 ཁོང་གིས་དེ་ཚོར་གྲོའི་ཕུད་གནང་བ༌དང༌། །བྲག་ནས་ཐོན་པའི་སྦྲང་རྩིས་ཚིམ་པར༌མཛད།།

<- གསུང༌མགུར། 80གསུང༌མགུར། 82 ->