1 ༼ཨ་སབ་ཀྱི་མགུར༌མ།༽ ཡེས་ར་ཨེལ་དང་སེམས་པ་རྣམ་དག༌ལ། །དཀོན་མཆོག་བཟང་པོ་ལགས་པར་གདོན་མི༌ཟ།། 2 འོན་ཀྱང་ང་ཡི་རྐང་པ་འདྲེད་ལ༌ཉེ། །གོམ་སྟབས་དོན་མེད་འགྱེལ་ལ་ཁད་ཙམ༌བྱུང༌།། 3 རྒྱུ་མཚན་མི་ངན་དར་ལུགས་ངས་མཐོང༌ཞིང༌། །ང་རྒྱལ་ཅན་ལ་བདག་ནི་ཕྲག་དོག༌སྐྱེས།། 4 དེ་རྣམས་འཆི་བའི་དུས་སུ་ཟུག་གཟེར༌མེད། །ཁོག་པ་རྒྱགས་ཤིང་སྟོབས་ཀྱང་རྒྱས་པ༌ཡིན།། 5 དེ་ཚོར་གཞན་ལྟར་དཀའ་སྡུག་མི་འབྱུང༌ལ། །གཞན་པ་ནང་ལྟར་རྐྱེན་ངན་ཡང་མི༌འཕྲད།། 6 དེའི་ཕྱིར་ང་རྒྱལ་དེ་ཚོའི་མགུལ་རྒྱན༌ཡིན། །གདུག་རྩུབ་གོས་བཞིན་དེ་ཚོས་གྱོན་བྱེད༌དོ།། 7 ལུས་ཕུང་རྒྱགས་པས་མིག་ཟུང་འབུར་དུ༌ཐོན། །དེ་ཚོའི་ངན་སེམས་བསམ་ཡུལ་ལས་ཀྱང༌འདས།། 8 མི་ལ་འཕྱ་ཞིང་སེམས་ངན་བཅངས་ནས༌ནི། །གཉའ་གནོན་གཏམ་རྣམས་སྨྲ་ཞིང་ཁ་ཕོ༌ཆེ།། 9 དེ་ཚོའི་ངག་གིས་ནམ་མཁར་སྐུར་བ་འདེབས། །དེ་ཚོའི་སྨྲ་བརྗོད་ས་གཞི་ཡོངས་ལ༌སླེབས།། 10 དེའི་ཕྱིར་ཁོང་གི་མི་རྣམས་དེའི་ཕྱོགས༌ལོག །མོད་པོ་ཆུ་ནི་ངོམ་པར་བཏུང་བ༌འོ།། 11 དེ་ཚོས་དཀོན་མཆོག་གིས་ནི་ཇི་ལྟར༌མཁྱེན། །བླ་ན་མེད་པར་ཤེས་ཡོན་ཡོད་དམ༌ཟེར།། 12 མི་ངན་འདི་ཚོར་ལྟོས་དང་ཁོ་རྣམས༌ནི། །རྟག་ཏུ་བདེ་བར་གནས་ཤིང་ནོར་ཡང༌འཕེལ།། 13 བདག་གིས་དོན་མེད་རང་སེམས་གཙང་མར༌བྱས། །ཉེས་མེད་མཚོན་ཕྱིར་ལག་ཟུང་བཀྲུས་པ༌སྟོང༌།། 14 རྒྱུ་མཚན་ང་ལ་ཉིན་གང་རྐྱེན་ངན༌བྱུང༌། །ཞོགས་པ་རེ་རེར་ང་ལ་ཉེས་ཆད༌ཕོག། 15 བདག་གིས་འདི་ལྟར་སྨྲ་འོང་ཞེས་བརྗོད༌ན། །ཁྱེད་ཀྱི་བུ་རྒྱུད་དག་ལ་ངོ་ལོག༌བྱས།། 16-17 དཀོན་མཆོག་གནས་མཆོག་ནང་དུ་ང་སོང༌སྟེ། །དེ་ཚོའི་མཐའ་མར་བསམ་བློ་བཏང་བའི༌བར། །ཇི་ལྟར་རྟོགས་ཕྱིར་བསམ་བློ་བསྐོར་དུས༌སུ། །ང་ཡི་མཐོང་ངོར་དེ་ནི་ཤིན་ཏུ༌དཀའ།། 18 ཁྱེད་ཀྱིས་དངོས་གནས་དེ་རྣམས་འདྲེད་སར༌བཞག །སྟོངས་ཕྱིར་དེ་དག་ཐུར་དུ་གཡུགས་མཛད༌དོ།། 19 དེ་རྣམས་སྐད་ཅིག་ཉིད་ལ་ཇི་ལྟར༌སྟོངས། །འཇིགས་སྣང་གིས་ནི་ཡོངས་སུ་མེད་པར༌བྱས།། 20 གཉིད་སད་རྨི་ལམ་ཇི་ལྟར་ཡིན་ན༌ནི། །ཀྱེ་ཀྱེ་གཙོ་བོ་ཁྱེད་ཉིད་མནལ་སད༌དུས། །དེ་ཚོའི་འཆར་སྣང་ལ་ནི་དེ་བཞིན༌སྨད།། 21 བདག་སེམས་འཚེར་ཞིང་སྙིང་ཁུང་ཕུག་དུས༌སུ།། 22 ང་ནི་ཅི་འདྲའི་གླེན་ཞིང་རྨོངས་པ༌ལ། །ཁྱེད་དྲུང་ང་རང་དུད་འགྲོ་ནང་བཞིན༌ཡིན།། 23 འོན་ཀྱང་ང་རང་ནམ་ཡང་ཁྱེད་དང༌འགྲོགས། །ཁྱེད་ཀྱིས་བདག་གི་གཡས་ལག་ནས་བཟུང༌ངོ༌།། 24 ཁྱེད་ཀྱིས་བཀའ་སློབ་གནང་ནས་ལམ་སྣ༌དྲངས། །ཕྱིས་སུ་གཟི་བརྗིད་ནང་དུ་བདག་འཁྲིད༌འོང༌།། 25 ནམ་མཁར་ཁྱེད་ལས་ང་ལ་གཞན་སུ༌ཡོད། །ས་གཞིར་ཁྱེད་མིན་ཅི་ཡང་ངས་མི༌འདོད།། 26 ང་ཡི་ལུས་དང་ང་ཡི་སེམས་རྒུད༌ཀྱང༌། །དཀོན་མཆོག་ང་ཡི་སེམས་ཀྱི་སྟོབས་ཡིན༌ལ། །བདག་གི་གཏན་མའི་ནོར་སྐལ་ཡང་ཡིན༌ནོ།། 27 གཟིགས་ཤིག་ཁྱེད་དང་གྱེས་པ་མེད་པར༌འགྱུར། །ཁྱེད་དང་བྲལ་ནས་ལོག་གཡེམ་སྤྱོད་པ༌རྣམས། །ཐམས་ཅད་ཁྱེད་ཀྱིས་རྨེག་མེད་མཛད་མོད༌ཀྱང༌།། 28 དཀོན་མཆོག་ཉེ་སར་བཏུད་པ་བདག་ལ༌ཕན། །ཁྱེད་ཀྱི་མཛད་པ་ཐམས་ཅད་བརྗོད་པའི༌ཆེད། །གཙོ་བོ་ཡ་ཝཱེ་ང་ཡི་སྐྱབས་གནས༌བྱས།།

<- གསུང༌མགུར། 72གསུང༌མགུར། 74 ->