5 མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ་ཡེས་ར་ཨེལ་པ་རྣམས་ལ་འདི་ལྟར། ཡོ་སེབ་ཀྱི་ཚོ་པའི་མི་རྣམས་ཀྱིས་སྨྲས་པ་བདེན་ནོ། ། 6 ཚེ་ལོ་ཕེ་ཧད་ཀྱི་བུ་མོ་རྣམས་ལ་མཚོན་ན། དཀོན་མཆོག་ཡ་ཝཱེས་གནང་བའི་བཀའ་ནི་འདི་ལྟ་སྟེ། ཁོ་མོ་རྣམས་སུ་ཡི་ཆུང་མ་བྱ་བསམ་ན་དེ་ལྟར་བྱས་ཆོག འོན་ཀྱང་། རང་གི་རིགས་རྒྱུད་དང་རང་གི་ཚོ་པ་ནས་ཁྱོ་ག་བཙལ་དགོས། 7 དེ་ལྟར་བྱས་ན་ཡེས་ར་ཨེལ་པ་རྣམས་ཀྱི་ས་སྐལ་ནི་ཚོ་པ་གཅིག་ནས་ཚོ་པ་གཞན་ལ་སྤྲོད་མི་དགོས། ཡེས་ར་ཨེལ་པ་རེ་རེས་རང་རང་གི་ཕ་མེས་རྣམས་ཀྱི་ཚོ་པའི་ས་སྐལ་འཛིན་སྐྱོང་བྱེད་དགོས་པའི་ཕྱིར་རོ། ། 8 ཡེས་ར་ཨེལ་པའི་ཚོ་པ་ལས་ས་སྐལ་ཐོབ་པའི་བུ་མོ་རྣམས་རང་རང་གི་ཕ་མེས་རྣམས་ཀྱི་ཚོ་པར་གཏོགས་པའི་ཁྱིམ་རྒྱུད་ཀྱི་མི་ཞིག་གི་ཆུང་མ་བྱེད་དགོས་ལ། དེ་ནི་ཡེས་ར་ཨེལ་པ་རེ་རེས་རང་རང་གི་ཕ་མེས་ཀྱི་ས་སྐལ་བདག་ཏུ་འཛིན་པའི་ཕྱིར་དང་། 9 དེ་ནས་ཡེས་ར་ཨེལ་པ་རྣམས་ཀྱི་ས་སྐལ་ནི་ཚོ་པ་གཅིག་ནས་ཚོ་པ་གཞན་ལ་སྤྲོད་མི་དགོས་པ་ཡིན། ཅི་ལ་ཞེ་ན། ཡེས་ར་ཨེལ་པ་རྣམས་ཀྱི་ཚོ་པ་རེ་རེས་རང་རང་གི་ས་སྐལ་འཛིན་སྐྱོང་བྱེད་དགོས་པའི་ཕྱིར་རོ་ཞེས་གསུངས་སོ། །
10 དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་ལྟར་གནང་བ་ཡིན་ན། ཚེ་ལོ་ཕེ་ཧད་ཀྱི་བུ་མོ་རྣམས་ཀྱིས་དེ་བཞིན་དུ་བསྒྲུབས་པ་དང་། 11 ཚེ་ལོ་ཕེ་ཧད་ཀྱི་བུ་མོ་མ་ལཱ་དང་། ཐིར་ཚ་དང་། ཧོག་ལཱ་དང་། མིལ་ཀཱ་དང་། ནོ་ཨ་བཅས་རང་གི་ཕ་ཁུའི་བུ་རྣམས་ཀྱི་ཆུང་མར་གྱུར་པའོ། ། 12 དེ་དག་ཡོ་སེབ་ཀྱི་བུ་མཱ་ན་ཤེའི་བུ་རྒྱུད་རྣམས་ཀྱི་ཁྱིམ་རྒྱུད་ཀྱི་ཆུང་མ་བྱས་པ་དང་། ཁོ་མོ་ཚོའི་ས་སྐལ་ནི་སྔར་བཞིན་རང་རང་གི་ཕ་ཡི་ཁྱིམ་རྒྱུད་དང་ཚོ་པར་གཏོགས་པའོ། །
13 དེ་དག་ནི་དཀོན་མཆོག་ཡ་ཝཱེས་ཡེ་རུ་ཀོ་ཡི་ཁ་གཏད་དེ་ཡོར་དན་གཙང་པོའི་འགྲམ་དུ་ཡོད་པའི་མོ་ཨབ་སྤང་ལྗོངས་སུ། མོ་ཤེ་བརྒྱུད་ནས་ཡེས་ར་ཨེལ་པ་རྣམས་ལ་གནང་བའི་བཀའ་དང་སྲོལ་ཡིག་རྣམས་ཡིན་ནོ།། །།
<- གྲངས་ཀ 35