1 ཁྱོད་ཀྱིས་ལྕགས་ཀྱུས་ཆུ་སྲིན་འཐེན་ནུས་སམ། ། ཐག་པས་དེ་ཡི་ལྕེ་ནི་གནན་ནུས་སམ། ། 2 དེ་ཡི་སྣ་ལ་ཐ་གུ་བརྒྱུ་ནུས་སམ། ། དེ་ཡི་འགྲམ་རུས་ལྕགས་ཀྱུས་དབུག་ནུས་སམ། ། 3 དེ་ཡིས་ཁྱོད་ལ་ཡང་ཡང་ཞུ་འགྱུར་རམ། ། ཡང་ན་ཁྱོད་ལ་འཇམ་པོའི་ཚིག་སྨྲ་འམ། ། 4 ཁྱོད་ཀྱིས་དེ་ནི་ཚེ་གཡོག་བྱེད་ཆེད་དུ། ། དེ་ཡིས་ཁྱོད་ལ་ཁ་ཆད་འཇོག་འགྱུར་རམ། ། 5 དེ་ནི་བྱེའུ་ཆུང་བཞིན་དུ་རྩེ་འོང་ངམ། ། ཡང་ན་བུ་མོའི་ཕྱིར་དུ་འདོགས་ནུས་སམ། ། 6 ཉ་པ་རྣམས་ཀྱིས་མཉམ་འབྲེལ་བྱས་གྱུར་ནས། ། ཚོང་རྫས་བཞིན་དུ་དེ་ནི་བཙོང་ནུས་སམ། ། ཁོ་ཚོས་དེ་ནི་ཚོང་པར་བགོ་ནུས་སམ། ། 7 ཁྱོད་ཀྱིས་ཉ་མདུང་དེ་ཡི་པགས་པར་འཛུགས་པ་དང་། ། དེ་ཡི་མགོ་ལ་ཉ་ཚེབ་བཙུགས་ནས་བཀང་ནུས་སམ། ། 8 ཁྱོད་ཀྱིས་དེའི་སྟེང་ལག་པ་བཞག་ན་ནི། ། དེ་དང་འཐབ་པ་ཡིད་ལ་དྲན་གྱུར་ནས། ། སླར་ཡང་དེ་བཞིན་བྱེད་པར་མི་འགྱུར་རོ། ། 9 དེ་ཉིད་འདུལ་བར་འདོད་པ་དོན་མེད་ཡིན། ། སུས་དེ་མཐོང་བ་ཙམ་གྱིས་དཔའ་མི་ཞུམ། ། 10 དེ་དཀྲོག་སྤོབས་པའི་ངར་ཅན་གང་ཡང་མེད། ། དེ་བཞིན་བདག་དྲུང་སུ་ཞིག་འགྲེང་ནུས་སམ། ། 11 གནམ་འོག་ཡོད་ཚད་ང་ཡི་ཡིན་པས་ན། ། བདག་གིས་མི་ལ་སྐྱིན་ཚབ་སྤྲོད་པའི་ཕྱིར། ། སྔོན་དུ་བདག་ལ་ཕུལ་བ་སུ་ཡོད་དམ། ། 12 དེ་ཡི་ཡན་ལག་དང་ནི་སྟོབས། ། ཡིད་དུ་འོང་བའི་རུས་ཚུགས་བཅས། ། བདག་གིས་མི་གླེང་ག་མེད་བྱུང་། ། 13 དེ་ཡི་ཕྱི་གོས་སུ་ཡིས་བཤུ་ནུས་ཤིང་། ། དེ་ཡི་གོ་ཁྲབ་བར་ལ་སུ་འཛུལ་ནུས། ། 14 སུ་ཡིས་དེ་ཡི་འགྲམ་རུས་འབྱེད་ནུས་སམ། ། དེ་ཡི་སོ་ཡི་མཐའ་འཁོར་འཇིགས་སུ་རུང་། ། 15 དེ་ཡི་རྐེད་པར་ཉ་ཁྲབ་བསྒྲིགས་ཡོད་དེ། ། དེ་ནི་དམ་པོར་བཙུམས་ནས་བསྡམས་པ་འདྲ། ། 16 ཉ་ཁྲབ་དེ་དག་གཅིག་ལ་གཅིག་སྦྲེལ་ཞིང་། ། དེ་ཡི་ནང་དུ་རླུང་ཡང་རྒྱུ་མི་ནུས། ། 17 དེ་དག་ཕན་ཚུན་གཅིག་ལ་གཅིག་སྦྲེལ་ཞིང་། ། ཕན་ཚུན་འབྱར་ནས་སོ་སོར་འབྲལ་མ་ནུས། ། 18 སྦྲིད་དུས་དེ་ཡིས་འོད་ཟེར་སྤྲོ་བ་དང་། ། དེ་ཡི་མིག་ཟུང་ཞོགས་པའི་སྐྱ་འོད་འདྲ། ། 19 དེ་ཡི་ཁ་ནས་འབར་བའི་དཔལ་འབར་ཐོན། ། མེ་སྟག་རྣམས་ནི་དེ་ནས་རྒྱང་རིང་འཕུར། ། 20 ཁོལ་བའི་སླ་ང་འབར་བའི་འདམ་རྩྭ་བཞིན། ། དེ་ཡི་སྣ་ཁུང་ལས་ནི་དུ་བ་འཕྱུར། ། 21 དེ་ཡི་དབུགས་ཀྱིས་སོལ་བ་མེ་ལ་སྦར། ། དེ་ཡི་ཁ་ནས་མེ་ལྕེ་ལྷབ་ལྷབ་ཐོན། ། 22 དེ་ཡི་མཇིང་པའི་ནང་དུ་སྟོབས་གནས་ཤིང་། ། དེ་ཡི་མདུན་དུ་འཇིགས་པས་གར་ལྡིང་ངོ་། ། 23 དེ་ཡི་ཤ་རྡོག་རྣམས་ནི་དམ་པོར་སྦྲེལ། ། དེ་རྣམས་དེའི་ཐོག་འབྱར་བས་བསྒུལ་མི་ནུས། ། 24 དེ་ཡི་སྙིང་ནི་རྡོ་ལྟར་སྲ་ཞིང་བརྟན། ། རང་འཐག་འོག་རྡོ་བཞིན་དུ་སྲ་བ་ཡིན། ། 25 དེ་ཡར་བཞེངས་དུས་དཔའ་རྒོལ་རྣམས་ཀྱང་སྐྲག ། ཧ་ཅང་འཇིགས་པའི་དབང་གིས་དྲན་པ་ཤོར། ། 26 མི་ཡིས་རལ་གྲིས་དེ་ལ་འཛུགས་པ་དང་། ། ཡང་ན་མདུང་དང་མདུང་ཐུང་གིས་བཙུགས་ཏེ། ། རྣོན་པོ་མདུང་གིས་གཙགས་ཀྱང་ཕན་མི་ཐོགས། ། 27 ལྕགས་ནི་དེ་ལ་མཚོན་ན་རྩྭ་སྐྱ་དང་། ། ལི་ནི་དེ་ལ་མཚོན་ན་ཤིང་རུལ་འདྲ། ། 28 མདའ་མོས་དེ་ནི་འབྲོ་རུ་འཇུག་མི་ནུས། ། འུར་རྡོ་དེ་ལ་མཚོན་ན་ཕུབ་མ་བཞིན། ། 29 དེ་ཡི་མིག་ནང་དབྱུག་པ་སོག་མ་ལྟར། ། མདུང་ཐུང་འཕེན་པའི་སྒྲ་ལ་དེ་ཡིས་འཕྱ། ། 30 དེ་ཡི་ལྟོ་འོག་རྫ་ལེབ་རྣོན་པོ་འདྲ། ། དེ་ནི་སོ་ཤལ་འདམ་ནང་དྲུད་པ་བཞིན། ། 31 དེ་ཡིས་མཚོ་གཏིང་སླ་ང་ལྟར་དུ་ཁོལ་བར་བཅུག ། རྒྱ་མཚོ་སླ་ང་ནང་གི་འབྱུག་སྣུམ་ལྟ་བུར་བྱས། ། 32 དེ་ཡིས་ཕྱིན་པའི་ལམ་ལ་འོད་ཟེར་འཕྲོ་བཅུག་ཅིང་། ། མཚོ་གཏིང་སྐྲ་དཀར་ལྟ་བུ་ཡིན་པའི་སྣང་བ་སྦྱིན། ། 33 བཀོད་པའི་ནང་དུ་འཇིགས་མེད་དེ་འདྲ་བ། ། ས་གཞིའི་སྟེང་དུ་མཚུངས་ཟླ་གང་ཡང་མེད། ། 34 ཁེངས་དྲེགས་ཅན་ལ་དེ་ཡིས་སྨད་པ་དང་། ། སྲོག་ཆགས་ང་རྒྱལ་ཅན་གྱི་རྒྱལ་པོ་ལགས། །

<- ཨེས་ཡོབ། 40ཨེས་ཡོབ། 42 ->