5 འོན་ཀྱང་ཁྱོད་ཀྱི་དགྲ་བོའི་ཚོགས་ནི་ས་རྡུལ་ལྟར་མང་ཞིང་། བཙན་ཤུགས་སྤྱོད་པའི་མི་རྣམས་ཀྱང་རླུང་གིས་གཏོར་བའི་ཕུབ་མ་བཞིན་མང་སྟེ། དེ་ནི་སྐད་ཅིག་ཙམ་དང་གློ་བུར་ཉིད་ལ་འབྱུང་བར་འགྱུར། 6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འབྲུག་སྒྲ་དང་ས་འགུལ། སྒྲ་ཆེན། འཁྱིལ་རླུང་། རླུང་ནག ཡོངས་རྫོགས་རྩ་མེད་གཏོང་བའི་མེ་བཅས་ཀྱིས་དེ་དག་ལ་ཆད་པ་གཅོད་པར་འགྱུར། 7 དུས་དེར་ཨ་རི་ཨེལ་ལ་རྒོལ་བའི་རྒྱལ་ཁབ་ཀུན་གྱི་དམག་དཔུང་སྟེ། ཨ་རི་ཨེལ་དང་དེའི་སྲུང་མཁར་ལ་རྒོལ་ཞིང་། དེ་ལ་གནོད་འཚེ་གཏོང་མཁན་ཐམས་ཅད་རྨི་ལམ་དང་མཚན་མོའི་སྣང་བ་ལྟར་འགྱུར་ཏེ། 8 ཡང་ལྟོ་བ་བཀྲེས་པའི་མི་ཞིག་གིས་རྨི་ལམ་དུ་ཟས་ཟ་བ་བཞིན། གཉིད་སད་དུས་སྔར་བཞིན་བཀྲེས་ལྟོགས་ཚོར་ཞིང་། ཁ་སྐོམ་པའི་མི་ཞིག་གིས་རྨི་ལམ་དུ་ཆུ་འཐུང་ཡང་། གཉིད་སད་དུས་སྔར་བཞིན་ཁ་སྐོམ་ཞིང་སེམས་ནས་ཆུ་འཐུང་འདོད་སྐྱེས། ཛ་ཡན་ལ་རྒོལ་བའི་རྒྱལ་ཁབ་ཀུན་གྱི་དམག་དཔུང་རྣམས་ཀྱང་དེ་བཞིན་ནོ། །
9 དེ་ཡང་ཁྱོད་རྣམས་ཧོན་འཐོར་ནས་ཧ་ལས་ཤིང་། རང་མགོ་རང་གིས་གཡོགས་ལ་རྨོངས་ཚོད་ཀྱིས་སྡོད་ཅིག ཁྱོད་རྣམས་བཟི་ཡང་རྒུན་ཆང་གིས་བཟི་བ་མིན། གོམ་ཁ་འཁྱོར་ཡང་ཆང་གར་པོས་འཁྱོར་བ་མིན། 10 དཀོན་མཆོག་ཡ་ཝཱེས་གཉིད་སྟུག་པོ་ཁུག་པའི་ཐུགས་ཉིད་ཁྱོད་ཀྱི་སྟེང་ལ་བླུགས་ཏེ། ཁོང་གིས་ཁྱོད་ཀྱི་མིག་སྟེ་ལུང་སྟོན་པའི་མིག་ནི་བཙུམ་པར་མཛད་པ་དང་། ཁྱོད་ཀྱི་མགོ་སྟེ་མངོན་ཤེས་པའི་མགོ་ཡང་བཀབ་པ་ཡིན།
11 ཁྱོད་རྣམས་ལ་མཚོན་ན་ལུང་བསྟན་དེ་ཐམས་ཅད་ནི་ཐམ་ཀ་བརྒྱབ་ཟིན་པའི་གླེགས་བམ་གྱི་གསུང་ཚིག་དང་འདྲ་སྟེ། མི་ཡིས་གླེགས་བམ་དེ་ཡི་གེ་ཤེས་མཁན་ལ་བསྟན་ནས་ན་རེ། འདི་བཀླག་རོགས་ཞུས་ཚེ། དེ་ན་རེ། འདི་ལ་ཐམ་ཀ་བརྒྱབ་ཡོད་པས་ངས་ཀློག་མི་ནུས་ཞེས་བརྗོད་ངེས། 12 ཡང་མི་ཡིས་གླེགས་བམ་དེ་ཡིག་རྨོངས་ཤིག་ལ་སྤྲད་དེ་ན་རེ། འདི་བཀླག་རོགས་ཞེས་ཞུས་ཀྱང་། དེས་ང་ཡིག་རྨོངས་ཡིན་ཞེས་བརྗོད་དོ། ། 13 དཀོན་མཆོག་ཡ་ཝཱེས་འདི་སྐད་དུ། མི་སྡེ་འདི་ནི་ཁ་བཤད་ཙམ་གྱིས་བདག་དང་ཉེ་ཞིང་། ཁ་ནས་བདག་ལ་བཀུར་ན་ཡང་། ཁོ་ཚོའི་སེམས་ནི་བདག་དང་རྒྱང་ཐག་རིང་བས། ཁོ་ཚོ་བདག་ལ་གུས་ཤིང་འཇིགས་པ་ནི་མིས་བསླབས་པའི་སྲོལ་ཙམ་ཡིན། 14 དེ་བས། ལྟོས་ཤིག བདག་གིས་མི་སྡེ་འདི་ལ་ངོ་མཚར་གྱི་དོན་ཏེ། ངོ་མཚར་གྱི་སྟེང་ལ་ངོ་མཚར་འབྱུང་དུ་བཅུག་ནས། ཁོ་ཚོ་ཤེས་རབ་ཅན་གྱི་ཤེས་རབ་ཉམས་ཤིང་། རིག་པ་ཅན་གྱི་རིག་པ་འགེབས་པར་འགྱུར་ཞེས་གསུངས་སོ། ། 15 རང་གི་ཇུས་འགོད་དཀོན་མཆོག་ཡ་ཝཱེ་ལ་སྦ་མཁན་རྣམས་ལ་ཆག་སྒོ་འབྱུང་། དེ་དག་གིས་ལྐོག་ནས་དོན་བསྒྲུབས་ཏེ་ན་རེ། སུས་ང་ཚོ་མཐོང་སྲིད། སུས་ང་ཚོ་ཤེས་སམ་ཞེས་པའོ། ། 16 ཁྱོད་ཀྱིས་གནས་ལུགས་གོ་ལྡོག་སྟེ། རྫ་བཟོ་ནི་ཅི་ལྟར་འཇིམ་པ་རུ་ལྟའམ། བཟོས་པར་གྱུར་པ་ཡིས་བཟོ་མཁན་ལ། དེས་ང་མ་བཟོས། ཡང་གྲུབ་རྫས་ཀྱིས་རང་ཉིད་བཟོ་མཁན་ལ། ཁོ་ལ་བློ་རིག་མི་ལྡན་ཞེས་སྨྲ་ནུས་སམ།