6 དེ་ནས་ཉིན་བཞི་བཅུ་འགོར་བ༌ན། ནོ་ཨས་དེ་སྔར་བཟོས་པའི་གྲུ་གཟིངས་ཀྱི་སྒེའུ་ཁུང་ཕྱེས་ཏེ། 7 བྱ་ཕོ་རོག་ཅིག་ཕྱིར་བཏང་བ༌དང༌། ས་སྟེང་གི་ཆུ་བྲི་བའི་བར་དུ་ཕོ་རོག་ཕར་ཚུར་འཕུར་བསྐྱོད་བྱས་པ༌རེད། 8 ཡང་ཁོས་ཕུག་རོན་ཅིག་ཕྱིར་བཏང་ནས་ཆུ་ས་སྟེང་ནས་བྲི་མིན་ལ་བལྟས༌ཀྱང༌། 9 ས་གཞི་ཡོངས་ལ་ད་དུང་ཆུས་བཀང་ཡོད་པས་ཕུག་རོན་ས་ལ་འབབ་ས་མེད་པར་ཕྱིར་གྲུ་གཟིངས་ཀྱི་ཕྱོགས་སུ་ནོ་ཨའི་རྩར་འཕུར་འོངས་པ༌དང༌། ཁོས་ལག་པ་བརྐྱངས་ནས་ཕུག་རོན་གྲུ་གཟིངས་ཀྱི་ནང་དུ་བླངས༌སོ།། 10 ཡང་ཉིན་བདུན་ལ་བསྒུགས༌རྗེས། ནོ་ཨས་སླར་ཡང་ཕུག་རོན་དེ་གྲུ་ལས་བཏང་བ༌ལ། 11 ས་རུབ་རྗེས་ཕུག་རོན་གྱི་མཆུ་ཏོར་སྐྱུ་རུ་རའི་ལོ་མ་གསར་པ་ཞིག་བཟུང་ནས་ཕྱིར་ཡོང༌བས། ནོ་ཨས་ས་སྟེང་གི་ཆུ་བྲི་སོང་བ་ཤེས༌སོ།། 12 ཡང་ཉིན་བདུན་ལ་བསྒུགས༌རྗེས། ནོ་ཨས་ཕུག་རོན་དེ་གྲུ་ལས་བཏང་བ་ལ་ཕུག་རོན་ཕྱིར་མ་ལོག༌གོ །
13 དེ་ནས་ནོ་ཨ་ལོ་དྲུག་བརྒྱ་དང་གཅིག་ལོན་པའི་ཟླ་དང་པོའི་ཚེས་གཅིག༌ཉིན། ས་སྟེང་གི་ཆུ་ཐམས་ཅད་བྲི༌ཞིང༌། ནོ་ཨས་གྲུ་གཟིངས་ཀྱི་དཀར་ཁུང་ཕྱེས་ནས་བལྟས་པ་ན་ས་ངོས་སྐམ་འདུག་པ༌མཐོང༌། 14 ཟླ་གཉིས་པའི་ཚེས་ཉེར་བདུན༌ཉིན་ས་གཞི་ཡོངས་སུ་སྐམ་པར་གྱུར༌ཏོ།།
15 དེ་ནས་དཀོན་མཆོག་གིས་ནོ་ཨ་ལ་འདི་སྐད༌དུ། 16 ཁྱོད་དང་ཁྱོད་ཀྱི་ཆུང་མ༌དང༌། བུ་དང་མནའ་མ་ཐམས་ཅད་གྲུ་གཟིངས་ལས་བོབས༌དང༌། 17 ཁྱོད་དང་མཉམ་དུ་ཡོད་པའི་སྲོག་ལྡན་ཐམས་ཅད༌དེ། འདབ་ཆགས༌དང༌། དུད༌འགྲོ། ལྟོ་འགྲོ་དང་འབུ་སྲིན་མཐའ་དག་ཕྱི་རོལ་ཏུ་ཁྲིད༌ཅིག ཅིའི་ཕྱིར་ཞེ༌ན། དེ་རྣམས་ས་སྟེང་དུ་ཧ་ཅང་མང་དུ་འབྱུང་བ༌དང༌། རྒྱུད་དང་ལྡན་པར་གྱུར་ནས་མང་པོར་འཕེལ་བར་འགྱུར་བའི་ཕྱིར་ཡིན་ཞེས་གསུངས༌སོ།། 18 དེ་ནས་ནོ་ཨ་དང་ཁོའི་ཆུང་མ༌དང༌། བུ་དང་མནའ་མ་བཅས་ཐམས་ཅད་ཕྱི་རོལ་ཏུ་ཐོན༌ཞིང༌། 19 དུད་འགྲོ་ཐམས་ཅད༌དང༌། ལྟོ་འགྲོ་འབུ༌སྲིན། འདབ༌ཆགས། ས་སྟེང་དུ་རྒྱུ་བའི་སྲོག་ཆགས་ཐམས་ཅད་ཀྱང་རང་རང་གི་རིགས་བཞིན་དུ་གྲུ་གཟིངས་ལས་ཕྱིར་བུད༌དོ།།
-
རི་རྒྱུད་ཨ་ར་རད་ཅེས་པ་ནི་དེང་སང་ཡ་གླིང་ནུབ་ཕྱོགས་ཀྱི་ཐུར་ཁེ་ཞེས་པའི་རྒྱལ་ཁུངས་སུ༌ཡོད།