1 དེ་ནས་ཡོ་སེབ་ཕཱར་ཨོལ་གྱི་དྲུང་དུ་སོང་ནས་འདི༌ལྟར། བདག་གི་ཕ་དང་སྤུན་རྣམས་ཀྱིས་ར་ལུག་གི་ཁྱུ་དང་བ་ཁྱུ་བཅས་རྒྱུ་ནོར་ཐམས་ཅད་ཁྱེར་ཏེ་ཀ་ན་ཨན་ཡུལ་ནས་ད་ལྟ་གོ་ཤེན་ཡུལ་དུ་སླེབས་བྱུང་ཞེས་སྨྲས་པ༌དང༌། 2 ཡོ་སེབ་ཀྱིས་རང་གི་སྤུན་རྣམས་ལས་མི་ལྔ་བདམས༌ཏེ། ཁོ་རྣམས་ཕཱར་ཨོལ་ལ་མཇལ་བར་ཁྲིད༌དོ།།

3 ཕཱར་ཨོལ་གྱིས་ཡོ་སེབ་ཀྱི་སྤུན་རྣམས་ལ་འདི་སྐད༌དུ། ཁྱོད་ཅག་གིས་ལས་ཅི་ཞིག་གཉེར་བ་ཡིན་ཞེས་དྲིས་པ༌དང༌། ཁོ་རྣམས་ན༌རེ། ཁྱེད་ཀྱི་ཞབས་ཕྱི་པ་རྣམས་ར་ལུག་གི་རྫི་བོ་ཡིན༌ལ། ངེད་ཅག་གི་མེས་པོ་རྣམས་ཀྱང་ར་ལུག་གི་རྫི་བོ་ཡིན་ཞེས་སྨྲས་པ༌དང༌། 4 ཡང་ཁོ་རྣམས་ན༌རེ། ཀ་ན་ཨན་ཡུལ་དུ་མུ་གེ་བྱུང་བ་ཚབས་ཆེ་བ༌དང༌། ཞབས་ཕྱི་པ་ངེད་ཅག་གི་ར་ལུག་གི་ཁྱུ་ལ་རྩྭ་མེད་པས་ངེད་རྣམས་ཡུལ་འདིར་ཡོང་བ༌ཡིན། དེའི༌ཕྱིར། རྒྱལ་པོ་ཁྱེད་ཀྱིས་ཞབས་ཕྱི་པ་ངེད་རྣམས་གོ་ཤེན་ཡུལ་ནས་འདུག་ཏུ་འཇུག་པར་མཛོད་ཅེས་སྨྲས༌སོ།།

5 ཕཱར་ཨོལ་གྱིས་ཡོ་སེབ་ལ་འདི་སྐད༌དུ། ཁྱོད་ཀྱི་ཕ་དང་སྤུན་རྣམས་ཁྱོད་ཀྱི་གནས་འདིར་ཡོང༌ངོ༌།། 6 ཨེ་ཅིབ་ཀྱི་ཡུལ་ཐམས་ཅད་ཁྱོད་ལ་དབང༌བས། ཁྱོད་ཀྱིས་རང་གི་ཕ་དང་སྤུན་རྣམས་ཆེས་བཟང་བའི་ས་ཆ་སྟེ་གོ་ཤེན་ཡུལ་ནས་འདུག་ཏུ་འཇུག་པར༌གྱིས། ཁྱོད་ཀྱིས་ཁོ་རྣམས་ཀྱི་ཁྲོད་དུ་མི་ནུས་པ་ཅན་ཡོད་པ་ཤེས༌ན། དེ་རྣམས་བདག་གི་ཕྱུགས་ཟོག་འཚོ་བར་མངགས་པར་གྱིས་ཞེས་སྨྲས༌སོ།།

7 དེར་ཡོ་སེབ་ཀྱིས་རང་གི་ཕ་ཡ་ཀོབ་ཁྲིད་ནས་ཕཱར་ཨོལ་གྱི་དྲུང་དུ་སོང་བ༌དང༌། ཡ་ཀོབ་ཀྱིས་ཕཱར་ཨོལ་ལ་བྱིན་རླབས་གནང་ངོ་།། 8 ཕཱར་ཨོལ་གྱིས་ཡ་ཀོབ་ལ་ལོ་ག་ཚོད་ཡིན་ཞེས་དྲིས་པ༌ན། 9 ཡ་ཀོབ་ན༌རེ། ང་རང་ད་ལྟའི་བར་འཇིག་རྟེན་དུ་ལོ་བརྒྱ་དང་སུམ་ཅུར་བསྡད་པ༌ཡིན། བདག་གི་ཚེ་ཐག་ཐུང་ཞིང་སྡུག་བསྔལ་མང་དུ༌མྱངས། བདག་ནི་མེས་པོ་རྣམས་འཇིག་རྟེན་དུ་འཚོ་གཞེས་གནང་བའི་ཚེ་ཐག་དང་བསྡུར་ཐབས་མེད་ཅེས་སྨྲས་པ༌དང༌། 10 ཡང་ཡ་ཀོབ་ཀྱིས་ཕཱར་ཨོལ་ལ་བྱིན་རླབས་གནང་རྗེས་ཁོང་དང་ཁ་བྲལ་ནས་སོང༌ངོ༌།།

11 ཡོ་སེབ་ཀྱིས་ཕཱར་ཨོལ་གྱི་བཀའ་བཞིན་དུ་ཨེ་ཅིབ་ཡུལ་གྱི་ཆེས་བཟང་བའི་ས་ཆ་སྟེ་རཱ་ཨམ་སེའེ་ཞེས་པའི་ཡུལ་དེ་རང་གི་ཕ་དང་སྤུན་རྣམས་ལ་ས་སྐལ་དུ་གནང་བ༌དང༌། 12 ཡོ་སེབ་ཀྱིས་རང་གི་ཕ༌དང༌། སྤུན་རྣམས༌དང༌། ཕ་ཡི་ཁྱིམ་མི་ཐམས་ཅད་ལའང་རང་རང་གི་བུ་ཕྲུག་གི་གྲངས་ཀ་ལྟར་འབྲུ་རིགས་གནང་སྟེ་བསྐྱངས༌སོ།།

13 དེ་ཡང་ཡུལ་ཐམས་ཅད་ལ་མུ་གེ་བྱུང་བ་ཚབས་ཆེ་བས་འབྲུ་རིགས་མེད་པར་གྱུར་པ༌དང༌། ཐ་ན་ཨེ་ཅིབ་ཡུལ་དང་ཀ་ན་ཨན་ཡུལ་གྱི་མི་རྣམས་ཀྱང་བཀྲེས་ལྟོགས་ཀྱིས་མ་བཟོད་པར་དྲན་མེད་དུ་བརྒྱལ་བར༌གྱུར། 14 ཡོ་སེབ་ཀྱིས་འབྲུ་རིགས་བཙོངས་པའི་ཨེ་ཅིབ་ཡུལ་དང་ཀ་ན་ཨན་ཡུལ་གྱི་དངུལ་སྒོར་ཐམས་ཅད་བསྡུས་ཏེ་ཕཱར་ཨོལ་གྱི་ཕོ་བྲང་དུ་ཁྱེར་སོང༌ངོ༌།། 15 ཨེ་ཅིབ་ཡུལ་དང་ཀ་ན་ཨན་ཡུལ་གྱི་དངུལ་སྒོར་ཐམས་ཅད་བཀོལ་ཚར་སོང༌བས། ཨེ་ཅིབ་ཀྱི་མི་ཚོགས་ཐམས་ཅད་ཡོང་ནས་ཡོ་སེབ་ལ་མཇལ་ཏེ་ན༌རེ། ངེད་ཅག་གི་དངུལ་སྒོར་ཐམས་ཅད་བཀོལ་ཚར་སོང་བས་ངེད་རྣམས་ལ་འབྲུ་རིགས་གནང་བར༌ཞུ། ངེད་ཅག་ཁྱེད་ཀྱི་མིག་མདུན་ནས་འཆི་དགོས་པའི་རྒྱུ་མཚན་ཅི་ཞེས་སྨྲས༌སོ།།

16 ཡོ་སེབ་ན༌རེ། གལ༌ཏེ། ཁྱོད་རྣམས་ཀྱི་དངུལ་སྒོར་བཀོལ་ཚར་བ་ཡིན༌ན། ཁྱོད་ཅག་གི་ཕྱུགས་ཟོག་བདག་ལ་སྤྲད་ཀྱང་ཆོག་པ༌དང༌། བདག་གིས་ཁྱོད་རྣམས་ཀྱི་ཕྱུགས་ཟོག་གི་ཚབ་ཏུ་འབྲུ་རིགས་སྟེར་ཞེས་སྨྲས༌སོ།། 17 དེའི༌ཕྱིར། མང་ཚོགས་ཀྱིས་སྒོ་ཕྱུགས་དེད་ནས་ཡོ་སེབ་ཀྱི་དྲུང་དུ་ཡོང་བ༌དང༌། ཡོ་སེབ་ཀྱིས་འབྲུ་རིགས་ནི་རྟ༌དང༌། ར་ལུག༌དང༌། བ་གླང༌དང༌། བོང་བུ་བཅས་ལ་བརྗེས༌ཤིང༌། ལོ་དེར་སྒོ་ཕྱུགས་དང་འབྲུ་རིགས་བརྗེ་རེས་བྱས་པས་མི་ཚོགས་དེ་རྣམས་ལོ་གཅིག་གི་རིང་ལ་འཚོ་ཐུབ་པར་གྱུར༌ཏོ།།

18 དེ་ཡང་ལོ་དེ་འདས་པ་དང་ལོ་གཉིས་པར་མང་ཚོགས་རྣམས་ཡང་ཡོང་སྟེ་ཡོ་སེབ་ལ་འདི༌ལྟར། ངེད་ཅག་གིས་རང་གི་བདག་པོ་ལ་གསང་བ་མིན༌ཏེ། ངེད་རྣམས་ཀྱི་དངུལ་སྒོར་བཀོལ་ཚར་བ་དང་ཕྱུགས་ཟོག་ཀྱང་ཁྱེད་ལ་བརྗེས་ཚར༌བས། ད་ལྟ་རང་གི་བདག་པོ་ལ་ངེད་ཅག་གི་ལུས་པོ་དང་ས་ཆ་ལས་གཞན་ཅི་ཡང་ལྷག་མེད༌དོ།། 19 ཁྱེད་ཀྱིས་ངེད་ཅག་འཆི་བ་དང་ཡུལ་འདི་ས་སྟོང་དུ་ལུས་པར་བལྟ་བཟོད༌དམ། ཁྱེད་ཀྱིས་འབྲུ་རིགས་ལ་བརྟེན་ནས་ངེད་ཅག་དང་ས་ཆ་ཉོ་བར་བྱེད་པ༌དང༌། ངེད་ཅག་དང་ངེད་ཅག་གི་ས་ཆ་ནི་ཕཱར་ཨོལ་ལ་དབང་བར༌མཛོད། ངེད་རྣམས་མི་འཆི་བར་འཚོ་བ་དང་ས་ཞིང་ཡང་དབེན་སྟོང་དུ་མི་འགྱུར་བའི་ཆེད༌དུ། ཁྱེད་ཀྱིས་ངེད་ཅག་ལ་འབྲུ་རིགས་ཀྱི་ས་བོན་གནང་བར་མཛོད་ཅིག་ཅེས་སྨྲས༌སོ།།

20 དེ་ནས་ཡོ་སེབ་ཀྱིས་ཕཱར་ཨོལ་ལ་ཨེ་ཅིབ་ཡུལ་ཐམས་ཅད་ཉོས༌ཤིང༌། ཨེ་ཅིབ་ཀྱི་མི་རྣམས་ལ་མུ་གེ་ཚབས་ཆེན་བྱུང་བའི་རྐྱེན་གྱིས་མི་ཚང་མས་རང་རང་གི་ས་ཞིང་ཡང་བཙོངས༌པས། ཡུལ་དེ་ཐམས་ཅད་ཕཱར་ཨོལ་ལ་དབང་བར༌གྱུར། 21 ཡོ་སེབ་ཀྱིས་མང་ཚོགས་རྣམས་ཨེ་ཅིབ་ཡུལ་གྱི་གྲོང་ཁྱེར་གཞན་དག་ལ་འགྲོ་རུ་བཅུག༌གོ ། [a] 22 འོན༌ཀྱང༌། ཡོ་སེབ་ཀྱིས་མཆོད་དཔོན་རྣམས་ཀྱི་ས་ཆ་མ་ཉོས༌སོ། །ཅིའི་ཕྱིར་ཞེ༌ན། ཕཱར་ཨོལ་གྱིས་ལོ་རེ་བཞིན་མཆོད་དཔོན་རྣམས་ལ་ཟས་སྐལ་གནང་བ༌དང༌། ཟས་སྐལ་དེ་ལ་བརྟེན་པའི་དབང་གིས་ཁོ་རྣམས་ཀྱིས་རང་གི་ས་ཆ་མ་བཙོང་བའི་ཕྱིར༌རོ།།

23 ཡོ་སེབ་ཀྱིས་མང་ཚོགས་ལ་འདི་སྐད༌དུ། ལྟོས༌དང༌། དེ་རིང་བདག་གིས་ཕཱར་ཨོལ་གྱི་ཆེད་དུ་ཁྱོད་ཅག་དང་ཁྱོད་རྣམས་ཀྱི་ས་ཆ་ཉོས་པ༌ཡིན། བདག་གིས་འདི་རུ་ཡོད་པའི་ས་བོན་ཁྱོད་ཅག་ལ་སྟེར་བར༌བྱ། ཁྱོད་ཅག་གིས་ཞིང་འདེབས་པར༌གྱིས། 24 སྟོན་བསྡུ་བའི་སྐབས༌སུ། འབྲུ་རིགས་ཀྱི་ལྔ་ཆ་གཅིག་ཕཱར་ཨོལ་ལ་ཁྲལ་འཇལ་བ༌དང༌། ལྔ་ཆ་བཞི་རང་ལ་དབང་ཞིང་ས་བོན་དུ་བྱས་ཀྱང་ཆོག༌ལ། ཁྱོད་ཅག་དང་ཁྱོད་ཅག་གི་ཁྱིམ་མི་ཡོངས་ཀྱི་ཟས་རིགས་སུ་བྱས་ཀྱང་ཆོག་ཅེས་སྨྲས་པ༌དང༌། 25 མང་ཚོགས་ན༌རེ། ཀྱེ། ཁྱེད་ཀྱིས་ངེད་ཅག་གི་སྲོག་བསྐྱབས་པར་མཛད༌པས། ངེད་ཅག་ལ་བདག་པོ་ཁྱེད་ཀྱི་སྤྱན་ལམ་ནས་ཐུགས་རྗེ་འཐོབ་པར༌སྨོན། ངེད་ཅག་ཕཱར་ཨོལ་གྱི་གཡོག་པོར་འགྱུར་བར་སྨོན་ཞེས་སྨྲས༌སོ།།

26 དེའི༌ཕྱིར། ཕཱར་ཨོལ་ལ་ལྔ་ཆ་གཅིག་གི་ཁྲལ་འཇལ་བ༌དང༌། མཆོད་དཔོན་གྱི་ས་ཆ་རྒྱལ་པོར་མི་དབང་བ་འདི༌ནི། ཡོ་སེབ་ཀྱིས་ཨེ་ཅིབ་ཡུལ་དུ་གཏན་ལ་ཕབ་པའི་སྒྲིག་ཁྲིམས་ཡིན་ཞིང་ད་ལྟའི་བར་དུ་ཡོད༌དོ།།

27 དེ་ཡང་ཡེས་ར་ཨེལ་གྱི་མི་རྣམས་ཨེ་ཅིབ་ཡུལ་གྱི་གོ་ཤེན་ཡུལ་དུ་བསྡད་ཅིང་གནས་དེར་དབང་བསྒྱུར་བ༌དང༌། དེ་རུ་རིགས་རྒྱུད་མང་དུ་འཕེལ་བར་གྱུར༌ཏོ།།

28 ཡ་ཀོབ་ནི་ཨེ་ཅིབ་ཡུལ་དུ་ལོ་འཁོར་བཅུ་བདུན་ལ་བསྡད་པ་དང་ཁོའི་ཚེ་ཐག་ལོ་བརྒྱ་དང་ཞེ་བདུན་ཡིན༌ལ། 29 ཡེས་ར་ཨེལ་ཚེ་ལས་འདའ༌ཁར། ཁོས་བུ་ཡོ་སེབ་བོས་ཏེ་འདི་སྐད༌དུ། གལ༌ཏེ། བདག་ལ་ཁྱོད་ཀྱི་མིག་མདུན་ནས་ཐུགས་རྗེ་ཐོབ༌ན། ཁྱོད་ཀྱིས་རང་གི་ལག་པ་བདག་གི་བརླ་འོག་ཏུ་འཇོག་པར༌གྱིས། བྱམས་སྙིང་རྗེ་དང་དྲང་བདེན་གྱི་སྒོ་ནས་བདག་ལ་གཅེས་པར༌གྱིས། བདག་གི་བེམ་པོ་ཨེ་ཅིབ་ཡུལ་དུ་དུར་ལ་འཇུག་པར་མི༌བྱའོ།། 30 ང་རང་ཚེ་ལས་འདས༌རྗེས། ཁྱོད་ཀྱིས་བདག་གི་བེམ་པོ་ཨེ་ཅིབ་ཡུལ་ནས་ཁྱེར་ཏེ་མེས་པོ་རྣམས་དང་ལྷན་དུ་དུར་ལ་འཇུག་པར་གྱིས་ཞེས་སྨྲས་པ༌ལ། ཡོ་སེབ་ན༌རེ། བདག་གིས་ཁྱེད་ཀྱི་གསུང་བཞིན་དུ་བསྒྲུབ་ངེས་ཡིན་ཞེས་སྨྲས་པ༌དང༌། 31 ཡེས་ར་ཨེལ་ན༌རེ། འོ༌ན། ཁྱོད་ཀྱིས་བདག་ལ་དམ་བཅའ་འཇོག་པར་གྱིས་ཞེས་སྨྲས་པ༌དང༌། ཡོ་སེབ་ཀྱིས་ཕ་ལ་དམ་བཅའ་བཞག༌ཅིང༌། ཡེས་ར་ཨེལ་གྱིས་མལ་ཁྲིའི་སྔས་མགོ་ནས་གུས་ཕྱག་ཕུལ་ཏོ།།

<- བཀོད་པ། 46བཀོད་པ། 48 ->