1 དེ་ནས་རཱ་ཧེལ་གྱིས་རང་གི་ཁྱོ་ག་ཡ་ཀོབ་ལ་ཕྲུ་གུ་སྐྱེ་མ་ཐུབ་པ་ཤེས་ཏེ་གཅེན་མོ་ལེ་ཨ་ལ་ཕྲག་དོག་བྱས་ནས་ཡ་ཀོབ་ལ་འདི་ལྟར་སྨྲས༌པ། ཁྱོད་ཀྱིས་བདག་ལ་ཕྲུ་གུ་སྐྱེ་བར་མཛོད༌ཅིག དེ་ལྟར་མི་བྱེད་ན་བདག་འཆིའོ་ཞེས་པ༌ལ། 2 ཡ་ཀོབ་ཁོང་ཁྲོ་ལངས་ཏེ་རཱ་ཧེལ་ལ་འདི་ལྟར་སྨྲས༌པ། ཁྱོད་ལ་ཕྲུ་གུ་མི་སྐྱེ་བར་མཛད་མཁན་ནི་དཀོན་མཆོག་ཡིན་པ༌ལས། བདག་གིས་ཁོང་གི་འཐུས་ཚབ་བྱེད་ག་ལ་ནུས་ཞེས་པ༌ན། 3 རཱ་ཧེལ་ན༌རེ། བདག་གི་གཡོག་མོ་པིལ་ཧ་འདི་རུ་ཡོད༌པས། ཁྱོད་ཁོ་མོར་ལུས་འབྲེལ་བྱེད་ཅིང་ཁོ་མོས་བདག་ལ་ཕྲུ་གུ་སྐྱེ་བར་བྱས༌ན། བདག་ལ་ཁོ་མོ་བརྒྱུད་ནས་ཕྲུ་གུ་ཡོད་པར་འགྱུར་ཞེས་སྨྲས༌སོ།། 4 དེའི་ཕྱིར་རཱ་ཧེལ་གྱིས་ཁོ་མོའི་གཡོག་མོ་པིལ་ཧ་རང་གི་ཁྱོ་གའི་ཆུན་མར་བཅོས་ཏེ་ཁོ་གཉིས་ལུས་འབྲེལ་བྱེད་དུ་བཅུག༌གོ ། 5 དེ་ནས་པིལ་ཧ་ལ་མངལ་སྦྲུམ་སྟེ་ཡ་ཀོབ་ལ་བུ་ཞིག་བཙས་པ༌རེད། 6 དེར་རཱ་ཧེལ་ན༌རེ། དཀོན་མཆོག་གིས་བདག་ལ་ཐུགས་རྗེས་གཟིགས་ཤིང་བདག་གི་སྐད་ལའང་གསན༌པས། བདག་ལ་བུ་ཞིག་གནང་བྱུང་ཞེས་སྨྲས་པའི༌ཕྱིར། བུའི་མིང་ལ་དཱན་ [a]ཞེས་བཏགས༌སོ།། 7 རཱ་ཧེལ་གྱི་གཡོག་མོ་པིལ་ཧ་ལ་ཡང་མངལ་སྦྲུམ་སྟེ་ཡ་ཀོབ་ལ་བུ་གཉིས་པ་བཙས༌སོ།། 8 ཡང་རཱ་ཧེལ་ན༌རེ། བདག་གིས་གཅེན་མོ་དང་འགྲན་རྩོད་བྱས་ཤིང་ཁོ་མོ་ལས་རྣམ་པར་རྒྱལ་བ་ཡིན་ཞེས་སྨྲས་པའི༌ཕྱིར། བུ་གཉིས་པའི་མིང་ལ་ནཱབ་ཐ་ལི་ [b]ཞེས་བཏགས༌སོ།།

9 དེ་ཡང་ལེ་ཨས་རང་ལ་མངལ་སྦྲུམ་མཚམས་ཆད་པ་ཤེས་ཏེ་རང་གི་གཡོག་མོ་ཟིལ་པཱ་ཞེས་བྱ་བ་ཡ་ཀོབ་ཀྱི་ཆུན་མར་བཅོས༌སོ།། 10 དེ་ནས་ལེ་ཨའི་གཡོག་མོ་ཟིལ་པཱ་ཞེས་བྱ་བས་ཡ་ཀོབ་ལ་བུ་ཞིག་བཙས༌སོ།། 11 དེར་ལེ་ཨ་ན༌རེ། ཤིན་ཏུ་ལེགས་སོ་ཞེས་སྨྲས་པའི༌ཕྱིར། བུའི་མིང་ལ་གཱ་རྡུ་ [c]ཞེས་བཏགས༌སོ།། 12 ལེ་ཨའི་གཡོག་མོ་ཟིལ་པཱ་ཞེས་བྱ་བས་ཡང་ཡ་ཀོབ་ལ་བུ་གཉིས་པ་བཙས༌སོ།། 13 དེ་ནས་ལེ་ཨ་ན༌རེ། བདག་ནི་ཅི་འདྲའི་དགའ་ཞིང་སྤྲོ་བ༌ལ། བུད་མེད་རྣམས་ཀྱིས་ཀྱང་བདག་ལ་དགའ་ཞིང་སྤྲོའོ་ཞེས་འབོད་པར་འགྱུར་ཞེས་སྨྲས་པའི༌ཕྱིར། བུའི་མིང་ལ་ཨ་ཤེར་ [d]ཞེས་བཏགས༌སོ།།

14 དེ་ཡང་སྟོན་ཁར་གྲོ་འབྲེག་པའི་དུས༌སུ། རུ་བེན་ཞིང་ནང་དུ་སོང་ནས་དུའུ་དཱ་ [e]ཞེས་པའི་རྩྭ་སྨན་བཙལ་ཏེ་ཡུམ་ལེ་ཨ་ལ་སྤྲད་དོ། །དེ་ནས་རཱ་ཧེལ་གྱིས་ལེ་ཨ་ལ་འདི༌ལྟར། ཁྱོད་ཀྱིས་རང་གི་བུ་ཡི་རྩྭ་སྨན་དུའུ་དཱ་དེ་བདག་ལའང་ཉུང་ཙམ་གནང་བར་འཚལ་ཞེས་སྨྲས་པ༌ལ། 15 ལེ་ཨ་ན༌རེ། ཁྱོད་ཀྱིས་བདག་གི་ཁྱོ་ག་ཕྲོགས་པ་དོན་ཆུང་ངུ་ཞིག་ཡིན༌ནམ། ད་ལྟ་བདག་གི་བུ་ཡི་དུའུ་དཱ་ཡང་འཕྲོག་འདོད་དམ་ཞེས་པ༌ན། རཱ་ཧེལ་ན༌རེ། ཁྱོད་ཀྱི་བུ་ཡི་རྩྭ་སྨན་དུའུ་དཱ་ཡི་ཆེད༌དུ། ཡ་ཀོབ་དོ་དགོང་ཁྱོད་དང་འགྲོགས་པར་བྱེད་ཅེས་སྨྲས༌སོ།། 16 ཉིན་དེའི་མཚན༌མོར། ཡ་ཀོབ་ཞིང་ཁ་ནས་ཕྱིར་ལོག་པ༌ན། ལེ་ཨ་ནི་ཡ་ཀོབ་ཀྱི་མདུན་བསུ་རུ་སོང་སྟེ་ཁྱོད་བདག་དང་འགྲོགས་པར༌བྱ། ཅིའི་ཕྱིར་ཞེ༌ན། བདག་གིས་རང་གི་བུ་ཡི་རྩྭ་སྨན་དུའུ་དཱ་ལ་བརྟེན་ནས་ཁྱོད་རང་གླས་པ་ཡིན་ཞེས་སྨྲས་པ་དང་མཚན་མོ་དེར་ཁོ་གཉིས་ལུས་འབྲེལ་བྱས༌སོ།། 17 དཀོན་མཆོག་གིས་ལེ་ཨ་ལ་གསན་ནས་ཁོ་མོར་མངལ་སྦྲུམ་སྟེ་ཁོ་མོས་ཡ་ཀོབ་ལ་བུ་ལྔ་པ་བཙས༌སོ།། 18 དེ་ནས་ལེ་ཨ་ན༌རེ། དཀོན་མཆོག་གིས་བདག་ལ་གླ་ཆ་གནང༌ངོ༌། །ཅིའི་ཕྱིར་ཞེ༌ན། ངས་རང་གི་གཡོག་མོ་རང་གི་ཁྱོ་ག་ལ་སྤྲད་པའི་ཕྱིར་ཡིན་ཞེས་སྨྲས་པའི་རྐྱེན༌གྱིས། བུ་ལྔ་བའི་མིང་ལ་ཡེས་སི་ཀཱར་ [f]ཞེས་བཏགས༌སོ།། 19 ལེ་ཨར་ཡང་མངལ་སྦྲུམ་སྟེ་ཡ་ཀོབ་ལ་བུ་དྲུག་པ་བཙས༌སོ།། 20 དེ་ནས་ལེ་ཨ་ན༌རེ། དཀོན་མཆོག་གིས་བདག་ལ་བྱ་དགའ་ལེགས་པོ་གནང་ཞིང་། བདག་གི་ཁྱོ་ག་བདག་དང་མཉམ་དུ་འདུག་ངེས༌ཡིན། ཅིའི་ཕྱིར་ཞེ༌ན། བདག་གིས་ཡ་ཀོབ་ལ་བུ་དྲུག་བཙས་པའི་ཕྱིར་རོ་ཞེས་སྨྲས་པའི༌ཕྱིར། བུ་དྲུག་པའི་མིང་ལ་ཟེ་བུ་ལུན་ [g]ཞེས་བཏགས༌སོ།། 21 དེའི་རྗེས༌སུ། ཡང་ལེ་ཨས་བུ་མོ་ཞིག་བཙས་ཤིང་ཁོ་མོའི་མིང་ལ་དི་ནཱ་ཞེས་བཏགས༌སོ།།

22 དེ་ཡང་དཀོན་མཆོག་གིས་རཱ་ཧེལ་ལ་ཐུགས་རྗེ་དགོངས་ཏེ་ཁོ་མོར་མངལ་སྦྲུམ་ནུས་པར་མཛད༌དོ།། 23 རཱ་ཧེལ་ལ་མངལ་སྦྲུམ་སྟེ་བུ་ཞིག་བཙས་པ༌དང༌། ཁོ་མོ་ན༌རེ། དཀོན་མཆོག་གིས་བདག་གི་ངོ་ཚ་སེལ་ཏོ་ཞེས༌དང༌། 24 དཀོན་མཆོག་ཡ་ཝཱེས་ད་དུང་བདག་ལ་བུ་ཞིག་སྩོལ་བར་སྨོན་ཞེས་སྨྲས་པའི༌ཕྱིར། བུའི་མིང་ལ་ཡོ་སེབ་ [h]ཅེས་བཏགས༌སོ།།

25 དེ་ཡང་རཱ་ཧེལ་གྱིས་ཡོ་སེབ་བཙས་པའི་རྗེས༌སུ། ཡ་ཀོབ་ཀྱིས་ལཱ་པན་ལ་འདི༌ལྟར། ཁྱེད་ཀྱིས་བདག་རང་ཡུལ་དུ་འགྲོ་རུ་མཛོད༌ཅིག 26 བདག་གིས་ཁྱེད་ལ་ཞབས་ཕྱི་བསྒྲུབས་ནས་ཐོབ་པའི་ཆུང་མ་དང་བུ་ཕྲུག་རྣམས་བདག་ལ་གནང་སྟེ་ང་རང་འགྲོ་རུ་ཆུག ངས་ཁྱེད་ལ་ཞབས་ཕྱི་ཇི་ལྟར་བསྒྲུབས་པ་ཁྱེད་ཀྱིས་ཤེས་སོ་ཞེས་སྨྲས་པ༌ལ། 27 ལཱ་པན་ན༌རེ། གལ༌ཏེ། བདག་ཁྱོད་ཀྱི་སེམས་ཁོང་དུ་ཡོད༌ན། ཁྱོད་བདག་དང་མཉམ་དུ་འདུག་པར༌གྱིས། བདག་གིས་མོ་བཏབ་པ་ལྟར་དཀོན་མཆོག་ཡ་ཝཱེས་བདག་ལ་བྱིན་རླབས་གནང་བ་ནི་ཁྱོད་ཀྱི་རྐྱེན་གྱིས་ཡིན་པའི་ཕྱིར་རོ་ཞེས༌དང༌། 28 ཡང་ལཱ་པན་ན༌རེ། ཁྱོད་ལ་གླ་ཆ་ག་ཙམ་དགོས་པ་ཤོད༌ཅིག བདག་གིས་ཁྱོད་ལ་སྟེར་ངེས་ཡིན་ཞེས་སྨྲས་པ༌དང༌། 29 ཡ་ཀོབ་ན༌རེ། བདག་གིས་ཁྱེད་ལ་ཞབས་ཕྱི་ཇི་ལྟར་བསྒྲུབས་པ༌དང༌། བདག་གིས་ཁྱེད་ཀྱི་ཕྱུགས་ཟོག་ཇི་ལྟར་འཚོས་པ་ནི་ཁྱེད་ཀྱིས་ཤེས་གསལ་ལྟར༌རོ།། 30 བདག་མ་ཡོང་བའི་སྔོན༌དུ། ཁྱེད་ཀྱི་ཕྱུགས་ཟོག་ཤིན་ཏུ་ཉུང་ཡང་ད་ལྟ་འཕེལ་ཁ་རྒྱས་པ་དང༌། བདག་གིས་གོམ་པའི་འདེགས་འཇོག་གང་ལ་བསྒྱུར་ནའང་དཀོན་མཆོག་ཡ་ཝཱེས་ཁྱེད་ལ་བྱིན་རླབས་གནང༌ངོ༌། །ད་ལྟ་རང་གི་ཁྱིམ་གཞིས་སྐྱོང་བའི་དུས་ནི་ནམ་ཞིག་གམ་ཞེས་སྨྲས་པ༌ལ། 31 ཡང་ལཱ་པན་ན༌རེ། བདག་གིས་ཁྱོད་ལ་ཅི་ཞིག་སྟེར་རམ་ཞེས་པ༌ན། ཡ་ཀོབ་ན༌རེ། བདག་ལ་རེ་བ་གཅིག་ཁོ་ན་ཡོད་པ་ལས༌གཞན། ཁྱེད་ཀྱིས་བདག་ལ་ཅི་ཡང་སྟེར་མི་དགོས༌སོ། །གལ༌ཏེ། ཁྱེད་ཀྱིས་ཁས་ལེན་པར་བྱེད༌ན། བདག་སླར་ཡང་ཁྱེད་ཀྱི་ལུག་རྫི་བྱེད་འདོད༌དོ།། 32 དེ་རིང་བདག་ཁྱེད་ཀྱི་ལུག་ཁྱུ་ཐམས་ཅད་ཀྱི་ཁྲོད་དུ་སོང་ནས་ལུག་ནག་ཐིག་ཅན༌དང༌། ཐིག་ལེ༌ཅན། ལུ་གུ་ནག་པོ་ཅན་བཅས༌དང༌། ཡང་ར་མའི་ཁྲོད་ཀྱི་ནག་ཐིག་ཅན་དང་ཐིག་ལེ་ཅན་བཅས་བདམས་ནས་དེ་དག་བདག་གི་གླ་ཆ་ཡིན་པར༌བྱའོ།། 33 ཕྱིས་སུ་ཁྱེད་བདག་གི་གླ་ཆ་ལ་ལྟ་ཞིབ་བྱེད་དུ་ཡོང་བ༌ན། བདག་གི་ར་ལུག་གཉིས་ལས་ར་མ་ནི་ནག་ཐིག་ཅན་དང་ཐིག་ལེ་ཅན༌དང༌། ལུག་ནི་ནག་པོ་ཅན་བཅས་མ་ཡིན༌ན། བདག་གིས་རྐུ་བྱས་པའི་རྟགས་སུ་འགྱུར་བར་མ༌ཟད། བདག་གི་གཞུང་རྒྱུད་དྲང་མིན་ལའང་བདེན་དཔང་བྱེད་ནུས་པ་ཡིན་ཞེས་སྨྲས་པ༌དང༌། 34 ཡང་ལཱ་པན་ན༌རེ། དེ་ལེགས༌སོ། །ཁྱོད་ཀྱིས་སྨྲས་པ་བཞིན་གྱུར་ཅིག་ཅེས་སྨྲས༌སོ།། 35 ཉིན༌དེར། ལཱ་པན་གྱིས་ར་ཐུག་སྟག་རིས་ཅན་དང་ཐིག་ལེ་ཅན་གང་ཡོད་པ་ཐམས་ཅད༌དང༌། ར་མ་ནག་ཐིག་ཅན་དང་ཐིག་ལེ༌ཅན། དཀར་ཁྲ་ཅན་མཐའ་དག༌དང༌། ལུག་ནག་པོ་ཅན་བཅས་བདམས་ཏེ་ཁོའི་བུ་ཕྲུག་རྣམས་ལ་བཅོལ་བ༌དང༌། 36 ཡང་ཁོ་དང་ཡ་ཀོབ་གཉིས་ནི་ཉིན་གསུམ་གྱི་ལམ་ཐག་ཏུ་ཁ་གྱེས་པ༌དང༌། ཡ་ཀོབ་ཀྱིས་མུ་མཐུད་དུ་ལཱ་པན་གྱི་ར་ལུག་གི་ཁྱུ་གཞན་དག་འཚོས༌སོ།།

37 དེ་ནས་ཡ་ཀོབ་ཀྱིས་ཤིང་སྦྱར་བ༌དང༌། སྟར་ཀའི་སྡོང་པོ། ཤིང་ཙི་ནཱར་བཅས་ཀྱི་མཉེན་ལྕུག་ཡལ་གའི་ཕྱི་ཤུན་ཤར་མ་རེ་རེ་བཞིན་བཤུས་ཏེ་ཡལ་གའི་ཁ་དོག་དཀར་པོ་མངོན་དུ་བཅུག༌རྗེས། 38 ཕྱི་ཤུན་བཤུས་པའི་ཡལ་ག་ཁྲ་བོ་དེ་དག་ཆུ་རྐ་དང་ཆུ་གཞོང་ནང་དུ༌བཙུགས། དེ་ནི་ལུག་ཁྱུ་རྣམས་ཆུ་འཐུང་དུ་ཡོང་བའི་སྐབས༌སུ། ར་ལུག་ཕོ་མོ་དག་གིས་འཁྲིག་པ་སྤྱོད་པའི་ཕྱིར༌རོ།། 39 དེ་ལྟར་ར་ལུག་དག་གིས་ཡལ་ག་ཁྲ་བོ་མཐོང་སྟེ་འཁྲིག་སྦྱོར་བྱས་ནས་ར་ལུག་གི་ཁྱུ་ཡིས་སྟག་རིས་ཅན༌དང༌། ཐིག་ལེ༌ཅན། ནག་ཐིག་ཅན་བཅས་རྩེབས་པ༌རེད། 40 དེ་ནས་ཡ་ཀོབ་ཀྱིས་ལུ་གུ་རྣམས་སོ་སོར་བཀར་བ༌དང༌། ལཱ་པན་གྱི་ལུག་ཁྱུ་ལས་ར་ལུག་སྟག་རིས་ཅན་དང་ར་ལུག་ནག་པོ་ཅན་བཅས༌དང༌། ར་ལུག་དཀར་པོའི་ཁྱུ་གཉིས་སོ་སོར་བཀར་ནས་ཁ་གཏད་དུ་བཞག་པ༌དང༌། རང་ཉིད་ཀྱི་ལུ་གུ་ནི་ལཱ་པན་གྱི་ལུག་ཁྱུ་དང་མི་འདྲེས་པར་བྱས༌སོ།། 41 དེ་ཡང་ར་ལུག་ཤ་ཤེད་ཅན་དག་གིས་འཁྲིག་པ་སྤྱོད་པའི་སྐབས༌སུ། ཡང་ཡ་ཀོབ་ཀྱིས་ཡལ་ག་ཁྲ་བོ་དེ་དག་ཆུ་རྐའི་ནང་དུ་བཙུགས༌ཏེ། ར་ལུག་ཕོ་མོ་དག་ལ་ཡལ་ག་ཁྲ་བོ་མཐོང་ས་ནས་འཁྲིག་པ་སྤྱོད་དུ་བཅུག༌གོ ། 42 འོན༌ཀྱང༌། ར་ལུག་རིད་པ་རྣམས་ཀྱིས་འཁྲིག་པ་སྤྱོད་པའི་སྐབས༌སུ། ཡལ་ག་ཁྲ་བོ་དེ་འཛུགས་པར་མི་བྱེད༌དོ། །དེ་ལྟར་ར་ལུག་རིད་པ་དག་ལཱ་པན་ལ་བགོས་པ་དང་ར་ལུག་ཤ་ཤེད་ཅན་རྣམས་རང་ལ་དབང་བར་བྱས༌པས། 43 ཡ་ཀོབ་ལ་ར་ལུག༌དང༌། གཡོག་པོ་དང་གཡོག༌མོ། རྔ་མོང་དང་བོང་བུ་མང་པོ་ཐོབ་སྟེ་འབྱོར་ཕྱུག་ལྡན་པར་གྱུར༌ཏོ།།

<- བཀོད་པ། 29བཀོད་པ། 31 ->