1 ཀྱེ། ག་ལད་ཡཱ་པ༌བླུན་པོ་རྣམས། ཡེ་ཤུ་མཱ་ཤི་ཀ་ཇི་ལྟར་ཤིང་རྒྱ་གྲམ་གྱི་སྟེང་དུ་བརྡབས་པའི་དོན་དེ་ཁྱོད་ཅག་གི་མིག་མདུན་དུ་གསལ་པོར་བཤམས༌ནའང༌། སུ་ཞིག་གིས་ཁྱོད་རྣམས་བསླུས་པ་ཡིན༌ནམ། 2 ངས་ཁྱོད་རྣམས་ལ་དོན་གཅིག་ཁོ་ན་དྲི་བར་བྱ༌སྟེ། ཁྱོད་རྣམས་ལ་དམ་པའི་ཐུགས་ཉིད་ཐོབ་པ་ནི་བཀའ་ཁྲིམས་ལྟར་བསྒྲུབས་པའི་རྐྱེན་གྱིས་ཡིན༌ནམ། ཡང་ན་འཕྲིན་བཟང་ལ་མཉན་ནས་དད་པ་བྱས་པའི་རྐྱེན་གྱིས་ཡིན། 3 ཁྱོད་ཅག་གིས་དམ་པའི་ཐུགས་ཉིད་ལ་བརྟེན་ནས་འགོ་བརྩམས༌མོད། འོན་ཀྱང་ད་ལྟ་ཁྱོད་ཅག་གིས་ཤ་ཁྲག་གི་ཕུང་བོར་བརྟེན་ནས་ལས་དེ་བསྒྲུབ་ཐུབ་བམ་ཞེ་ན་མི་ཐུབ། ཁྱོད་ཅག་ནི་ཇི་འདྲའི་བླུན་པ་ལ༌ཨང༌། 4 ཁྱོད་ཅག་གིས་སྡུག་བསྔལ་དེ་འདྲ་མང་པོ་མྱངས་པར་སྙིང་པོ་མེད་དམ་ཞེ༌ན། སྙིང་པོ་མེད་པ་ཞིག་གཏན་ནས་མ་ཡིན། 5 དཀོན་མཆོག་གིས་ཁྱོད་ཅག་ལ་དམ་པའི་ཐུགས་ཉིད་གནང་ཞིང་། ཁྱོད་རྣམས་ཀྱི་ཁྲོད་དུ་ངོ་མཚར་བའི་འཕྲིན་ལས་མཛད་པ་ནི་ཁྱོད་ཅག་གིས་བཀའ་ཁྲིམས་ལྟར་བསྒྲུབས་པའི་ཕྱིར་མིན༌ཏེ། འཕྲིན་བཟང་ལ་མཉན་ནས་དད་པ་བྱས་པའི་ཕྱིར་ཡིན༌ནོ།།

6 དེ་ལྟར་ཨབ་ར་ཧམ་གྱི་སྐོར་ལ་ཇི་སྐད་དུ། ཁོང་གིས་དཀོན་མཆོག་ལ་དད་པ་བྱས་པ་དང༌། དཀོན་མཆོག་གིས་ཀྱང་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་གསུངས་ཡོད༌པས། 7 ཁྱོད་ཅག་གིས་ཤེས་དགོས་པ་ནི་དད་པ་བྱེད་མཁན་གྱི་མི་རྣམས་ཨབ་ར་ཧམ་གྱི་བུ་རབས་ཚ་རྒྱུད་ཡིན་པ་དང་། 8 གསུང་རབ་ལས་ཀྱང་སྔོན་ལ་བསྟན་ཡོད་དེ། དཀོན་མཆོག་གིས་ཕྱི་ཕྱོགས་པ་རྣམས་དད་པའི་སྒོ་ནས་མི་རྣམ་དག་ཏུ་བརྩི་ངེས་པའི་སྐོར༌ལ། སྔར་ནས་ཨབ་ར་ཧམ་ལ་ཇི་སྐད༌དུ། ཁྱོད་རང་བརྒྱུད་ནས་ས་སྟེང་གི་མི་རིགས་ཐམས་ཅད་ལ་བྱིན་རླབས་འཐོབ་པར་འགྱུར་ཞེས་འཕྲིན་བཟང་བསྒྲགས༌པས། 9 དད་པ་བྱེད་མཁན་རྣམས་ལ་དད་པ་ཅན་ཨབ་ར་ཧམ་དང་མཉམ་དུ་བྱིན་རླབས་ཐོབ་པའང་ཤེས་ནུས༌སོ།།

10 དེ་ཡང་བཀའ་ཁྲིམས་ཀྱི་ལས་ལ་བརྟེན་མཁན་ཐམས་ཅད་ལ་དམོད་མོ་ཐེབས་འོས་སོ།། ཅིའི་ཕྱིར་ཞེ་ན། གསུང་རབ་ཀྱི་མདོ་ལས་ཇི་སྐད༌དུ། རྟག་ཏུ་བཀའ་ཁྲིམས་ཀྱི་མདོ་ལས་གསུངས་ཡོད་པ་མཐའ་དག་བཞིན་མི་སྒྲུབ་མཁན་ཐམས་ཅད་ལ་དམོད་མོ་ཐེབས་འོས་ཞེས་བཀོད་པའི་ཕྱིར༌ཡིན། 11 ཡང་གསུང་རབ་ཀྱི་མདོ་ལས་ཇི་སྐད༌དུ། མི་རྣམ་དག་ནི་དད་པའི་སྒོ་ནས་འཚོ་བར་འགྱུར་ཞེས་གསུངས༌པས། བཀའ་ཁྲིམས་ལ་བརྟེན་ནས་དཀོན་མཆོག་གི་དྲུང་དུ་མི་རྣམ་དག་ཏུ་གྱུར་པ་ནི་གཅིག་ཀྱང་མེད་པ་གསལ་ལོ།། 12 བཀའ་ཁྲིམས་ནི་དད་པ་ལ་བརྟེན་ནས་བྱུང་བ་མ་ཡིན༌ཏེ། ཇི་སྐད༌དུ། བཀའ་ཁྲིམས་བཞིན་དུ་སྒྲུབ་མཁན་གྱིས་བཀའ་ཁྲིམས་ལ་བརྟེན་ནས་འཚོ་བ་རོལ་དགོས་པ་ཡིན་ཞེས་གསུངས་པའི་ཕྱིར༌རོ།། 13 ཡང་གསུང་རབ་ཀྱི་མདོ་ལས་ཇི་སྐད༌དུ། སྡོང་པོའི་སྟེང་དུ་དཔྱངས་པ་ཐམས་ཅད་ནི་དམོད་མོ་ཐེབས་པ་ཡིན་ཞེས་བཀོད་ཡོད༌པས། སྐྱབས་མགོན་མཱ་ཤི་ཀ་ནི་བདག་ཅག་གི་ཆེད་དུ་དམོད་མོ་རུ་གྱུར༌ཏེ། བདག་ཅག་བཀའ་ཁྲིམས་ཀྱི་དམོད་མོ་ལས་བླུས་པ་ཡིན། 14 དེ་ནི་ཨབ་ར་ཧམ་ལ་གནང་བའི་བྱིན་རླབས་དེ་མཱ་ཤི་ཀ་ཡེ་ཤུ་བརྒྱུད་ནས་ཕྱི་ཕྱོགས་པ་རྣམས་ལ་འཐོབ་པར་འགྱུར༌ཞིང༌། བདག་ཅག་ལའང་དད་པའི་སྒོ་ནས་ཞལ་བཞེས་གནང་བའི་དམ་པའི་ཐུགས་ཉིད་འཐོབ་པར་འགྱུར་བའི་ཕྱིར༌རོ།།

15 སྤུན་ཟླ༌རྣམས། ངས་མི་ཡི་བཤད་སྲོལ་ལྟར་སྨྲ་བར་བྱ༌སྟེ། མི་དང་མིའི་བར་གྱི་གྲོས་འཆམ་ཡི་གེ་ཞིག་ལ་མཚོན༌ན། གཏན་ལ་ཕབ་རྗེས་འདོར་བའམ་ཁ་སྣོན་བྱས་མི་ཆོག 16 ཞལ་བཞེས་གནང་བ་རྣམས་ནི་ཨབ་ར་ཧམ་དང་ཁོའི་བུ་རྒྱུད་ལ་གསུངས་པ་ཡིན༌མོད། འོན་ཀྱང་བུ་རྒྱུད་རྣམས་ཞེས་གསུངས་མེད༌ཅིང༌། དེ་ནི་མི་མང་པོ་བསྟན་པ་མ་ཡིན༌པར། ཁྱོད་ཀྱི་བུ་རྒྱུད་ཅེས་གསུངས༌ཏེ། མི་གཅིག་ཁོ་ན་བསྟན་པ་ཡིན་ཞིང་དེ་ནི་སྐྱབས་མགོན་མཱ་ཤི་ཀ་ལགས་སོ།། 17 བདག་གི་སྨྲ་བའི་དོན་ནི་འདི་ལྟ་སྟེ། དཀོན་མཆོག་གིས་སྔ་མོ་ནས་གཏན་ལ་ཕབ་པའི་ཞལ་ཆད་དེ་ནི། ལོ་ངོ་བཞི་བརྒྱ་སུམ་ཅུའི་རྗེས་སུ་བྱུང་བའི་བཀའ་ཁྲིམས་ཀྱིས་མེད་པར་བཟོ་མི་ནུས༌ལ། ཞལ་བཞེས་ཀྱང་སྟོང་བར་བྱ་མི་ནུས་ཏེ། 18 བགོ་སྐལ་ནི་བཀའ་ཁྲིམས་ལས་ཐོབ་པ་ཡིན༌ན། ཞལ་བཞེས་གནང་བ་ལས་ཐོབ་པ་མིན་པའི་ཕྱིར༌ཡིན། འོན༌ཀྱང༌། དཀོན་མཆོག་གིས་ཞལ་བཞེས་གནང་བ་ལྟར་བགོ་སྐལ་དེ་ཨབ་ར་ཧམ་ལ་གནང་བ་ཡིན༌ནོ།།

19 དེས་ན་ཅིའི་ཕྱིར་བཀའ་ཁྲིམས་བྱུང་བ་ཡིན་ཞེ༌ན། ཞལ་བཞེས་གནང་བའི་ས་བོན་དེ་ཉིད་ཕེབས་ཡོང་བའི་བར༌དུ། མི་རྣམས་ཀྱིས་ཉེས་སྐྱོན་བྱས་པའི་དབང་གིས་ཆེད་དུ་གནང་བ་ཡིན༌ཞིང༌། ཕོ་ཉ་རྣམས་ཀྱིས་བར་མི་དེ་ཉིད་བརྒྱུད་ནས་གཏན་ལ་ཕབ་ཅིང་བསྒྲགས༌པ་ཡིན། 20 སྤྱིར་བར་མི་ནི་ཕྱོགས་གཅིག་ལ་བྱེད་པ་མ་ཡིན༌མོད། འོན་ཀྱང་དཀོན་མཆོག་ནི་གཅིག་རང་ཡིན་ནོ།། 21 དེས་ན་བཀའ་ཁྲིམས་ནི་དཀོན་མཆོག་གི་ཞལ་བཞེས་དང་འགལ་བ་ཡིན་ནམ་ཞེ༌ན། གཏན་ནས་མི་འགལ་ལོ།། མི་ཞིག་ལ་ཚེ་སྲོག་གནང་བར་བྱེད་ནུས་པའི་བཀའ་ཁྲིམས་ཤིག་གནང་ཡོད་པ་ཡིན༌ན། མི་རྣམ་དག་ཏུ་བརྩི་བ་ནི་བཀའ་ཁྲིམས་ཀྱི་སྒོ་ནས་བྱུང་བ་མ་ཡིན༌ནམ། 22 ཞལ་བཞེས་དེ་ནི་ཡེ་ཤུ་མཱ་ཤི་ཀར་དད་པའི་སྒོ་ནས་དད་ལྡན་རྣམས་ལ་གནང་བར་འགྱུར་བའི་ཕྱིར། གསུང་རབ་ཀྱིས་འཇིག་རྟེན་གྱི་མི་ཐམས་ཅད་སྡིག་པའི་ཁོངས་སུ་བསྡུས་པ་ཡིན་ནོ།།

23 འོན༌ཀྱང༌། དད་པ་བྱེད་པའི་དུས་དེ་མ་སླེབས་པའི་སྔོན༌ལ། བཀའ་ཁྲིམས་ཀྱིས་བདག་ཅག་ཐམས་ཅད་དབང་དུ་བསྡུས༌ཤིང༌། མ་འོངས་པར་དད་པ་དེ་གསལ་པོར་མངོན་པའི་བར་དུ་བསྲུངས་སོ།། 24 དེ་བས་བདག་ཅག་དད་པའི་སྒོ་ནས་མི་རྣམ་དག་ཏུ་བརྩི་བར་མཛད་པའི་ཕྱིར། བཀའ་ཁྲིམས་ནི་བདག་ཅག་ལ་སློབ་སྟོན་གནང་བའི་སློབ་དཔོན་ཡིན༌ཏེ། བདག་ཅག་སྐྱབས་མགོན་མཱ་ཤི་ཀའི་དྲུང་དུ་འདྲེན་པ་ཡིན། 25 འོན༌ཀྱང༌། དད་པ་བྱེད་པའི་དུས་དེ་སླེབས་པ་དང་བདག་ཅག་ནི་སློབ་དཔོན་གྱི་དབང་འོག་ཏུ་ཡོད་པ་མ་ཡིན༌ནོ།།

26 དེའི༌ཕྱིར། ཁྱོད་རྣམས་ཀྱིས་མཱ་ཤི་ཀ་ཡེ་ཤུར་དད་པ་བྱས་པའི་དབང༌གིས། ཐམས་ཅད་དཀོན་མཆོག་གི་བུ་དང་བུ་མོ་ཡིན་ནོ།། 27 སྐྱབས་མགོན་མཱ་ཤི་ཀའི་ནང་ནས་ཁྲུས་གསོལ་ལ་ཞུགས་མཁན་ཐམས་ཅད་ཀྱིས་སྐྱབས་མགོན་མཱ་ཤི་ཀ་ནི་གོས་བཞིན་དུ་རང་གི་ལུས་ལ་གྱོན་པ་ཡིན། 28 ཁྱོད་རྣམས་ནི་ཡ་ཧུ་དཱ་པ༌དང༌། གྷི་རིག་པ། བདག་པོའམ་བྲན༌གཡོག ཕོ་མོའི་དབྱེ་བ་བཅས་མི་མཛད་པར། དད་ལྡན་ཐམས་ཅད་མཱ་ཤི་ཀ་ཡེ་ཤུའི་ནང་གཅིག་ཏུ་བསྒྲིལ་ལོ།། 29 ཁྱོད་ཅག་ནི་སྐྱབས་མགོན་མཱ་ཤི་ཀར་གཏོགས༌པ་ཡིན་ན། ཁྱོད་ཅག་ཨབ་ར་ཧམ་གྱི་བུ་རབས་ཚ་རྒྱུད་ཡིན་ཞིང་། ཞལ་བཞེས་གནང་བ་ལྟར་ཕ་ཤུལ་འཛིན་མཁན་དུ་གྱུར་པའང་ཡིན༌ནོ།།

<- ག་ལད་ཡཱ་པ། 2ག་ལད་ཡཱ་པ། 4 ->