༄༅། །ལུང་སྟོན་པ་ཨེ་ཟེ་ཀི་ཨེལ་གྱི་མདོ།

ལུང་སྟོན་པ་ཨེ་ཟེ་ཀི་ཨེལ་གྱི་མདོ་ཞེས་བྱ་བའི་ངོ་སྤྲོད་མདོར་བསྡུས།

ཁ་བྱང་དང་ལོ་རྒྱུས་རྒྱབ་ལྗོངས།

གཞུང་འདིའི་ཁ་བྱང་ནི་ཨེ་ཟེ་ཀི་ཨེལ་གྱི་མིང་ནས་ཐོགས་པ་དང་། ཨེ་ཟེ་ཀི་ཨེལ་ཞེས་པ་ནི་དཀོན་མཆོག་སྟོབས་དང་ལྡན་ཞེས་པའི་དོན་ཡིན། སྤྱི་ལོ་སྔོན་གྱི་588ལོ་དང་586ལོའི་ནང་དུ་པཱ་པེལ་ལོན་པ་རྣམས་ཀྱིས་ཡེ་རུ་སཱ་ལེམ་གྲོང་ཁྱེར་དབང་དུ་བསྡུས་ནས་གྲོང་ཁྱེར་དང་མཆོད་ཁང་མེ་ལ་བསྲེགས་ཏེ། ཡེས་ར་ཨེལ་གྱི་རྒྱལ་པོའི་ལམ་ལུགས་མཇུག་བསྡུས་ཤིང་། རྒྱལ་པོ་དཱ་བིད་ཀྱི་གྲོང་ཁྱེར་དང་གཙོ་བོའི་མཆོད་ཁང་མེད་པར་བཏང་།

ཡི་གེར་འགོད་མཁན་དང་འགོད་དུས།

ཨེ་ཟེ་ཀི་ཨེལ་ནི་སྤྱི་ལོ་སྔོན་གྱི་597ལོར་ནེ་བོ་ཀད་ནེ་ཙར་གྱིས་ཡ་ཧུ་དཱ་པ་སུམ་སྟོང་ལྷག་པཱ་པེལ་ལོན་དུ་བཙན་ཁྲིད་བྱས་པའི་གྲས་སུ་ཚུད། དེ་དག་གི་གྲས་སུ་དཀོན་མཆོག་གིས་ཁོ་རང་ལུང་སྟོན་པ་ཞིག་བྱེད་པར་ཞལ་འབོད་གནང་། བཙན་ཁྲིད་བྱས་པ་རྣམས་ལ་མཆོད་དཔོན་ལུང་སྟོན་པ་ཞིག་ཞལ་འབོད་གནང་ནས་ཞབས་ཕྱི་བསྒྲུབ་དགོས་པ་བཞིན། ཨེ་ཟེ་ཀི་ཨེལ་གྱིས་ལུང་བསྟན་གནང་བས་ཁོང་གི་གསུང་འཕྲིན་རྣམས་མཆོད་ཁང་དང་དེའི་ཆོ་ག་རྣམས་ལ་འབྲེལ་བ་དམ་པོ་ཡོད། ཨེ་ཟེ་ཀི་ཨེལ་ཞེས་པའི་གཞུང་གི་ནང་དུ་དམ་པའི་གསུང་རབ་ཀྱི་གཞུང་གཞན་དག་ལས་ཀྱང་ཟླ་ཚེས་མང་པོ་བཀོད་ཡོད་སྟབས། དེའི་ལུང་བསྟན་གྱི་ཟླ་ཚེས་རྣམས་ལ་ལྷག་ཏུ་ཞིབ་ཆ་ལྡན། ཨེ་ཟེ་ཀི་ཨེལ་གྱིས་ཕྱག་ལས་གནང་བའི་དུས་སྐབས་དེ་ནི་ཡེ་རུ་སཱ་ལེམ་གྱི་ཆེས་མུན་ནག་གི་དུས་སྐབས་ལ་ཁེལ་ཡོད། ཁོང་གི་གསུང་འཕྲིན་རྣམས་གཏན་ལ་ཕབ་པའི་ལོ་ཚིགས་ནི་སྤྱི་ལོ་སྔོན་གྱི་593ནས་571ལོའི་བར་ཡིན།

བརྗོད་སྙིང་དང་གསུང་འཕྲིན།

ཨེ་ཟེ་ཀི་ཨེལ་གྱི་གཞུང་དུ་ཕྱི་ནང་གི་སྣོད་བཅུད་ཐམས་ཅད་ལ་དཀོན་མཆོག་གིས་དབུ་ཁྲིད་དང་ཚོད་འཛིན་གནང་ཡོད་པའི་སྐོར་ཞིབ་ཆ་ལྡན་ཞིང་དར་ཁྱབ་ཆེ་ལ་དེ་ལྟ་བུ་ཞིག་དམ་པའི་གསུང་རབ་ཀྱི་གཞུང་གང་དུའང་མེད། མི་རྣམས་ཀྱིས་དཀོན་མཆོག་ངོ་ཤེས་པ་དང་ངོས་ལེན་བྱ་རྒྱུ་ནི་བླ་ན་མེད་པའི་དཀོན་མཆོག་ཁོང་གི་ཐུགས་དགོངས་ཡིན། དེའི་རྒྱུ་མཚན་ནི་ཁོ་ཚོས་ང་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་ཨེ་ཟེ་ཀི་ཨེལ་གྱི་གཞུང་དུ་ཡོད་པའི་གསུང་དུམ་མམ་ཡང་ན་དེ་དང་མཚུངས་པའི་གསུང་དུམ་གཞན་རྣམས་ང་ཚོས་ཐེངས་དྲུག་ཅུ་རེ་ལྔར་བཀླགས་མྱོང་བ་ཡིན། དཀོན་མཆོག་གི་དབང་ཐམས་ཅད་ནི་ཁོང་ཆིབས་ཞབས་བསྒྱུར་བ་ལས་མངོན་པ་ཡིན། དཔེར་ན། ཁོང་ནི་མཆོད་ཁང་ནང་འབའ་ཞིག་ཏུ་བཞུགས་པ་མ་ཡིན་ཏེ། འཕྲལ་རྐྱེན་ཅི་འདྲར་ཕྲད་ཀྱང་ཁོང་གིས་རང་གི་མི་རྣམས་ལ་འགན་ཐེག་པ་རེད།

འཆར་ཟིན།

1. ཨེ་ཟེ་ཀི་ཨེལ་ལ་ཞལ་འབོད་གནང་བ་དང་བཀའ་བསྒྲག་པར་མངགས་པ། ༼1:1-3:27༽

2. ཡ་ཧུ་དཱ་དང་ཡེ་རུ་སཱ་ལེམ་གཉིས་ལ་ཉེས་ཆད་བཅད་པའི་སྐོར། ༼4:1-24:27༽

3. རྒྱལ་ཕྲན་རྣམས་ལ་ཉེས་ཆད་བཅད་པའི་སྐོར། ༼25:1-32:32༽

4. ཡང་བསྐྱར་དར་བར་སྟ་གོན་མཛད་པ། ༼33:1-39:29༽

5. བསྙེན་བཀུར་བྱེད་སྟངས་སླར་གསོ་བྱས་པའི་སྐོར། ༼40:1-48:35༽