1 སྦྲང་བུ་ཤི་རོས་དྲི་ཞིམ་སྦྱོར་བྱེད་ཀྱི། ། སྣུམ་ལ་དྲི་ངན་འཐུལ་དུ་འཇུག་པ་ལྟར། ། བླུན་པོའི་གླེན་རྟགས་ཕྲན་བུ་ཞིག་གིས་ཀྱང་། ། ཤེས་རབ་དང་ནི་གཟི་བརྗིད་གནོན་པར་བྱེད། ། 2 མཁས་པའི་སྙིང་ནི་གཡས་*འདིར་གཡས་ཞེས་པ་ནི་དྲང་བདེན་ཡིན་པ་དང་བཀུར་འོས་པ། སྟོབས་ཤུགས་ཅན་བཅས་ལ་འཇུག་ཅིང་། གཡོན་ཞེས་པ་ནི་ནོར་འཁྲུལ་ཅན་དང་མཐོང་ཆུང་བྱ་ཡུལ། སྟོབས་ཞན་པ་བཅས་ལ་འཇུག སུ་ཕྱོགས་པ་དང་། ། བླུན་པོའི་སྙིང་ནི་གཡོན་དུ་བསེགས་ནས་ཡོད། ། 3 བླུན་པོས་ལམ་དུ་སྐྱོད་པའི་དུས་སུ་ཡང་། ། རང་ལ་ཤེས་རབ་མེད་པ་སྟོན་བྱེད་ཅིང་། ། ཀུན་ལ་རང་ཉིད་བླུན་པོ་ཡིན་པ་མངོན། ། 4 སྲིད་དབང་སྐྱོང་མཁན་ཁྱོད་ལ་ཁྲོས་གྱུར་ན། ། ཁྱོད་ནི་རང་གི་གནས་དང་མ་འབྲལ་ཞིག ། གང་ལ་ཞེ་ན་ཞི་བའི་ངང་ཚུལ་གྱིས། ། ཉེས་པ་ཆེན་པོ་རྣམས་ཀྱང་ཞི་བར་བྱེད། ། 5 ཉི་མའི་འོག་ཏུ་རྐྱེན་ངན་ཞིག་ཡོད་པ། ། བདག་གིས་མཐོང་ཞིང་དེ་ནི་དབང་སྒྱུར་བའི། ། འགལ་འཛོལ་ལས་ནི་བྱུང་བ་འདྲ་ཡིན་ཏེ། ། 6 བླུན་པོ་རྣམས་ལ་གོ་ས་མཐོན་པོ་སྤྲད། ། འབྱོར་ལྡན་རྣམས་ནི་དམན་སར་སྡོད་པ་ཡིན། ། 7 བྲན་གཡོག་རྣམས་ནི་རྟ་ལ་ཞོན་པ་དང་། ། རྒྱལ་སྲས་རྣམས་ནི་བྲན་གཡོག་ནང་བཞིན་གྱིས། ། ས་ལ་རྐང་འགྲོས་བྱེད་པ་བདག་གིས་མཐོང་། ། 8 ས་དོང་འབྲུ་མཁན་རང་ཉིད་དེའི་ནང་ལྷུང་། ། རྩིག་པ་བཤིག་ན་སྦྲུལ་གྱིས་སོ་བཏབ་ཡོང་། ། 9 གཏེར་རྡོ་འདོན་མཁན་རྡོ་ཡིས་རྨས་བྱེད་ཅིང་། ། ཤིང་དུམ་གཤག་མཁན་ལ་ནི་ཉེན་ཁ་ཆེ། ། 10 སྟ་རེ་རྟུལ་པོར་རྣོ་རྩེ་མ་བཏོན་ན། ། ཤ་ཤེད་མང་དུ་གཏོང་དགོས་འབྱུང་བ་དང་། ། འོན་ཀྱང་ཤེས་རབ་ཀྱིས་ནི་རྒྱལ་བར་བྱེད། ། 11 སྔགས་མ་བརྒྱབ་པར་སྦྲུལ་གྱིས་སོ་བཏབ་ན། ། སྔགས་པར་ཕན་ཐོགས་ཅི་ཡང་ཡོད་མ་ཡིན། ། 12 མཁས་པའི་ཞལ་ནས་ལེགས་བཤད་གསུང་བ་དང་། ། བླུན་པོའི་མཆུ་ཡིས་རང་ཉིད་མིད་པར་བྱེད། ། 13 བླུན་པོའི་གཏམ་གྱི་ཐོག་མ་བླུན་བཤད་དང་། ། མཐའ་མ་ཁེངས་དྲེགས་དང་ནི་ངན་པ་ཡིན། ། 14 བླུན་པོར་སྨྲ་བ་ཤིན་ཏུ་མང་ན་ཡང་། ། ཕྱིས་སུ་ཅི་འབྱུང་སུས་ཀྱང་མི་ཤེས་ལ། ། འཆི་བའི་རྗེས་སུ་ཅི་ཞིག་འབྱུང་ངེས་པ། ། འཆད་པར་ནུས་པ་སུ་ཡང་ཡོད་མ་ཡིན། ། 15 བླུན་པོས་གྲོང་ཁྱེར་ལམ་ཡང་མི་ཤེས་ལ། ། རེ་རེ་རང་གི་ལས་ཀྱིས་དུབ་པར་བྱེད། ། 16 ཀྱེ་ཀྱེ་རྒྱལ་ཁམས་ཁྱོད་ཀྱི་རྒྱལ་པོ་ནི། ། བྱིས་པ་ཡིན་ཞིང་ཁྱོད་ཀྱི་བློན་པོ་ཚོས། ། ཞོགས་པར་བཟའ་བཏུང་བག་མེད་སྤྱད་ན་ནི། ། ཁྱོད་ལ་ཆག་སྒོ་འབྱུང་བར་གདོན་མི་ཟ། ། 17 ཀྱེ་ཀྱེ་རྒྱལ་ཁམས་ཁྱོད་ཀྱི་རྒྱལ་པོ་ནི། ། སྐུ་དྲག་སྲས་ནི་ཡིན་ཞིང་བློན་པོ་ཚོས། ། བཟི་བར་མིན་གྱིས་རང་ལ་སྟོབས་བསྐྱེད་ཕྱིར། ། དུས་ལྟར་བཟའ་བཏུང་སྤྱད་ན་ཁྱོད་བདེ་འོ། ། 18 ལེ་ལོ་ཡིན་པས་ཁང་ཀླད་རྡིབ་པ་དང་། ། ལག་པ་དལ་བས་ཁང་པར་ཐིགས་ཆུ་ཡོང་། ། 19 གད་མོའི་ཕྱིར་དུ་གསོལ་སྟོན་གཤོམ་པ་དང་། ། རྒུན་ཆང་གིས་ནི་མི་ལ་དགའ་སྣང་བསྐྱེད། ། འོན་ཀྱང་དངུལ་གྱིས་དོན་ཀུན་འགྲུབ་པར་བྱེད། ། 20 རྒྱལ་པོར་སྨོན་ལོག་འདེབས་པར་མ་བསམ་ཞིག ། ཡང་ན་རང་གི་གཟིམ་ཁང་ནང་རོལ་ལ། ། ཕྱུག་པོར་དམོད་མོ་ཡང་ནི་མ་བྱེད་ཅིག ། རྒྱུ་མཚན་ནམ་མཁའི་བྱ་ཡིས་སྐད་འཁྱེར་ཞིང་། ། གཤོག་ལྡན་གྱིས་ནི་གཏམ་དེ་འཆད་པར་འགྱུར། །

<- སྟོན་པ། 9སྟོན་པ། 11 ->