1 དེ་ཡང་ཟིང་ཆ་ཞི་འཇགས་སུ་གྱུར་རྗེས་ཕོལ་ལོལ་གྱིས་རྗེས་འབྲང་པ་རྣམས་བོས་ཏེ་སྐུལ་མ་གནང༌རྗེས། དེ་རྣམས་དང་ཁ་གྱེས་ནས་མ་ཀེ་དོན་ཡཱ་ཡུལ་དུ་ལམ་ལ་ཆས་སོ།། 2 ཁོང་ཉིད་ཡུལ་དེ་དག་བརྒྱུད་ནས་མི་དེ་རྣམས་ལ་བཀའ་མང་པོས་སྐུལ་མ་གནང་རྗེས་གྷི་རི་སི་[a]ཡུལ་དུ་ཕེབས༌པ་རེད། 3 གནས་དེར་ཟླ་བ་གསུམ་རིང་བཞུགས་རྗེས། གྲུ་གཟིངས་ལ་བརྟེན་ནས་སིར་ཡཱ་ཡུལ་དུ་བཞུད་པར་རྩོམ་པ༌ལ། ཡ་ཧུ་དཱ་པ་རྣམས་ཀྱིས་ཁོང་ལ་གནོད་འཚེ་བྱེད་པའི་ཇུས་ངན་བཀོད༌པས། ཁོང་ཉིད་མ་ཀེ་དོན་ཡཱ་ཡུལ་བརྒྱུད་ནས་ཕྱིར་ཕེབས་པར་ཐག་གིས་བཅད་དོ།། 4 ཁོང་དང་ལྷན་དུ་འགྲོ་མཁན་རྣམས་ནི་པུ་རེ་ཡཱ་པ་ཕོར་རོའི་བུ་སའོ་པ་ཏེར༌དང༌། ཐེ་སཱ་ལོ་ནེ་ཀེ་པ་ཨ་རི་སྟར་ཀུ་དང་སེ་ཀིན་ཏི༌དང༌། གཞན༌ཡང༌། དིར་སྦེ་ཡུལ་གྱི་ཀེ་ཡུ་དང་། ཐི་མོ༌ཐེ། ཨེ་ཞི་ཡཱ་པ་ཐི་ཀེ་ཀུ་དང་ཏྲོ་ཕེ་མུ་བཅས་ཡོད༌ལ། 5 མི་དེ་རྣམས་སྔོན་དུ་སོང་སྟེ་ཏྲོ་ཡཱ་ནས་ངེད་རྣམས་ལ་བསྒུགས་སོ། ། 6 དེ་ནས་སྐྱུར་མེད་བག་ལེབ་ཀྱི་དུས་ཆེན་མཇུག་རྫོགས༌རྗེས། ངེད་རྣམས་ཕི་ལིབ་པི་ནས་གྲུ་གཟིངས་ལ་བསྡད་དེ་ཉིན་ལྔ་ལ་སོང་བ་དང་ཏྲོ་ཡཱ་རུ་སླེབས་ཤིང༌། ཁོ་རྣམས་ལ་ཕྲད་པ་དང་དེ་རུ་ཉིན་བདུན་ལ་བསྡད༌དོ།།

7 གཟའ་འཁོར་གཅིག་གི་ཉིན་དང་པོར་བག་ལེབ་ལོངས་སུ་སྤྱོད་པའི༌ཕྱིར། ངེད་རྣམས་ལྷན་དུ་འཛོམས་པའི་དུས༌སུ། ཕོལ་ལོལ་གྱིས་ཕྱི་ཉིན་ཡུལ་གཞན་དུ་འགྲོ་དགོས་པས༌དེ་རྣམས་ལ་ནམ་ཕྱེད་ཀྱི་བར་དུ་ཆོས་གསུངས་སོ།། 8 ངེད་ཅག་ལྷན་དུ་འཛོམས་སའི་ཐོག་ཁང་དེའི་ནང་དུ་སྒྲོན་མེ་མང་པོ་བསྒྲོན་ཡོད༌ཅིང༌། 9 སྐབས༌དེར། མིང་ལ་ཨིའུ་ཏི་ཀུ་ཟེར་བའི་གཞོན་ནུ་ཞིག་ཡོད་པ་དེ་སྒེའུ་ཁུང་གི་སྟེགས་བུའི་སྟེང་དུ་བསྡད་ཡོད་ཅིང་གཉིད་དུ་ཡུར་བ༌དང༌། ཕོལ་ལོལ་གྱིས་ཆོས་གསུངས་ཏེ་ཡུན་རིང་འགོར་བ༌ན། གཞོན་ནུ་དེར་གཉིད་སྟུག་པོ་ཁུག་པ་དང་སུམ་ཐོག་ནས་སར་ལྷུང༌ངོ་༎ དེ་ནས་ཡར་བསྐྱོར་བ་ན་ཁོ་རང་ཤི་ཟིན༌པ་རེད། 10 ཕོལ་ལོལ་ཡང་མར་སོང་སྟེ་རང་ལུས་ཀྱིས་བེམ་པོ་བཀབ་ཅིང་དེ་ལ་འཐམས་ནས་འདི་སྐད༌དུ། ཁྱོད་རྣམས་དངངས་སྐྲག་མ༌སྐྱེས། གཞོན་ནུ་འདིར་ད་དུང་སྲོག་ཡོད་ཅེས་གསུངས༌ཤིང༌། 11 སླར་ཡང་ཐོག་ཁང་དུ་ཕེབས་ཏེ་མི་གཞན་དང་ལྷན་དུ་བག་ལེབ་ལོངས་སུ་སྤྱད་པ༌དང༌། ནམ་ལངས་པའི་བར་དུ་གསུང་གླེང་མང་པོ་མཛད་རྗེས་ད་གཟོད་ཡུལ་གཞན་དུ་ཕེབས་སོ།། 12 དེ་ནས་མི་དེ་རྣམས་ཀྱིས་གཞོན་ནུ་དེ་གསོན་པོར་ཁྲིད་སོང་བས་སེམས་གསོ་ཆེན་པོ་ཐོབ༌བོ།།

13 དེ་ནས་ངེད་རྣམས་ཐོག་མར་གྲུ་གཟིངས་ལ་བསྡད་དེ་ཨ་ཟི་རུ་སོང༌ཞིང༌། ཡུལ་དེ་ནས་ཕོལ་ལོལ་གྲུ་ལ་བཞུགས་པར་བསུ་བ་བྱེད་པར་བརྩམས་སོ།། རྒྱུ་མཚན་ནི་ཁོང་གིས་སྔར་ནས་དེ་ལྟར་བཀོད་སྒྲིག་བྱས་ཤིང་ཁོང་རང་ཉིད་རྐང་ཐང་ལ་འགྲོ་རྩིས་ཡོད་པ་རེད། 14 དེ་ནས་ཨ་ཟི་རུ་ཁོང་ཉིད་ངེད་ཅག་དང་ཕྲད༌ནས། གྲུ་གཟིངས་ནང་དུ་གདན་དྲངས་ཏེ་མུ་ཏི་ལེ་ནེ་རུ་སོང༌། 15 ཡང་དེར་སླེབས་པའི་ཕྱི༌ཉིན། ངེད་རྣམས་གྲུར་བསྡད་ནས་ཀེའུ་ཡོ་ཡི་ཕར་ཕྱོགས་སུ་སླེབས་པ༌དང༌། ཡང་དེའི་ཕྱི་ཉིན་སཱ་མོ་རུ་སླེབས་ཤིང༌། དེའི་ཕྱི་ཉིན་མུ་ལེ་ཐུ་རུ་སླེབས་སོ།། 16 རྒྱུ་མཚན་ནི་ཕོལ་ལོལ་གྱིས་ཨེ་ཞི་ཡཱ་ཡུལ་དུ་དུས་འགྱངས་པར་བསམས་ནས་ཨེ་ཕེ་སི་རུ་མི་འགྲོ་བར་ཐག་གིས་བཅད༌དེ། མྱུར་བ་མྱུར་དུ་ལྔ་བཅུའི་དུས་ཆེན་གྱི་སྐབས་སུ་ཡེ་རུ་སཱ་ལེམ་དུ་སླེབ་ཐུབ་ན་ཅི་མ་རུང་དགོངས་སོ།།

17 དེ་ནས་ཕོལ་ལོལ་གྱིས་མུ་ལེ་ཐུ་ནས་ཨེ་ཕེ་སི་རུ་མི་མངགས་ཏེ་ཆོས་ཚོགས་ཀྱི་རྒན་པོ་རྣམས་བོས༌ཤིང༌། 18 མི་དེ་རྣམས་སླེབས་རྗེས་ཁོང་གིས་འདི་སྐད༌དུ། ང་རང་ཨེ་ཞི་ཡཱ་ཡུལ་དུ་སླེབས་པའི་ཉིན་ནས༌བཟུང༌། ཁྱོད་རྣམས་ཀྱི་ཁྲོད་དུ་བདག་གི་སྤྱོད་ལམ་ནམ་རྒྱུན་ཅི་འདྲ་ཡིན་པ་ཁྱོད་ཅག་གིས་ཤེས༌ཏེ། 19 ངས་ཕྱོགས་ཀུན་ནས་ཁེངས་སྐྱུང་གིས་གཙོ་བོ་ལ་ཞབས་ཕྱི་བསྒྲུབས་པ་དང་མིག་ལས་མཆི་མ་བཞུར་ཞིང༌། ཡ་ཧུ་དཱ་པའི་ཇུས་ངན་དེ་དག་བདག་ལ་ཕོག་ནས་ཚོད་བགམ་ཡང་མྱངས༌པ་ཡིན་ནོ།། 20 ངས་ཁྱོད་རྣམས་ལ་ཕན་ཐོགས་པའི་དོན་གང་ཞིག་འཛེམ་བག་མེད་པར་སྨྲས༌ཤིང༌། མི་ཚོགས་ཀྱི་མདུན་དང་ཡང་ན་མི་རེ་རེའི་ཁྱིམ་ཚང་དུའང་ཆོས་གསུངས་མྱོང༌བ་ཁྱོད་རྣམས་ཀྱིས་ཀྱང་ཤེས་སོ།། 21 ཡང་དཀོན་མཆོག་གི་ཕྱོགས་སུ་འགྱོད་བཤགས་བྱེད་པ༌དང༌། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ལ་དད་པ་བྱེད་དགོས་པ་དེ་ཡ་ཧུ་དཱ་པ་དང་གྷི་རིག་པ་རྣམས་ལ་བདེན་དཔང་བྱས་མྱོང༌། 22 ད་ལྟ་ལྟོས༌དང༌། དམ་པའི་ཐུགས་ཉིད་ཀྱིས་བསྐུལ་བ་བཞིན་ང་རང་ཡེ་རུ་སཱ་ལེམ་དུ་འགྲོ་བཞིན་ཡོད༌ཅིང༌། གནས་དེར་དོན་ཅི་ཞིག་དང་འཕྲད་ངེས་པ་མི་ཤེས༌ཀྱང༌། 23 དམ་པའི་ཐུགས་ཉིད་ཀྱིས་དེ་སྔར་གྲོང་ཁྱེར་སོ་སོ་ནས་བདག་ལ་བདེན་དཔང་མཛད་པ་ལྟར། ང་རང་བཙོན་དུ་འཇུག་པ་དང་དཀའ་སྡུག་སྣ་ཚོགས་དང་འཕྲད་ངེས་པའང་བདག་གིས་ཤེས་སོ།། 24 འོན༌ཀྱང༌། ང་རང་སྲོག་ལ་ཞེན་མི་ཆགས་ཞིང་དེ་རིན་ཐང་དང་ལྡན་པ་ཞིག་ཏུའང་མི་བརྩི༌བར། རང་གི་ལམ་ཐག་མཇུག་རྫོགས་དགོས༌ཏེ། དེ་ནི་གཙོ་བོ་ཡེ་ཤུས་བདག་ལ་གནང་བའི་དཀོན་མཆོག་གི་ཐུགས་རྗེའི་འཕྲིན་བཟང་ལ་བདེན་དཔང་བྱེད་པའི་ཆོས་ཀྱི་ལས་འགན་ཡིན༌ནོ།།

25 ཡང་ལྟོས༌དང༌། ང་རང་རྒྱུན་དུ་ཁྱོད་ཅག་གི་ཁྲོད་ནས་འགྲོ་འོང་བྱས་ཏེ་དཀོན་མཆོག་གི་རྒྱལ་སྲིད་སྐོར་བསྒྲགས་མྱོང་ལ། ད་ལྟ་ངས་ཤེས་པ་ནི་ཕྱིས་སུ་ཁྱོད་ཅག་ཐམས་ཅད་ཀྱིས་ང་རང་མཐོང་བར་མི་འགྱུར༌བས། 26 ངས་དེ་རིང་ཁྱོད་ཅག་ལ་བདེན་དཔང་བྱེད༌དེ། བདག་ལ་མི་ཐམས་ཅད་ཀྱི་ཁྲག་བཞུར་བའི་ཐད་ཉེས་པ་ཅི་ཡང་མེད་དོ།། 27 རྒྱུ་མཚན་ནི་ངས་དཀོན་མཆོག་གི་དགོངས་པ་ཐམས་ཅད་འཛེམ་བག་མེད་པར་ཁྱོད་རྣམས་ལ་སྨྲས༌པ་ཡིན། 28 དམ་པའི་ཐུགས་ཉིད་ཀྱིས་ཁྱོད་རྣམས་ནི་དད་ལྡན་ཀུན་ལ་དོ་དམ་བྱེད་པར་བསྐོས༌པས། ཁྱོད་ཅག་གིས་རང་ཉིད་དང་དད་ལྡན་རྣམས་ཀྱི་ཕྱིར་གཟབ་གཟབ་གྱིས། དཀོན་མཆོག་གིས་རང་ཉིད་ཀྱི་སྐུ་ཁྲག་གིས་བླུས་པའི་ཆོས་ཚོགས་དེ་ཁྱོད་ཅག་གིས་བདག་སྐྱོང་བྱེད་དགོས་སོ།། 29 ཡང་ང་རང་སོང་བའི་རྗེས༌སུ། གདུག་རྩུབ་ཆེ་བའི་སྤྱང་ཀི་ལྟ་བུ་རྣམས་ཁྱོད་ཅག་གི་ཁྲོད་དུ་འཛུལ་ཏེ་ཆོས་ཚོགས་ལ་མི་ཕངས་པའང་བདག་གིས་ཤེས་པ༌དང༌། 30 ཐ་ན་ཁྱོད་ཅག་གི་ཁྲོད་དུའང་མི་འགའ་ཞིག་འབྱུང་ངེས༌ཤིང༌། རྗེས་འབྲང་པ་རྣམས་ཀྱང་དེ་དག་གི་རྗེས་སུ་འབྲང་དུ་འཇུག་པའི༌ཕྱིར། ཁུངས་ལུང་མེད་པའི་གཏམ་སྨྲ་བར་འགྱུར་རོ།། 31 དེ་བས་ཁྱོད་ཅག་གིས་གཟབ་པར༌གྱིས། ངས་ལོ་གསུམ་གྱི་རིང་ལ་ཉིན་མཚན་ཀུན་ཏུ་མཆི་མ་དང་བཅས་ཁྱོད་ཅག་མི་རེ་རེར་བསླབ་བྱ་གནང་བ་དེ་དག་མི་བརྗེད་པར་ཡིད་ལ༌ཟུངས། 32 ད་ལྟ་ངས་ཁྱོད་རྣམས་དཀོན་མཆོག་དང་ཁོང་གི་ཐུགས་རྗེའི་བཀའ་ལ་བཅོལ་བར༌བྱའོ།། བཀའ་འདིས་ཁྱོད་རྣམས་ཀྱི་དད་པ་བརྟན་པོར་བྱེད་ནུས་པ༌དང༌། དམ་པར་གྱུར་པའི་མི་ [b]རྣམས་དང་མཉམ་དུ་ཁྱོད་རྣམས་ལའང་བགོ་སྐལ་འཐོབ་པར་མཛད་ནུས༌པ་ཡིན་ནོ།། 33 ངས་མི་སུ་ཞིག་གི་གསེར་རམ༌དངུལ། ཡང་ན་གྱོན་གོས་བཅས་ལ་ཧམ་སེམས་བཅངས་མ་མྱོང༌ལ། 34 རང་གི་ལག་པ་འདི་གཉིས་ལ་བརྟེན་ནས་ང་རང་དང་མཉམ་དུ་ཡོད་པའི་མི་གཞན་རྣམས་ཀྱི་དགོས་མཁོ་བསྐངས་པ་ནི་ཁྱོད་རྣམས་ཀྱིས་ཀྱང་ཤེས༌པ་ཡིན། 35 ངས་ཕྱོགས་ཀུན་ནས་འདི་ལྟར་ལས་ལ་བརྩོན་ནས་མི་གཉོམ་ཆུང་ཀུན་ལ་རོགས་རམ་བྱེད་དགོས་ཚུལ་ཁྱོད་རྣམས་ལ་མིག་དཔེ་བསྟན༌ཅིང༌། གཞན་ཡང་གཙོ་བོ་ཡེ་ཤུའི་གསུང༌སྟེ། ཚུར་ལེན་པ་ལས་ཕར་སྦྱིན་པ་བྱིན་རླབས་ཆེ་ཞེས་གསུངས་པ་དེ་ཉིད་ཡིད་ལ་འཛིན་པར་འོས་ཞེས་གསུངས༌སོ།།

36 ཕོལ་ལོལ་གྱིས་དེ་སྐད་གསུངས༌རྗེས། པུས་མོ་ས་ལ་བཙུགས་ནས་མི་ཐམས་ཅད་དང་མཉམ་དུ་གསོལ་བ་བཏབ་བོ།། 37 དེ་ནས་མི་ཀུན་ངུ་ཞིང་ཕོལ་ལོལ་ལ་འཐམས་ནས་འགྲམ་པར་འོ་བྱས་སོ།། 38 མི་དེ་རྣམས་ཆེས་ཡིད་སྐྱོ་བ་ནི་ཁོང་གིས་འདི་སྐད༌དུ། ཕྱིས་སུ་ཁྱོད་ཅག་ཐམས་ཅད་ཀྱིས་ང་རང་མཐོང་བར་མི་འགྱུར་ཞེས་གསུངས་པ་དེ་ཡིན་ནོ།། དེ་ནས་མི་དེ་རྣམས་ཀྱིས་ཁོང་ཉིད་གྲུ་གཟིངས་ནང་དུ་བསྐྱལ༌ཏོ།།

<- མཛད་འཕྲིན། 19མཛད་འཕྲིན། 21 ->