1 སྔོན་ཆད་བདག་གིས་དད་ལྡན་དམ་པ་རྣམས་ལ་ཅི་ལྟར་ཞལ་འདེབས་འབུལ་དགོས་པའི་སྐོར་ག་ལད་ཡཱ་ཡུལ་གྱི་ཆོས་ཚོགས་སོ་སོར་ཁ་བསྒོ་བཏང་བ༌བཞིན། ཁྱོད་རྣམས་ཀྱིས་ཀྱང་དེ་ལྟར་བྱ་འོས༌ཏེ། 2 གཟའ་འཁོར་རེ་རེའི་ཉིན་དང་པོ་ལ། ང་རང་ཡོང་བའི་ཉིན་དེར་ཞལ་འདེབས་མི་བསྡུ་བའི༌ཕྱིར། མི་སོ་སོས་རང་རང་གི་ཡོང་འབབ་བཞིན་ཟུར་དུ་བླངས་ཏེ་བསྐྱུར་བར༌གྱིས། 3 ང་རང་ཡོང༌ཚེ། ཁྱོད་ཅག་གིས་ཡི་གེ་བྲིས་ཏེ་མི་འགའ་ཞིག་གདམ༌པར་བྱེད་ན། ངས་མི་དེ་རྣམས་ཡེ་རུ་སཱ་ལེམ་ལ་ཁྱོད་རྣམས་ཀྱི་ཞལ་འདེབས་སྐྱེལ་མཁན་དུ་མངག་པར༌བྱའོ།། 4 གལ༌ཏེ། ང་རང་འགྲོ་དགོས་བྱུང༌ན། མི་དེ་དག་བདག་དང་མཉམ་དུ་འགྲོ་བར༌བྱའོ།།

5 ང་རང་མ་ཀེ་དོན་ཡཱ་ཡུལ་བརྒྱུད་ནས་འགྲོ་རྒྱུ་ཡིན་ཞིང་། དེའི་རྗེས་སུ་ཁྱོད་ཅག་གི་གམ་དུ་ཡོང་ངོ་།། 6 ཁྱོད་ཅག་དང་མཉམ་དུ་རེ་ཞིག་སྡོད༌པའམ། ཡང་ན་དགུན་སྐྱེལ་ཡང་སྲིད༌ལ། ང་རང་གང་དུ་འགྲོ་ནའང་ཁྱོད་ཅག་གིས་སྐྱེལ་མ་བྱེད་རུང་བ་ཡིན། 7 ད་ལྟ་བདག་ནི་ལམ་བར་ནས་ཁྱོད་ཅག་དང་འཕྲད་མི་འདོད༌དེ། གཙོ་བོས་བདག་ལ་དགོངས་པ་གནང་བ་ཡིན༌ན། བདག་ནི་ཡུན་རིང་ཞིག་ལ་ཁྱོད་ཅག་དང་མཉམ་དུ་སྡོད་འདོད༌པ་ཡིན། 8 འོན༌ཀྱང༌། ལྔ་བཅུའི་དུས་ཆེན་གྱི་བར་དུ་ང་རང་ཨེ་ཕེ་སི་ནས་སྡོད་ངེས་ཡིན། 9 དེ་ནི་བདག་ལ་ཁོད་རྒྱ་ཆེ་ཞིང་ཕན་ནུས་ལྡན་པའི་སྒོ་ཞིག་ཕྱེས་ཡོད༌ལ། ངོ་རྒོལ་བྱེད་མཁན་ཡང་མང་པོ་ཞིག་ཡོད་པའི་ཕྱིར༌རོ།།

10 གལ༌ཏེ། ཐི་མོ་ཐེ་ཡོང་ན། ཁོས་ཀྱང་བདག་དང་འདྲ་བར་གཙོ་བོའི་ཆོས་དོན་སྒྲུབ་བཞིན་ཡོད༌པས། ཁོ་རང་ནི་ཁྱོད་ཅག་གི་གམ་དུ་མི་འཇིགས་པར་སྡོད་པའི༌ཕྱིར། ཁྱོད་རྣམས་ཀྱིས་མཉམ་འཇོག་བྱ་འོས་སོ།། 11 དེའི༌ཕྱིར། མི་སུས་ཀྱང་ཁོ་རང་ལ་མཐོང་ཆུང་མི་བྱེད་ཅིང་བདག་གི་གམ་དུ་བདེ་བར་ཡོང་བར༌གྱིས། ཅིའི་ཕྱིར་ཞེ་ན། ངས་ཁོ་རང་དང་སྤུན་ཟླ་རྣམས་མཉམ་དུ་ཡོང་བར་རེ་སྒུག་བྱེད་བཞིན་ཡོད་པའི་ཕྱིར༌རོ།།

12 བདག་གིས་སྤུན་ཟླ་ཨ་པོལ་ལོ་ནི་དད་ལྡན་གཞན་དག་དང་མཉམ༌དུ། ཁྱོད་ཅག་གི་གམ་དུ་འགྲོ་བར་ཡང་ཡང་བསྐུལ༌མོད། འོན་ཀྱང་ད་ལྟ་ཁོ་རང་འགྲོ་འདོད་མེད༌ནའང༌། ནམ་ཞིག་ལ་གོ་སྐབས་ལྡན་ཚེ་ཁོ་རང་འགྲོ་ངེས༌སོ།།

13 དད་པའི་ནང་དུ་བརྟན་པོར་སྡོད༌ཅིང༌། སྐྱེས་བུ་དམ་པའི་ངང་ཚུལ་གྱིས་དཔའ་ངར་བསྐྱེད་པའི༌ཕྱིར། ཁྱོད་ཅག་གིས་ངེས་པར་དོགས་ཟོན་བྱེད་པར༌གྱིས། 14 ཁྱོད་ཅག་གིས་ལས་གང་ཞིག་བྱེད་ནའང་ཐམས་ཅད་བྱམས་པ་ལ་བརྟེན་ནས་བསྒྲུབ་པར༌བྱའོ།།

15 སྤུན་ཟླ༌རྣམས། སི་ཕ་ནཱའི་ཁྱིམ་མི་དག་ནི་ཨ་ཀ་ཡཱ་ཡུལ་གྱི་འབྲས་བུ་ཐོག་མར་གྱུར་པ་ཡིན༌ལ། ཁོ་རྣམས་ཀྱིས་ཆེད་དུ་དད་ལྡན་དམ་པ་རྣམས་ལ་ཞབས་ཕྱི་བྱེད་པ་ཁྱོད་ཅག་གིས་ཤེས་པས། 16 བདག་གིས་ཁྱོད་རྣམས་མི་དེ་ལྟ་བུ་དང་ཆོས་གྲོགས་ཐམས་ཅད་ལ་བསྟུན་པར་བསྐུལ་བར་བྱའོ།། 17 སི་ཕ་ནཱ༌དང༌། ཕཱོར་ཏི༌ན། ཨ་ཁཱ་ཡ་ཀུ་གསུམ་པོ་འདིར་སླེབས་བྱུང་བས་ང་རང་ཤིན་ཏུ་དགའ༌སྟེ། ཁྱོད་ཅག་ལ་མི་ཚང་བ་དག་ཁོ་རྣམས་ཀྱིས་ཁ་བསྐངས་པའི་ཕྱིར༌རོ།། 18 ཁོ་རྣམས་ཀྱིས་བདག་དང་ཁྱོད་རྣམས་ཡིད་སེམས་སྤྲོ་བར་བྱས༌པས། ཁྱོད་ཅག་གིས་ངེས་པར་མི་དེ་ལྟ་བུ་རྣམས་ལ་བརྩི་བཀུར་བྱ་དགོས༌སོ།།

19 ཨེ་ཞི་ཡཱ་ཡུལ་གྱི་ཆོས་ཚོགས་དག་གིས་ཁྱོད་རྣམས་ལ་འཚམས་འདྲི༌ཞུའོ།། ཨ་ཀུ་ལཱ་དང་ཕུར་སི་ལཱ་གཉིས༌དང༌། ཁོ་གཉིས་ཀྱི་ཁྱིམ་དུ་ཡོད་པའི་ཆོས་ཚོགས་ཀྱི་མི་དག་གིས་ཀྱང་གཙོ་བོའི་ནང་དུ་ཁྱོད་ཅག་ལ་འཚམས་འདྲི་ཡང་ཡང༌ཞུའོ།། 20 འདིར་སྡོད་པའི་སྤུན་ཟླ་རྣམས་ཀྱིས་ཀྱང་ཁྱོད་ཅག་ལ་འཚམས་འདྲི༌ཞུའོ།། ཁྱོད་ཅག་གིས་ཀྱང་ཕན་ཚུན་ལ་དམ་པའི་འོ་བྱས་ནས་འཚམས་འདྲི་བྱ་འོས༌སོ།།

21 ཕོལ་ལོལ་བདག་གིས་འཚམས་འདྲི་ཞུ་བ་འདི་ནི་དངོས་སུ་བྲིས་པ་ཡིན།

22 གཙོ་བོ་གཅེས་སུ་མི་འཛིན་པ་ཡོད༌ན། དེ་ལ་དམོད་མོ་ཐེབས་པར་གྱུར༌ཅིག གཙོ་བོ་ལགས། ཁྱེད་ཉིད་ཕེབས་པར་ཤོག།

23 གཙོ་བོ་ཡེ་ཤུའི་ཐུགས་རྗེ་ནི་ནམ་ཡང་ཁྱོད་ཅག་དང་མཉམ་དུ་གནས་པར༌སྨོན།

24 བདག་གི་བརྩེ་བ་ནི་མཱ་ཤི་ཀ་ཡེ་ཤུའི་ནང་དུ་ཁྱོད་ཅག་ཐམས་ཅད་དང་མཉམ་དུ་གནས་པར༌སྨོན། ཨ༌མེན།། །།

<- ཀོ་རིན་ཐུ་པ་དང་པོ། 15