1 [a]E huriki ranga, a niluhoi ne ria i uka ma i tora hateka. Mu bole dili ria, pali naha ni vahehe vona a maka niluhoi na bakovi. 2 [b]Ranga bakovi ri luhoi i kamumu ni kani a maki lobo. Pali ranga bakovi, a niluhoi ne ria i uka ma i tora hateka, ri ngaru ni kani kunana a kobo. 3 [c]A viri i kani lobo a kania, nahea ge biu a viri i kani kunana a kobo. Pali a viri i kani kunana a kobo, nahea ge taki i hale a viri i kani a maki lobo, a vuhuna a Vure i bole dilia pali. 4 [d]Naha ni pelekadoa a vora na bakovi tara. A matakari vona kunana ge masia a leho vona i kamumu o i hale. A vora ne Bakovi Dagi bara i leho kamumu, a vuhuna e Bakovi Dagi i tuhori ia ge leho kamumu.

5 [e]E huriki ranga ri luhoia a parava tara parava ni lotu. Pali e huriki ranga ri luhoi a parava lobo ri palupulupu. Hita takutaku si gi luhoi kamumu i vai a niluhoi i muholi si gi ramaia. 6 E huriki ri luhoia a parava tara a parava ni kavurikea a Vure, ri rata mavonga a vuhuna ri ngaru ni togoa e Bakovi Dagi. E huriki ri kani a maki ni kani lobo ri rata mavonga, ri togoa e Bakovi Dagi, a vuhuna ri kavurikea a Vure vona. E huriki ranga ri marikoi ni kani ranga maki, ri rata mavonga ni togoa e Bakovi Dagi, ri kavurikea a Vure. 7 I uka ma si mahuri o si mate na ningaru ne hita. 8 [f]Na tahuna si mahuri, hita ne vona e Bakovi Dagi. O, si mate, hita ne vona e Bakovi Dagi. I mavonga, na tahuna si mahuri, o si mate, hita ne vona e Bakovi Dagi kunana, si ngaru ni ramaia, ge vivi ne hita. 9 E Kristo i mate, i mahuri mule na matenga, ge ia a Bakovi Dagi ne huriki ri mate, ne huriki ri mahuri.

10 [g]Naha ni pelekado, naha ni biu e turamu, a vuhuna hita lobo bara si pesi takutaku na matana Vure, ge pelekado hita. 11 [h]A ngava ni here puru na Hinere i ta maea,

13 I mavonga, naha ni vapelekado tabu. A viri i luhoi torea a Vure, naha ni torodoa ge boru na naro hale. 14 [i]I uka tara maki ni kani ge hale na matana Vure. A maki ni kani lobo i kamumu ni kani. Iau a lohoka vona i muholi hateka, a vuhuna a ramai e Isu a Bakovi Dagi. Pali a viri i luhoi a maki ni kani tara i hale ni kani, pali, a maki ni kani iea i hale vona. 15 [j]E turamu tara ge luhoia a maki ni kani tara i hale, pali i matai ioe o kania, muri ia tara i kania, ngane o ratea i boru. E Kristo i mate vona, ge korimulea, pali o valai, ke, o ratea ge lohopilea e Kristo. O rata mavonga, i uka ma o laho tabu na naro na nivangaru. 16 I mavonga, nahea tara maki o takia ta i kamumu ge rata e huriki ri gi biu ioe. 17 A pelegona a harikianga na Vure, i uka ma a vinara na maki ni kani, a maki ni ninu. A pelegona a harikianga na Vure i maea, si gi laho malamala, si gi made na nivalemu, si gi vivi na nivivi na Hanu Kiripiripi. 18 E huriki ri muri mai e Kristo na naro nga, a Vure bara i vivi ne ria, e huriki a bakovi a ngatavine bara ri vivi ne ria.

19 [k]I mavonga, si gi toni a bulune hita ni made na nivalemu. Si gi vatuhori ni laho na naro na Vure.

20 [l]Naha ni ratapilea a leho na Vure na hini o ngaru a maki ni kani ranga. I muholi, a maki ni kani lobo i kamumu ni kani. Pali a viri i ratea e turana ge boru vona a maki ni kani i ngarua, i rata a naro hale. 21 I kamumu go peremu vona a bobona maki, go peremu vona a vain, o go lohopile a naro tara, ra i ratea e turamu tara i boru. 22 Ioe o luhoi navai vona a maki nga, a maki marua a Vure. Naha ni taki tala lae. E huriki i uka ma ri rare vona a maki ri taki ta i kamumu, bara ri vivi. 23 Pali e huriki ri kani a maki ri luhoi ta i hale, a Vure bara i habi a nimadihi ne ria, a vuhuna a maki ri luhoi ta i hale, ri kani kunana. A ra maki si luhoia i hale, pali si ratea, si rata a naro hale.

<- Rom 13Rom 15 ->