Rom 11

A Vure i Vakasiri a Nidodo Vona ne Huriki a Israel

1 *I navai? A Vure i marikoi pali ne huriki a tara vona, e huriki a Israel? I uka liu! Iau a Israel, a hamone Abraham, na kabu ne Bensamin. I uka ma i marikoi nau. 2 A Vure i vulaki hosi e huriki a Israel. I uka ma i marikoi ne ria. Mu lohoka vona a nuverei ne Elaisa, ni here hosi na Hinere. I vasileki na Vure, i deke ne huriki a Israel, i ta maea, 3 *“Bakovi Dagi, ri ratapile pali a maka dede vomu. Ri rabalaki lobo e huriki a propet vomu. Iau kikeri a tabana, pali ri matakana iau, ri gi rabalaki iau.” 4 *Pali a Vure i koli, i ta maea, “I uka ma ioe kikeri. A bakovi ala rangale polorua (7,000) ri tabana, ri muri mai iau. I uka ma ri turume puru na vure e Bal.” 5 I mavonga kunana mona. A tara kiroko ne mia i tabana, a Vure i vulaki mia na naro kamumu vona. 6 *A Vure i vulaki e huriki, i uka ma i muri mai a vilone ria. I vulaki ria, a vuhuna i ngaru ni rata kamumu ria. Bara i vulaki ria i ramai a vilone ria, ngane i uka ma ge vakasiri a naro kamumu vona.

7 I mavonga, e huriki a Israel i uka ma ri bole visi a maki ri matakanea. E huriki a Vure i vulaki ria, ri bolea, pali e huriki ranga, a Vure i rata ria ri mata kepa. 8 *Vin 29:4; Ais 29:10I manga a ngava ni here puru na Hinere i ta maea,

“A Vure i vakauvo a niluhoi ne ria.

I rata ria ri kepa,

ri vou,

i valai i harena mona.”

9 *Sng 69:22-23E Davit tara, i takia a ngava iea, i ta maea,

“Na tahuna ri vapopo na habu

ge bele ne ria a vuranga tara;

i manga a hoa i puru vona a livoa,

a kedo ni gi sibo vona, ge koli a rabu hale ne ria.

10 Ge uvo a gine ria,

i uka ma ri gi longokilala a maki na Vure.

Ge modo a bitone ria, i manga e huriki a vorakato.

Ri gi made mavonga kunana na parava vakaroro.”

11 *Apo 13:46E huriki a Iuda ri sibo, pali i uka ma ri boru liu. A Vure i uka ma ge mata taro liu ria. Ri rata a naro hale, ngane a Vure i matai e huriki a kabu ranga, i uka ma ria a Iuda. I korimule ria ngane, lakea e huriki a Iuda ri gi masigoro ne ria. 12 E huriki a Israel ri ngalahere na Vure, i mavonga i kamumu a Vure ge rata kamumu hateka e huriki i uka ma ria a Iuda. I mavonga, muri ma, na tahuna e huriki a Iuda lobo ri hamule maia a Vure, bara i kamumu hateka.

13 Ngane a taki mua, ra mua i uka ma mua a Iuda. Iau a apostolo ne mua. A vivi hateka vona a leho a Vure i habia nau, i rudu iau ga vakalongo mua vona a Velenga Kamumu. 14 Bara i rata e huriki ranga na kabu nau ri gi ngutu vona a naro kamumu a Vure i ratea ne mua, bara i korimule ranga ne ria. 15 Ngane a Vure i vakasiri a dala ge korimule e huriki i uka ma ria a Iuda, a vuhuna i lohopile e huriki a Iuda. Pali muri ma, na tahuna a Vure ge korimule e huriki a Iuda, bara i manga i vakamahuri mule ria na matenga. 16 I manga a bret, a vit i moro muga, lakea ni habi lakea na Vure. A tabekena ni habi na Vure, ne vona a Vure. A bret lobo, ia tara ne vona a Vure. I manga a kai. Na tahuna a kana kai ni habi na Vure, a rahana ranga, ne vona a Vure.

17 *Epe 2:11-19E huriki a Israel ri manga a kai a oliv ni varo. Mua e huriki a kabu ranga, mu manga a kai a oliv i rike tavula na robo. A Vure i puri vuroki na kai ne huriki a Israel a rahana ranga. I bole mua, i vakamadoko mua na vuhuna. Ngane i tua polo ne mua a totona kai ni varo, re huriki a Iuda. 18 Pali mua, nahea mu gu bibi rike mule mua, mu gu taki ta mu kamumu hateka na maka rahana kai ni puri tala. Mu luhoi kamumu taro. A rahana kai i uka ma i bole doga a kana kai. A kana kai i bole doga a rahana. 19 Ma mu gu ta maea, “A Vure i puri tala a maka rahana kai ge vakamadoko mia na murine ria.” 20 I muholi ngi. A Vure i puri tala ria a vuhuna i uka ma ri luhoi torea e Kristo. Pali mua mu madoko mavonga na kai a vuhuna mu luhoi torea e Kristo. I mavonga, naha ni tero. Mu mangenge. 21 Mu luhoi kamumu. A maka rahana oliv muholi i uka ma ri luhoi tora ia, lakea a Vure i puri vuroki ria. Mua ranga, bara mu longotaroa, bara i puri vuroki mua.

22 *Ion 15:2,4Ngane mu matakilaka vona a narona Vure. I habi a nimadihi ne huriki ri lohopilea. I rata kamumu hateka mua e huriki mu luhoi tora ia. Pali mua bara mu lobo ni luhoi torea a naro kamumu vona, mua ranga, bara i puri vuroki mua. 23 Pali ria ranga, bara ri pulo a vilone ria, ri luhoi torea e Kristo, a Vure i tahoka a nitora ni hudo mule ria na murine ria. 24 A kai a oliv i rike tavula na robo, i uka ma i ramai a vilo ni gi vakamadoko a rahana na bokona kai a oliv ni varo. Pali a Vure i rata mavonga na tahuna i vulaki tala mua, i bole dili mua na kabu ne huriki a Israel. I mavonga, a maki tavula a Vure ge bole mule e huriki a Israel, ge bole dili tabu ria na kabu ne ria. Mua o huriki a kabu ranga mu manga a rahana kai ni puri tala na kai a oliv i rike na robo, ni hudo tala na kai a oliv ni varo. Pali e huriki a Iuda ri manga a rahana kai i toto tala na kai a oliv ni varo. Muholi ngi bara i kara ni hudo mule tabu ria na murine ria.

25 Mua e huriki a turagu, a ngaru mu gu longokilala a ngava a Vure i vakalongo kavakava, nahea mu gu pahaluhoi ta mu rangi e huriki a Israel. Muga a ngava iea i kapiloho, pali ngane i bele kavakava, i maea: a Vure i rata e huriki a Israel ri gigi tora. Bara ri gigi tora mavonga i vano i harena na tahuna e huriki lobo a Vure i vulaki ria, i uka ma ria a Iuda, ri gi valai vona. 26 *Ais 59:20-21Muri a Vure ge korimule e huriki a Israel lobo, i manga a ngava ni here hosi, i ta maea,

“A Viri ge korimule e huriki, bara i valai o Sion;*

bara i vakalobo a maka naro hale na kabu ne Iakop.

27 *Na parava iea a ngava dagi a rata hosi turane ria bara i bele muholi,

ga ravunu vuroki a naro hale ne ria.”

28 E huriki a Iuda ri marikoi ni longoa a Velenga Kamumu, lakea ria a pile na Vure. I mavonga a Velenga Kamumu i bele ne mua e huriki i uka ma mua a Iuda. Pali a Vure i vulaki ria hosi, i mavonga i ngaru ria, a vuhuna i rata hosi a ngava dagi turane huriki a gare ne ria. 29 Na tahuna a Vure i gale a viri, i rata kamumu a viri, a Vure i uka ma ge pulo a niluhoi vona. 30 Hosi mu longotaroa a Vure. Pali ngane a Vure i dodo mua a vuhuna e huriki a Israel ri longotaroa. 31 Ngane ri longotaroa a Vure, i mavonga a nidodo na Vure i bele ne mua. Pali na tahuna ri pulo a vilone ria, bara i dodo ria. 32 A Vure i rata e huriki lobo a viri ni longotaro a ngavana. I rata mavonga, a vuhuna i ngaru ni vakasiri a nidodo vona ne huriki lobo.

33 *Ais 55:8-9I muholi hateka! A naro kamumu na Vure, a niluhoi vona, a lohokanga vona, i uka harena! I uka tara viri ge tuveve polo vona a narona Vure, a hini i pelekado e huriki vona. 34 *Ais 40:13; 1Ko 2:16A ta maea, a vuhuna ni here maea,

“I uka tara viri ge lohoka vona a niluhoi ne Bakovi Dagi,

I uka tara viri ge takia a Vure a ra ge ratea.”

35 *“I uka tara viri ge habi a maki na Vure,

a Vure ge kolia.”

36 *1Ko 8:6A Vure kunana a viri i ratarike a maki lobo. Ia kunana i nugu a maki lobo na limana, ri tabuli kamumu. A maki lobo ne vona kunana. Si gi kavurikea a rana na parava vakaroro. I muholi.

<- Rom 10 Rom 12 ->