Nita Kapiloho 16

A Tavila i Polorua na Rongova na Vure

1 Muri a longoa a lohona viri i gale tala dagi na Roho na Vure, i taki e huriki a agelo ala polorua, i ta maea, “Mu vano, mu guru puru na malala a tavila i polorua nga, ra ri vona a rongova na Vure.”

2 [a]Lakea a mugana agelo i vano, i guru puru na malala a tavila vona. I rata mavonga, e huriki ri tahoka a kilakila ne Livoa, ri kavurike a hanuna, i tuvu ne ria a ngarava dagi i rongo hateka.

3 [b]A ruana agelo i guru puru na dari a tavila vona. I rata mavonga, a dari i mapulo, i bele manga a darana podana bakovi, lakea a maki mahuri lobo i tabuli na dari ri mate.

4 A toluna agelo i guru puru na maka naru, a naru bele, a tavila vona. I rata mavonga, a naru i mapulo i manga a dara. 5 Muri a longoa a agelo, ra i matakari a maka naru, i ta maea,

“Ioe o Malamala hateka, ra Viri o made ngane, o made hosi.

A naro o pelekado e huriki vona i kamumu.

6 I kamumu, a vuhuna ri rabalaki e huriki a tara na Vure, e huriki a propet, i tua a darane ria.

I mavonga i kamumu o habi ne ria a dara, ri gi ninu!”

7 [c]Muri a longoa a dede na nihabi i ta maea,

“O Bakovi Dagi, Vure Tuhaka hateka,

i muholi hateka, a naro vomu ni pelekado e huriki i malamala, i kamumu.”

8 A vana agelo i guru puru na haro a tavila vona, i ratea a haro i gutu parina e huriki. 9 [d]A haro i kara hateka, i gutu parina kesi e huriki. Pali i uka ma ri pulo a vilone ria, ri gi vakabagetua a Vure. Ri harogia a rana Vure, ra viri i matakari a maka vuranga nga.

10 [e]A limana agelo i guru puru na gula hariki ne Livoa, a tavila vona. A uvo i kavitagua a harikianga vona. A nimadihi dagi i bele ne huriki, lakea ri kani mule a tabelene ria. 11 Pali i uka ma ri pulo a vilone ria, ri gi ngalahere na naro hale ne ria. Ri harogia a Vure meli na hunu na nimadihi dagi ri bole, na maka ngarava i tuvu ne ria.

12 [f]A polotarana agelo i guru puru na naru dagi e Iupretis a tavila vona. I rata mavonga, a naru dagi e Iupretis i mara, ge kado puru a dala na tara ne huriki a hariki ri gi valai na nirikena haro. 13 Muri a matai a hanitu i tolu, to page tala na ngavana Mata Dagi, a ngavane Livoa, a ngavana nitamina propet. A hanitu nga to mata manga a puho. 14 [g]A leho na hanitu nga, to go havai, to go rata a nivakasiri, to go tuli valai e huriki a hariki lobo na malala, ri gi vapopo turana maka tara ne ria, ri gi vaubi na parava dagi na Vure i tuhaka hateka ge pelekado e huriki vona.

15 [h]“Mu longo! Popote ga valai vakaturutu, i manga a panaho! E huriki i uka ma ri mahita, ri matapara, ri rodo a varakia ri gi vivi, a vuhuna i uka ma ri gi bobo. I uka ma ni gi matai a mudune ria.” 16 [i]A hanitu i tolu nga, to tuli valai e huriki a hariki nga, ri vapopo na tanga tara, ra ni gale na nita Hibru e Armagada.[j]

A Poloruana Tavila

17 A poloruana agelo i guru puru na vilu a tavila vona. I rata mavonga, a lohona viri tara i gale tala dagi na Roho na Vure, na gula hariki, i ta maea, “I lobo pali!” 18 [k]Muri a vila i maravila, i kururu, i pelaka. A vuruke dagi hateka i pori. Hosi, na tahuna a bakovi i tubu ni made na malala, i valai i harena mona, i uka tara vuruke dagi ge pori maea. 19 [l]A vuruke i ratapilea a tanga dagi iea, i pukea na tabeke i tolu. A tanga dagi lobo na malala ri mapuka puru. A Vure i luhoia a tanga dagi e Babilon, i ratea ge ninu a kikei na naru vagole na rongova vona. 20 [m]A vuruke i rata a bodu lobo ri marakavelu, a lolo lobo ri mapuka puru. 21 [n]A vala kedo dagi i boru valai na hunu, ri taho e huriki. A nimava na vala kedo i taku i manga a kilo i 50! E huriki a bakovi a ngatavine ri harogia a Vure, a vuhuna a vuranga iea i dagi hateka.

<- Nita Kapiloho 15 Nita Kapiloho 17 ->