Ni Gi 31

A Narone Midian Ni Koli

1 E BAKOVI DAGI i takia e Moses, 2 “O koli a naro e huriki a Midian ri rata virihi e huriki a Israel vona. Muri bara o mate.”

3 Lakea e Moses i taki e huriki a Israel i ta maea, “Mu bole a maka maki na vabinga, mu vano mu vaubi turane huriki a Midian. E BAKOVI DAGI i ngaru mu gu koli a narone ria. 4 Mu rudu e huriki a bakovi ala 1,000 na kabu takutaku ne Israel, ri gi vaubi.” 5 Lakea a bakovi ala 12,000, ra 1,000 na kabu takutaku ne Israel, ni habi ne ria a maki na vabinga. 6 Lakea e Moses i rudu ria ri gi vaubi, ra bakovi ala 1,000 na kabu takutaku. E Pinias e tune Eleasar a prister, i turane ria. I bole a maka maki ni taba na kape, a maka tavure ni gale ria ri gi lakea na vabinga, ni gale hamule ria na vabinga.

7 Lakea ri vano ri vaubi ne huriki a Midian i manga a ngava e BAKOVI DAGI i vakuku e Moses vona, ri rabalaki e huriki a bakovi lobo. 8 Ri rabalaki turana e huriki ranga a hariki o Midian ri ala lima: e Evi, e Rekem, e Sur, e Hur, e Reba. E Balam, e tune Beor, ia tara ni padimate na bainat. 9 E huriki a Israel ri turari e huriki a ngatavine, e huriki a koma, ri bole polo a maka bulmakau, a maka sipsip, a maka maki kamumu ne huriki a Midian. 10 Muri ri rungani a maka mada, a tanga ne huriki a Midian.

11 Ri turari e huriki a ngatavine, a koma, ri bole a maka bulmakau a sipsip, a maka mahala, 12 ri bole valai ne Moses ne Eleasar a prister, ne huriki a Israel ri made na bilane Moab, na gagana naru e Iordan tabukoi o Ieriko.

E Huriki a Nugumaheto Ri Hamule

13 E Moses e Eleasar a prister, turane huriki a matakari ne Israel ri vano ri tagui e huriki a nugumaheto polovavo na mada. 14 Muri e Moses i tahate e huriki a ubu ri matakari a nugumaheto ri ala 1,000, e huriki a ubu ri matakari a nugumaheto ri ala 100, ra ri hamule pali na vabinga.

15 Lakea i nana ria i ta maea, “I navai i uka ma mu rabalaki e huriki a ngatavine? 16 [a]Ria kunana ri longo mai a nita ne Balam ri rata e huriki a bakovi a ngatavine ne hita ri ngalahere ne BAKOVI DAGI, na tahuna ri made o Peor. Lakea a gilanga dagi i bele ne huriki a tara ne BAKOVI DAGI. 17 Ngane mu rabalaki e huriki a koma bakovi, e huriki a ngatavine ri mahita turana a bakovi pali. 18 Pali naha ni rabalaki e huriki a koma ngatavine, a sirula. Mu bole ria ge ne mua.

19 “Mua e huriki mu rabalaki a viri, o mu padoi a podana viri, mu made polovavo na mada na parava ge polorua. Na toluna parava, na poloruana parava, mua turane huriki a ngatavine mu bole na vabinga, mu rata a naro ni matapado. 20 Mu vakamatapado a varakia ne mua, a maki lobo ni rata na kulina bulmakau, a vuna meme, a kai.”

21 Lakea e Eleasar a prister i taki e huriki a nugumaheto ri hamule na vabinga i ta maea, “Ngane ga taki mua vona a vinara e BAKOVI DAGI i habi ne Moses. 22-23 A maka maki i uka ma ge nono, manga a gol, a silva, a aen, a kapa, a bras, mu parai na kanono, ri gi matapado. Pali a maka maki bara i nono, mu loi pasi na naru ni vakamatapado, ri gi matapado. 24 Na poloruana parava, mu loi pasi a maka varakia ne mua, bara mu matapado na matana Vure, mu dili pololilo na mada.”

E Huriki a Israel Ri Vaveru a Mahala

25 E BAKOVI DAGI i takia e Moses i ta maea, 26 “Mua e Eleasar a prister, e huriki a matakari na maka kabu, mu gi palupu e huriki a vorakato, a maka sipsip a bulmakau, a maki lobo e huriki a nugumaheto ri bole na vabinga. 27 Mu ru na tabeke ge rua. Mu habi ne huriki ri lakea na vabinga a tabeke tara, a tabeke tara mu habi ne huriki ri made na mada. 28 O bole a takis nau vona e huriki a vorakato, a bulmakau, a donki, a sipsip, a meme ra o habi ne huriki a nugumaheto. Ne huriki a vorakato ala 500 ri bole, o bole talea ge taku. Na maka bulmakau, a donki, a sipsip, a meme i 500 ri bole, o bole talea ge taku. 29 O bole o habi ne Eleasar a prister ge manga a takis ri habi nau. 30 E huriki a vorakato, a bulmakau, a donki, a sipsip, a meme, a kanirau ranga, ra o habi ne huriki ri made na mada, ngi ranga o bole a takis ne ria. Ne huriki a vorakato ala ravulu lima o bolea ge taku. Na maka bulmakau, a donki, a sipsip, a meme i ravulu lima o bole talea ge taku. O bole, o habi ne huriki a kabu ne Levi, ra ri matakari a kape ne BAKOVI DAGI.” 31 Lakea e Moses e Eleasar ru rata a maki e BAKOVI DAGI i vakuku rua vona ru gu rata.

32 E huriki a nugumaheto ri bole na vabinga a maki nga: a maka sipsip i 675,000, 33 a maka bulmakau i 72,000, 34 a maka donki i 61,000, 35 e huriki a sirula ri ala 32,000.

36 A kalavana maki ni bole na vabinga i bole e huriki a nugumaheto i maea:

A maka sipsip i 337,500, 37 ri habi ne BAKOVI DAGI mana a takis i 675.

38 Ni Gi A maka bulmakau i 36,000, ri habi ne BAKOVI DAGI manga a takis i 72.

39 Ni Gi A maka donki i 30,500, ri habi ne BAKOVI DAGI manga a takis i 61.

40 Ni Gi E huriki a vorakato ri ala 16,000, ri habi ne BAKOVI DAGI manga a takis i ala 32.

41 Lakea i manga a hini e BAKOVI DAGI i vakuku e Moses vona, e Moses i habi ne Eleasar a prister a maki nga turana e huriki a vorakato, i manga a takis ne BAKOVI DAGI.

42 A kalavana maki ni bole na vabinga, e Moses i habi ne huriki ri made na mada, ra nga: 43 E huriki a bakovi a ngatavine ri bole

a maka sipsip ri 337,500,

44 Ni Gi a maka bulmakau ri 36,000,

45 Ni Gi a maka donki ri 30,500,

46 Ni Gi e huriki a vorakato ri ala 16,000.

47 Na tabeke na maka maki ni bole na vabinga, ra ni habi ne huriki a Israel, e Moses i bole tala a takis. Ne huriki a vorakato ala ravulu lima, na maka kanirau i ravulu lima, e Moses i bole tala i taku, i manga a hini e BAKOVI DAGI i vakukua vona ge ratea. I habi ne huriki a Levi, ra ri matakari a kape ne BAKOVI DAGI.

48 Muri e huriki a ubu ri matakari a nugumaheto ala 1,000, e huriki a ubu ri matakari a nugumaheto ala 100 ri lakea ne Moses, 49 ri takia, “Bakovi dagi, mi gi palupu pali e huriki a nugumaheto mi matakari, i uka tara ne ria ge velu. 50 Ngane mi gi habi vomu a maka bagetua na gol, mi paru tala na limane ria, na lohone ria, na talingane ria. Mi ngaru ni habi ne BAKOVI DAGI a maka mahala nga, ge a mapana ni kona mule mia ge kavitagu mia.”

51 Lakea e Moses e Eleasar a prister ru bole a gol a maka bagetua nga. 52 A nimavana maka bagetua nga i 16,750 sekel. 53 Pali e huriki a nugumaheto takutaku, ri bole na vabinga ranga maki. 54 E Moses e Eleasar a prister, ru bole ne huriki a ubu a maka gol, ru vano ru ru na Kape na Vaponga. Ru rata mavonga, e huriki a Israel ri gi luhoi mule e BAKOVI DAGI i matakari ria.

<- Ni Gi 30 Ni Gi 32 ->