1 *Iud 11E Kora, e tune Ishar bakovi na kabu ne Levi, turana a bakovi ala tolu na kabu ne Reuben, ri longotaro e Moses. A rana bakovi nga: e Datan, e Abiram, rua e tune Eliab, e On e tune Pelet. 2 Ra bakovi nga turana ranga nupesi ne Israel ri ala 250 ri longotaro a ngavane Moses. Re huriki nga ria a tara na vaponga. 3 Ri valai ne Moses e Aron ri taki rua ri ta maea, “Muru rata polomugamuga hateka. Hita lobo a tara na vaponga ne BAKOVI DAGI ni gamai, i uka ma i marua kunana. E BAKOVI DAGI i made turane hita lobo. I navai muru bibi rike mule marua muru matakari mia?”

4 Na tahuna e Moses i longoa a ngava iea, i tabuli ngalabarara puru na malala i vasileki. 5 Muri i pesi rike i taki e Kora turana e huriki a tara vona i ta maea, “Kuduvi na hatelanga e BAKOVI DAGI bara i vakasiri e rei e huriki a tara vona. E rei e huriki a bakovi i vulaki, bara i taki ria ri valai tabukoi vona. 6 Ioe o Kora turane huriki a tara ri muri vomu, kuduvi na hatelanga mu bole a maka pelete, 7 mu ru a kanono a havu mangisipa ne ria. Mu bole, mu pesi na matane BAKOVI DAGI. A bakovi e BAKOVI DAGI ge vulakia, a bakovi iea ni gamai. Mua o huriki a Levi mu rata polo muga muga hateka.”

8 Lakea e Moses i taki tabu e Kora i ta maea, “Mua o huriki a Levi mu longo. 9-10 E BAKOVI DAGI a Vure ne hita a Israel, i vulaki tala mua ne huriki a Israel mu gu lakea tabukoi vona mu gu rata a leho vona na Mailo vona, mu gu pesi na matane huriki a bakovi a ngatavine ni tuhori ria. A Vure i taki mua turana a kabu ne Levi lobo mu gu ratea a leho iea, bara mu tahoka a rane mua. Pali i navai? Mu luhoia ra leho iea a maki tavula? I navai mu ngaru ge mua a prister? 11 Ari mua, i navai mu padi momoa e Aron? Ra mua, i uka ma mu padi momo kunana e Aron, mu padi momo e BAKOVI DAGI a Vure ne hita.”

12 Lakea e Moses i rudua tara viri i vano i taki e Datan rua e Abiram ru gu valai taro vona. Pali ru koli ru ta maea, “Maria i uka ma miri gi lakene. 13 O tuli tala mia na tanga kamumu e Egipto, o taparaki valai mia koea na tabeke i ngeki go rabalaki mia. Pali i uka ma ngi kunana. Ngane o ngaru ni matakari mia lobo. 14 Ioe i uka ma o taparaki mia, mi gi lakea na robo ge tahoka a malala kamumu mi gi tahoka a hania na maki ni kani, a hania na vain. O luhoi ge mia a manga o tami mia? Maria i uka ma miri gi lakene.”

15 E Moses i longoa a ngava iea i madihi a hatena, i takia e BAKOVI DAGI i ta maea, “Naha ni bole a maka nihabi ne huriki a tara nga ri habi vomu. Ri taki ta a matakari hale ria. Pali iau i uka ma bolea tara donki ne ria. I uka ma rata hale ria.”

16-17 Muri e Moses i takia e Kora i ta maea, “Kuduvi, ioe turane huriki a bakovi ala 250 ri ramai ioe, mu valai na matane BAKOVI DAGI. E Aron tara ge valai. Mua takutaku mu bole valai na dede ne BAKOVI DAGI a pelete na havu mangisipa. 18 Na hatelanga e huriki a bakovi nga ri bole takutaku a pelete na havu mangisipa, ri pesi turane Moses e Aron na matana Kape na Vaponga. 19 Muri e Kora i vakalipopo e huriki ri pesi tabukoi na matana Kape na Vaponga, ri mata lakea ne Moses e Aron. Na tahuna ri vapopo, e BAKOVI DAGI i ratea a bagetua vona i bele kavakava i masia e huriki. 20 Lakea e BAKOVI DAGI i taki e Moses e Aron i ta maea, 21 “Muru malele ha ne huriki a bakovi a ngatavine nga. Ngane kunana ga rabalaki ria.”

22 Pali e Moses e Aron ru tabuli ngalabarara na malala, ru takia e BAKOVI DAGI ru ta maea, “Vure, ioe kunana o rata e huriki a bakovi a ngatavine ri made. I navai i madihi a hatemu ne huriki nga na naro hale na bakovi ala taku i ratea?”

23 Lakea e BAKOVI DAGI i takia e Moses, 24 “O taki e huriki ri gi malele ha vona a kape ne Kora, ne Datan, ne Abiram ri gi pesi basi popote.”

25 Lakea e Moses i vano i matai e Datan e Abiram, e huriki a gare ne Israel ri ramaia. 26 Lakea e Moses i taki e huriki a bakovi a ngatavine i ta maea, “Mu karuku mule na kape na bakovi hale nga. Naha ni padoi ranga maki ne tou, ma mu gu vurua turane tou na naro hale ne tou.” 27 Lakea ri malele ha na kape ne Kora, ne Datan, ne Abirama. Pali e Datan, e Abiram ru pagitala ru pesi na matana kape ne rua, turane girihine rua, e tune rua.

28 Lakea e Moses i taki e huriki i ta maea, “Ngane bara mu masia tara maki ge bele, bara mu lohoka vona, e BAKOVI DAGI kunana i rudu iau ga matakari mua, ga rata a leho vona. Iau i uka ma a rata leho na ni ngaru nau. 29 Na tahuna e huriki nga bara ri mate manga kunana e huriki ri mate pali, bara mu lohoka vona e BAKOVI DAGI i uka ma i rudu iau. 30 Pali e BAKOVI DAGI ge rata rikea a naro karaba tara, a malala ge mapoka, ge ngavapanganga, lakea e huriki ri boru dili na lovo turana a maka maki ne ria, ri puru na murine huriki ri mate pali, na tahuna ri tabana ni mahuri, bara mu lohoka vona re huriki nga ri ngalahere ne BAKOVI DAGI.”

31 E Moses i ta lobo, i malaviriri kunana a malala i pesi vona e Datan e Abiram i mapoka, i vakabele a lovo dagi. 32 Lakea a malala i ngavapanganga, i todoa e Kora turana a tara vona, a kape ne ria, a maka maki ne ria. 33 Ri tabana ni mahuri ri boru puru na murine huriki ri mate pali turana a maka maki ne ria. A malala i makapirubu tabu, i uka ma ni matai ria tabu. 34 Na tahuna ri boru puru ri gale dagi hateka. Lakea e huriki a bakovi a ngatavine o Israel ri pesi tabukoi ri ta maea, “Si gi ha malaviriri, ma ge mapoka a malala ge todo hita!” 35 E BAKOVI DAGI i rudua a kanono, i valai i gutu parina e huriki a bakovi ala 250, ra ri rata a nihabi na havu mangisipa.

36 Muri e BAKOVI DAGI i takia e Moses i ta maea, 37 “O takia e Eleasar e tune Aron a prister, ge bole a maka pelete ne huriki ri nono na kanono, ge voro viliha basi a katona kanono i tabuli ne ria. Ge rata mavonga, a vuhuna a pelete nga a taba. 38 Ra maka pelete ne huriki a bakovi ri mate a taba, a vuhuna ri valai na matagu ri rata a nihabi na havu mangisipa. O tutu a pelete nga ge kabela, o naviri a dede vona, ge manga a kilakila na matane huriki a Israel.”

39 E Moses i takia e Eleasar, a prister i bole a pelete nga, i habi ne huriki a mari ri tutu kamumu a maki ge kabela, ne vona ni naviri a dede 40 Ra maki ni tutu i kabela ni kavitagu a dede vona, ge habi a niluhoi dagi ne huriki a Israel. Ri gi lohoka vona e huriki a tara ne Aron kunana ri gi lakea tabukoi na dede, ne vona ni habi a havu mangisipa na matane BAKOVI DAGI. E rei a bakovi tara i ratea a nihabi iea, e BAKOVI DAGI bara i ratapilea, i manga a hini i ratapile e Kora turana a tara vona. Lakea e Eleasar i rata a maka maki e BAKOVI DAGI i taki e Moses vona.

41 Na parava muri, e huriki lobo ri tapuhaki ne Moses e Aron, ri ta maea, “Muru rabalaki pali ranga e huriki a tara ne BAKOVI DAGI.”

42 Na tahuna e huriki lobo ri vapopo ri tahate e Moses e Aron, ri mata lakea na Kape na Vaponga. Ri masia a bubu i kavitagua a kape, a bagetua dagi ne BAKOVI DAGI i bele kavakava. 43 E Moses e Aron ru vano ru pesi na matana Kape na Vaponga. 44 Lakea e BAKOVI DAGI i takia e Moses, 45 “Muru pesi ha. Muru vano muru pesi basi popote ne huriki a bakovi a ngatavine, bara ratapile ria malaviriri kunana. Ru longoa a ngava iea, ru ngalabarara puru na malala.”

46 Lakea e Moses i takia e Aron, “O bole a pelete na havu mangisipa, o bole na dede a katona kanono o rua na pelete vomu. O bole lakea malaviriri ne huriki a bakovi a ngatavine, o rata a nihabi ge kavitagu ria na rongova na Vure, a vuhuna e BAKOVI DAGI i madihi a hatena ne ria, i vakabele a gilanga dagi ne ria pali.” 47 Lakea e Aron i muri mai a nitane Moses. I bole a pelete ne vona ni rata a nihabi na havu mangisipa, i nunu lakea ne huriki a bakovi a ngatavine ri vapopo. I masia a gilanga hale i bele pali ne ria. Lakea e Aron i ratea a nihabi na havu mangisipa, ne vona ni kavitagu ria. 48 Lakea e Aron i pesi na kurukurune huriki ri mate pali, e huriki ri mahuri, i rata a nihabi. Muri a gilanga iea i lobo. 49 Pali e huriki ri mate vona a gilanga iea i 14,700. E huriki ri mate turane Kora, i uka ma ni gi turane ria. 50 Na tahuna a gilanga i lobo, e Aron i hamule mai e Moses na matana Kape na Vaponga.

<- Ni Gi 15Ni Gi 17 ->