1 E BAKOVI DAGI i takia e Moses i ta maea, 2 “O tuli e Aron turane huriki e tuna bakovi. O bole a nirodo ola ola, a nibiri ne vona ni gamai, a bulmakau a toga ge a nihabi na naro hale, a sipsip a toga ge rua, a kulopi na bret i uka is. 3 Muri o gale palupu e huriki a bakovi a ngatavine ri gi valai na matana Kape na Vaponga.” 4 E Moses i rata a maki e BAKOVI DAGI i vakuku ia vona, i gale palupu e huriki lobo, ri vapopo na matana Kape na Vaponga.

5 E Moses i taki ria, “E BAKOVI DAGI i vakuku iau vona tara maki ga ratea ngane.” 6 I gale e Aron turane tuna mai, ri valai ri pesi na matane huriki, i vahilolo ria na naru. 7 Muri i vakarodoa na nirodo e Aron, i bolea a kala i manga a palabele, i vakarea ia vona. Muri i vakarodoa e Aron na nirodo ola ola, i vakarea ia na kala dagi. I bolea a palabele*A palabele a mavidana kala olaola ni rea halui a kakaina viri. ni vakabagetu, i kolo tatea a kala dagi ne Aron. 8 I bolea a kala na ngala i koloa na ngalane Aron. I bole a kedo kiroko i rua†A rana kedo kiroko nga e Urim e Tumim. ne vona ni bole a lohokanga na ningaru na Vure, i ru pololilo na kala na ngala. 9 I bolea a hoi‡A hoi a mavidana kala ola ola ni kae ni vakakube a prister dagi vona. i ru halui a gine Aron vona. Muri i bolea a hulongi ni rata na gol, i topia na hini muga na hoi. Ra hulongi iea, i vakasiri e Aron ia a bakovi na Vure. E Moses i rata a maki nga, i ramai a ngava e BAKOVI DAGI i vakuku ia vona.

10 Muri e Moses i bolea a nibiri, i gamai a Mailo na Vure turana a maka maki i tabuli pololilo vona, ge ne vona e BAKOVI DAGI kunana. 11 I bole tabua a nibiri i voro tamali langa na dede balaka polorua, i gamai a maka mahala ri tabuli vona, a tavila na hilova turana a dede kiroko vona. A maka maki nga ne vona e BAKOVI DAGI kunana. 12 I bolea a nibiri i guru langea na gine Aron, i gamaia, ge vona e BAKOVI DAGI kunana. 13 Muri e Moses i tuli e huriki e tune Aron ri valai, i vakarodo ria na nirodo, i vakarea ria na palabele, i vakatama ria na tama, i ramaia a ngava e BAKOVI DAGI i vakukua vona.

14 Muri e Moses i bolea a bulmakau a toga, ge a nihabi na naro hale. Lakea e Aron turana e tuna mai ri ru langa a limane ria na gina. 15 Muri e Moses i rabalakia a bulmakau, i lutu a kukulimana na darana, i ravu na maka tupina dede na nihabi gutu-vuro. Na naro iea kunana i gamaia a dede i matapado na matana Vure. Muri i bole paru a darana i tababana, i guru na taruna dede, i gamaia, i kavitagua. 16 Lakea e Moses i bole a vina pololilo na mahalana, a kinake i kavitagu a hate, a vuanalipi i rua turana vina, i gutu-vuro na dede. 17 Pali i bole ranga balena bulmakau turana a kulina, a bobona, a tahena, i gutu-vuro polovavo na mada, i ramai a ngava e BAKOVI DAGI i vakuku e Moses vona.

18 Muri e Moses i bolea tara sipsip a toga ge a nihabi gutu-vuro. Lakea e Aron turane huriki e tuna ri ru langa a limane ria na gina. 19 Muri e Moses i rabalakia, i bole a darana, i voro tamali langa na tabekena dede i va. 20 I pala kesikesia a sipsip, i gutu a gina, a vina, a balena. 21 I vahilolo a maka mahalana, a vahana. I gutu loboa langa na dede. Ra sipsip iea a nihabi gutu-vuro ni rata na kanono, i manginoro a mangina. Ia a nihabi ni gutu na kanono ne BAKOVI DAGI, i ramaia a ngava e BAKOVI DAGI i vakuku e Moses vona.

22 Muri e Moses i bole tabua tara sipsip a toga, ne vona ni gamai a bakovi ge ia a prister. Lakea e Aron turane huriki e tuna ri ru langa a limane ria na gina sipsip. 23 Muri e Moses i rabalakia a sipsip iea, i bole ranga darana, i ravu na taruna talingana kanena ne Aron, na kukukoru na limana kanena, na kukukoru na vahana kanena. 24 Muri i tuli valai e huriki e tune Aron, i ravu a dara na taruna talingana kanene ria, na kukukoru na limana kanena ne ria, a vahana kanena ne ria. I bole paru a dara i tababana, i voro tamali lakea na tabekena dede i va. 25 Muri i bole a vina, a vina na kuna, a vina na mahalana, a kinake i kavitagu a hate, a vuanalipi i rua turana a vina, a pona kanena. 26 Muri e Moses i lakea na kulopi i vonu vona a bret i uka is, i tabuli na matane BAKOVI DAGI, i bole tala a bret i uka is, a bret ni gutu na namona oliv, a bisket i taku, i ru langa na vina, a pona kanena. 27 Lakea e Moses i ru a maki ni kani nga na limane Aron turane huriki e tuna, ri bole na limane ria, ri tabari e BAKOVI DAGI vona. 28 Muri e Moses i bole mule ne ria a maki ni kani, i gutu-vuro na dede turana a nihabi gutu-vuro ranga. Ra maki nga, a nihabi ni gamai e huriki a prister, i manginoro a mangina. Ia a nihabi ni gutu na kanono ne BAKOVI DAGI. 29 Muri e Moses i bolea a siana, i tabari e BAKOVI DAGI vona, manga a nihabi nitabari. Ra balena sipsip a toga iea, a sika ne Moses na nigamai e huriki a prister, i manga a ngava e BAKOVI DAGI i vakuku e Moses vona.

30 E Moses i bole a merena nibiri na nigamai, turana a dara i tabuli na dede, i voro tamali langa ne Aron, ne huriki e tuna, na nirodo ne ria. Na naro iea kunana e Moses i gamai e Aron, e huriki e tuna, turana a maka nirodo ne ria.

31 Muri e Moses i taki e Aron turane huriki e tuna, i ta maea, “Mu nono a balena sipsip o a bulmakau iea na matana Kape na Vaponga. Mu kani kinika na maka bret ri tabuli na kulopi. Ra kulopi iea i tahoka a maka bret, a bisket ne vona a nihabi nigamai. Na naro iea bara mu ramai a ngava a vakuku e Moses vona, a ta maea, ‘E Aron, e huriki e tuna ri gi kani.’ 32 Na tahuna mu kani mu maru, a maka kalavana maki ni kani mu gutu-vuro na kanono. 33 Muri mu pagitala na matana Kape na Vaponga, mu made vonga na parava ge polorua, ge harena na tahuna ge lobo a parava ge polorua na Habu na Nigamai. 34 E BAKOVI DAGI i taki hita si gi rata a maki i manga a hini si rata mona, bara i kavitagu mua. 35 I taki iau pali, ta mu gu made na matana kape na haro, na rodo, ge harena na parava i polorua mu gu rata a maki i taki. Bara mu longotaro a ngavana, bara mu mate, a vuhuna ra ngava iea e BAKOVI DAGI i vakuku iau vona.” 36 E Aron turane huriki e tuna, ri ramai kunana a ngava lobo e BAKOVI DAGI i vakuku e Moses vona.